'ഓറ ഫാമിംഗ് ചൈൽഡ്..'; സ്‌കൂൾ കവാടത്തിന് മുന്നിലെത്തിയ കുട്ടി; സ്ക്കൂൾ ബസിൽ വരാനുള്ള പ്രായത്തിൽ ചെറുക്കൻ വന്നത് കുതിരപ്പുറത്ത്; കൈയ്യടിച്ച് വരവേറ്റ് കൂട്ടുകാർ; ദൃശ്യങ്ങൾ വൈറൽ
ബോർബക്ര: അസം-മേഘാലയ അതിർത്തിയിലെ ദക്ഷിണ കംറൂപ്പ് ജില്ലയിലെ ബോർബക്ര ഗ്രാമത്തിൽ നിന്നുള്ള എട്ട് വയസ്സുകാരനായ യുവരാജ് റാഭയാണ് ഇപ്പോൾ സമൂഹ മാധ്യമങ്ങളിൽ താരമായിരിക്കുന്നത്. സാധാരണയായി സൈക്കിളിലോ നടത്തോ ബസ്സിലോ സ്കൂളിലെത്തുന്ന കുട്ടികൾക്കിടയിൽ, യുവരാജ് എത്തുന്നത് കുതിരപ്പുറത്താണ്. യുവരാജിന്റെ ഈ വ്യത്യസ്തമായ സ്കൂൾയാത്രയുടെ ദൃശ്യങ്ങൾ ഇതിനോടകം ലക്ഷക്കണക്കിനാളുകൾ കണ്ടുകഴിഞ്ഞു.
ദക്ഷിണ പന്തൻ ട്രൈബൽ മിഡിൽ ഇംഗ്ലീഷ് സ്കൂളിലാണ് യുവരാജ് പഠിക്കുന്നത്. എന്നാൽ, സ്വന്തം ഗ്രാമത്തിൽ റോഡും മെച്ചപ്പെട്ട ഗതാഗത സൗകര്യങ്ങളും ഇല്ലാത്തതാണ് യുവരാജിനെ കുതിരപ്പുറത്ത് സ്കൂളിലെത്തിക്കാൻ പ്രേരിപ്പിക്കുന്നത്. കുന്നുകളും ചെളി നിറഞ്ഞ പാതകളും നിറഞ്ഞ ഈ പ്രദേശത്ത്, മുടങ്ങാതെ സ്കൂളിൽ പോകാൻ യുവരാജിന്റെ കുടുംബം കണ്ടെത്തിയ ഏകമാർഗമാണിത്.
പഠനത്തിൽ മിടുക്കനായ യുവരാജ്, വിദ്യാഭ്യാസത്തിന് തടസ്സമുണ്ടാകാതിരിക്കാൻ കണ്ടെത്തിയ ഈ വഴി സഹപാഠികൾക്കും അധ്യാപകർക്കും ഏറെ സന്തോഷം നൽകിയിട്ടുണ്ട്. യാത്രാക്ലേശങ്ങൾക്കിടയിലും സ്കൂളിൽ എത്താനുള്ള കുട്ടിയുടെ താല്പര്യത്തെ അധ്യാപകർ അഭിനന്ദിച്ചു.
ഇന്ന് രാജ്യം വലിയ പുരോഗതി പ്രാപിച്ചിട്ടുണ്ടെങ്കിലും, പല ഗ്രാമങ്ങളിലും അടിസ്ഥാന സൗകര്യങ്ങളുടെയും റോഡുകളുടെയും അഭാവം നിലനിൽക്കുന്നുവെന്ന യാഥാർത്ഥ്യം യുവരാജിന്റെ ഈ വീഡിയോ സമൂഹ മാധ്യമങ്ങളിൽ ചർച്ചയാക്കിയിട്ടുണ്ട്.
