മാർക്കറ്റിൽ നിന്നും മീൻ മോഷ്ടിച്ചെന്നാരോപണം; ഉഡുപ്പിയിൽ സ്ത്രീയെ മരത്തിൽ കെട്ടിയിട്ട് അതിക്രൂരമായി തല്ലിച്ചതച്ചു; ദൃശ്യങ്ങൾ പുറത്ത്; കേസിൽ മൂന്ന് പേർ അറസ്റ്റിൽ

ബെം​ഗളൂരു: മാർക്കറ്റിൽ നിന്നും മീൻ മോഷ്ടിച്ചെന്നാരോപിച്ച് സ്ത്രീക്ക് ക്രൂരമർദനം. ഉഡുപ്പിയിലാണ് ഞെട്ടിപ്പിക്കുന്ന സംഭവം നടന്നത്. സ്ത്രീയെ മരത്തിൽ കെട്ടിയിട്ട് മർദിച്ച കേസിൽ മൂന്ന് പേരെ പോലീസ് പിടികൂടി. കർണാടക ഉഡുപ്പിയിലെ മാൽപേയിൽ ഇന്നലെയാണ് സംഭവം. വിജയനഗര സ്വദേശിയായ ലക്ഷ്മി ബായ്‍ക്ക് ആണ് ക്രൂരമർദനം ഏറ്റത്.

മാൽപേ സ്വദേശികളായ സുന്ദർ, ശിൽപ, കണ്ടാലറിയാവുന്ന മറ്റൊരാൾ എന്നിവർക്കെതിരെ പൊലീസ് കേസെടുത്തിട്ടുണ്ട്. കൂടുതൽ പേർക്ക് എതിരെ കേസെടുക്കുമെന്നും സ്ത്രീയെ ആക്രമിച്ചവർ ആരൊക്കെയെന്ന് ദൃശ്യങ്ങൾ നോക്കി തിരിച്ചറിയാൻ ശ്രമിക്കുകയാണെന്നും പോലീസ് വ്യക്തമാക്കി. മാൽപേയിലെ മത്സ്യമാർക്കറ്റിലാണ് ആക്രമണമുണ്ടായത്. മീൻ മോഷ്ടിച്ചുവെന്നാരോപിച്ച് ലക്ഷ്മിയെ മാർക്കറ്റിന് സമീപത്തുള്ള മരത്തിൽ കെട്ടിയിട്ട് അതിക്രൂരമായി മർദ്ദിക്കുകയായിരുന്നു.