മുംബൈ: എയർ ഇന്ത്യ വിമാനത്തിൽ യാത്ര ചെയ്യുകയായിരുന്ന യുവാവിനെ സഹയാത്രക്കാരിയായ സ്ത്രീ ഭീഷണിപ്പെടുത്തിയതായി പരാതി. മറാത്തി ഭാഷയിൽ സംസാരിക്കാത്തതിന്റെ പേരിലായിരുന്നു ഭീഷണി. മഹാരാഷ്ട്രയിൽ മറാത്തി ഭാഷ അടിച്ചേൽപിക്കുന്നുവെന്ന വിവാദങ്ങൾക്കിടെയാണ് ഈ സംഭവം പുറത്ത് വരുന്നത്. സംഭവത്തിന്റെ വീഡിയോ സാമൂഹിക മാധ്യമങ്ങളിൽ വ്യാപകമായി പ്രചരിക്കുന്നുണ്ട്.

വിഡിയോയിൽ, മറാത്തിയിൽ സംസാരിക്കാൻ ആവശ്യപ്പെട്ട സ്ത്രീയോട്, 'നിങ്ങളെന്നോട് മറാത്തിയിൽ സംസാരിക്കണമെന്നാണ് പറയുന്നത്?' എന്ന് മഹി ഖാൻ എന്ന യുവാവ് ചോദിക്കുന്നു. എന്നാൽ 'അതെ, ദയവായി ആ ഭാഷയിൽ സംസാരിക്കൂ' എന്ന് സ്ത്രീ മറുപടി നൽകുന്നു. ഇതിന്റെ കാരണം വ്യക്തമല്ല. തനിക്ക് മറാത്തിയിൽ സംസാരിക്കാൻ താൽപര്യമില്ലെന്ന് യുവാവ് പറഞ്ഞപ്പോൾ, 'നിങ്ങൾ മുംബൈയിലേക്കാണ് പോകുന്നത്, മറാത്തി എന്താണെന്ന് നിങ്ങൾക്ക് അറിയാമല്ലോ,' എന്ന് സ്ത്രീ പ്രതികരിച്ചു.

തുടർന്ന്, സഹയാത്രികനോട് ഇങ്ങനെ മോശമായി പെരുമാറരുതെന്ന് യുവാവ് പറഞ്ഞപ്പോൾ, 'മുംബൈയിൽ ഇറങ്ങൂ, മോശം പെരുമാറ്റം എന്താണെന്ന് ഞാൻ നിനക്ക് കാണിച്ചുതരാം,' എന്ന് സ്ത്രീ ഭീഷണിപ്പെടുത്തിയതായി യുവാവ് ആരോപിച്ചു. വിമാനത്തിലെ ജീവനക്കാരുടെ മുന്നിൽ വെച്ചാണ് ഇത് സംഭവിച്ചതെന്നും അദ്ദേഹം കൂട്ടിച്ചേർത്തു.

വിമാനത്തിലെ ജീവനക്കാരുടെ മുന്നിൽ വെച്ചാണ് ഈ ഭീഷണിയുണ്ടായതെന്ന് യുവാവ് കൂട്ടിച്ചേർത്തു. 'നാനാത്വത്തിൽ ഏകത്വം' എന്ന അഭിമാനത്തോടെ പറയുന്ന രാജ്യത്ത് ഇത്തരം ആളുകൾ ഇന്ത്യയുടെ പ്രതിച്ഛായയെ കളങ്കപ്പെടുത്തുകയാണെന്ന് യുവാവ് കുറ്റപ്പെടുത്തി. മുംബൈയിൽ തുടരണമെങ്കിൽ മറാത്തി സംസാരിക്കണമെന്ന സ്ത്രീയുടെ ആവശ്യം അപകടകരമായ മാനസികാവസ്ഥയാണ് കാണിക്കുന്നതെന്നും പരാതിക്കാരൻ കൂട്ടിച്ചേർത്തു.

എയർ ഇന്ത്യവിമാനംസ്ത്രീയുടെ ഭീഷണി

സ്വന്തം ലേഖകൻ