തിരുവനന്തപുരം: വിഴിഞ്ഞത്ത് കുടുംബശത്രുതയെത്തുടർന്ന് ബന്ധുവിനെ കള്ളക്കേസിൽ കുടുക്കാൻ കവർച്ചാ നാടകം നടത്തിയ യുവാവ് പോലീസ് പിടിയിലായി. വെങ്ങാനൂർ സ്വദേശിയായ മനോജാണ് സ്വന്തം വീട്ടിൽ മോഷണം നടന്നുവെന്ന് പരാതി നൽകി പോലീസിനെ കബളിപ്പിക്കാൻ ശ്രമിച്ച് ഒടുവിൽ അറസ്റ്റിലായത്.

തിങ്കളാഴ്ച വൈകിട്ട് വീട്ടിൽ ആരുമില്ലാതിരുന്ന സമയത്ത് ജനൽ കമ്പി മുറിച്ച് അകത്തുകയറിയ മോഷ്ടാക്കൾ ഏഴ് പവൻ സ്വർണവും 15,000 രൂപയും കവർന്നു എന്നായിരുന്നു മനോജ് വിഴിഞ്ഞം പോലീസിൽ നൽകിയ പരാതി. എന്നാൽ, വിഴിഞ്ഞം പോലീസ് സ്ഥലത്തെത്തി നടത്തിയ ശാസ്ത്രീയമായ പരിശോധനയിൽ മനോജിന്റെ കള്ളിവെളിച്ചത്താവുകയായിരുന്നു.

മോഷണം നടന്നുവെന്ന് പറയപ്പെടുന്ന മുറിയിലെ ജനൽ കമ്പികൾ മുറിച്ചിരിക്കുന്നത് വീടിന് പുറത്തുനിന്നല്ല, മറിച്ച് അകത്തുനിന്നാണെന്ന് പോലീസ് കണ്ടെത്തി. ഈ പൊരുത്തക്കേടാണ് പോലീസിന് മനോജിൽ സംശയം ജനിപ്പിച്ചത്. തുടർന്ന് നടത്തിയ വിശദമായ ചോദ്യം ചെയ്യലിൽ മനോജ് കുറ്റം സമ്മതിച്ചു. ആദ്യഘട്ടത്തിൽ, താൻ പണയം വെച്ച സ്വർണ്ണത്തിന്റെ വിവരം വീട്ടുകാർ അറിയാതിരിക്കാനാണ് മോഷണ നാടകം നടത്തിയതെന്ന് ഇയാൾ മൊഴി നൽകിയെങ്കിലും, പിന്നീട് സത്യാവസ്ഥ വെളിപ്പെടുത്തി.

തന്നോടൊപ്പം ഒരേ വീട്ടിൽ താമസിക്കുന്ന അളിയനുമായി നിലനിൽക്കുന്ന കുടുംബ തർക്കമാണ് ഇത്തരമൊരു ക്രൂരമായ നീക്കത്തിന് മനോജിനെ പ്രേരിപ്പിച്ചത്. അളിയനെ മോഷ്ടാവായി ചിത്രീകരിച്ച് ജയിലിലടയ്ക്കുക എന്നതായിരുന്നു ഇയാളുടെ ലക്ഷ്യം.

ജനൽ കമ്പി മുറിക്കുന്നതിനിടെ മനോജിന്റെ കൈക്ക് പരിക്കേറ്റതും പോലീസിന് നിർണ്ണായക തെളിവായി മാറി. വീട്ടിൽ നിന്നും മാറ്റിയ സ്വർണ്ണവും പണവും പോലീസ് കണ്ടെടുത്തു. നിരപരാധിയായ ഒരു ബന്ധുവിനെ കുടുക്കാൻ പോലീസിനെ തെറ്റിദ്ധരിപ്പിക്കുകയും വ്യാജ പരാതി നൽകുകയും ചെയ്ത കുറ്റത്തിനാണ് വിഴിഞ്ഞം പോലീസ് മനോജിനെ അറസ്റ്റ് ചെയ്തത്. കുടുംബകലഹം തീർക്കാൻ നിയമത്തെ ദുരുപയോഗം ചെയ്ത മനോജിന്റെ ഈ കവർച്ചാ നാടകം വിഴിഞ്ഞം പോലീസിന്റെ കൃത്യമായ ഇടപെടലിലൂടെ ഏതാനും മണിക്കൂറുകൾക്കുള്ളിൽ തന്നെ പൊളിയുകയായിരുന്നു.

പോലീസ്അന്വേഷണംപ്രതിഅറസ്റ്റ്

മറുനാടൻ മലയാളി ബ്യൂറോ