ഭർത്താവ് മരിച്ച ഷീബയുമായി ഫേസ്‌ബുക്കിലൂടെ ഒരു വർഷത്തെ പരിചയം; ഭാര്യയും കുട്ടിയുമുള്ള ശ്രീജിത്ത് ഷീബയെ വിളിച്ചു വരുത്തിയത് ഒരുമിച്ച് മരിക്കാൻ; യുവതി വിസമ്മതിച്ചപ്പോൾ കഴുത്തിൽ ഷാൾ മുറുക്കി കൊലപ്പെടുത്താനും ശ്രമം; ഗുളിക കഴിച്ച് അബോധാവസ്ഥയിലായ താൻ എണീറ്റപ്പോൾ കണ്ടത് ശ്രീജിത്തിന്റെ മൃതദേഹമെന്നും യുവതി; അടൂരിലെ ആത്മഹത്യയുടെ പിന്നാമ്പുറക്കഥ ഇങ്ങനെ
അടൂർ: ലോഡ്ജിൽ കാമുകിയുമായി മുറിയെടുത്ത യുവാവ് തൂങ്ങി മരിച്ച സംഭവത്തിൽ തെളിയുന്നത് സോഷ്യൽ മീഡിയ പ്രണയവും ആത്മഹത്യാ ശ്രമവും. കൊല്ലം കുന്നത്തൂർ പുത്തനമ്പലം ശ്രീനിലയത്തിൽ ശ്രീജിത്ത് (31) ആണ് മരിച്ചത്. ഒപ്പമുണ്ടായിരുന്ന തിരുവനന്തപുരം പേരൂർക്കട സ്വദേശിനി ഷീബാ ദാസ് കോട്ടയം മെഡിക്കൽ കോളജിൽ ചികിൽസയിലാണ്. ഇവർ അപകട നില തരണം ചെയ്തു.
അടൂർ കെഎസ്ആർടിസി ജങ്ഷനിലുള്ള നക്ഷത്ര ലോഡ്ജിൽ 107ാം നമ്പർ മുറിയിൽ ഇന്നലെ രാത്രി 9.15 നാണ് സംഭവം. 11 ന് രാവിലെ 10 നാണ് ഇരുവരും ഇവിടെ വന്ന് റൂം എടുത്തത്. ഇതേ ദിവസം തന്നെ ഷീബയെ കാണാനില്ലെന്ന് കാട്ടി ബന്ധുക്കളുടെ പരാതിയിൽ പേരൂർക്കട പൊലീസ് കേസ് രജിസ്റ്റർ ചെയ്തിരുന്നു.
ഒരു വർഷം മുൻപ് ഫേസ്‌ബുക്കിലൂടെയാണ് ശ്രീജിത്ത് ഷീബയെ പരിചയപ്പെടുന്നത്. അടൂർ നയനം തീയറ്ററിന് സമീപം അപ്ഹോൾസ്റ്ററി കടയിൽ ജീവനക്കാരനാണ് ശ്രീജിത്ത്. വിവാഹം കഴിച്ച് രണ്ടു കുട്ടികളുമുണ്ട്. ഭർത്താവ് മരിച്ചു പോയ ഷീബയ്ക്ക് ഒരു മകനുമുണ്ട്. കഴിഞ്ഞ ദിവസം ഷീബയെ വിളിച്ചു വരുത്തിയ ശ്രീജിത്ത് ഒരുമിച്ച് ജീവിക്കാം അല്ലെങ്കിൽ മരിക്കാമെന്ന് അറിയിക്കുകയായിരുന്നു.
ഷീബ ഇതിന് വിസമ്മതിച്ചപ്പോൾ ക്രൂരമായി മർദിച്ചു. കഴുത്തിൽ ഷാൾ മുറുക്കി കൊലപ്പെടുത്താനും ശ്രമിച്ചുവെന്ന് യുവതി പൊലീസിനോട് പറഞ്ഞു. എന്തോ ഗുളിക ഇവർ കഴിച്ചുവെന്നും പറയപ്പെടുന്നു. തുടർന്ന് താൻ അബോധാവസ്ഥയിലായെന്നും ബോധം വന്നപ്പോൾ ശ്രീജിത്ത് തൂങ്ങി നിൽക്കുന്നതാണ് കണ്ടതെന്നുമാണ് മൊഴി.
ഇന്നലെ രാത്രി ഒമ്പതു മണിയോടെ 107ാം നമ്പർ മുറിയിൽ നിന്ന് ബഹളം കേട്ടതിനെ തുടർന്ന് മാനേജർ ചെന്ന് നോക്കിയപ്പോഴാണ് റൂമിലെ ജനാലയിൽ ഒരു ഷാളിൽ ശ്രീജിത്തിനെ തൂങ്ങി മരിച്ച നിലയിൽ കണ്ടെത്തിയത്. യുവതി ചെവിയിൽ നിന്ന് ചോരയുമൊലിപ്പിച്ച് നിൽക്കുകയായിരുന്നു. അടൂർ ജനറൽ ആശുപത്രിയിൽ പ്രാഥമിക പരിശോധനയ്ക്ക് ശേഷം യുവതിയെ കോട്ടയം മെഡിക്കൽ കോളജിലേക്ക് മാറ്റുകയായിരുന്നു.
