സ്വകാര്യ ആരാധനാ കേന്ദ്രത്തിലെ സ്വത്ത് തര്‍ക്കം; ഉന്നത പോലീസ് ഉദ്യേഗസ്ഥര്‍ പത്ത് ലക്ഷം കൈപ്പറ്റിയെന്ന് ആരോപണം; ആഭ്യന്തരവകുപ്പ് അന്വേഷണം ആരംഭിച്ചു
തൃശ്ശൂര്‍: ഒരു സ്വകാര്യ ആരാധനാലയത്തിലെ സ്വത്തുതര്‍ക്കവുമായി ബന്ധപ്പെട്ട് ജില്ലയിലെ ഒരു ഉന്നത പോലീസ് ഉദ്യോഗസ്ഥന്‍ പത്ത് ലക്ഷം രൂപ കൈപ്പറ്റിയെന്ന ഗുരുതരമായ ആരോപണത്തെത്തുടര്‍ന്ന് ആഭ്യന്തരവകുപ്പ് അന്വേഷണം ആരംഭിച്ചു. തൃശ്ശൂര്‍ പെരിങ്ങോട്ടുകരയ്ക്കടുത്തുള്ള ആരാധനാലയമാണ് വിവാദത്തിന് അടിവരയാകുന്നത്.
സ്വത്തിന്റെ ഉടമസ്ഥതയെച്ചൊല്ലി അനക്കാനാകാത്ത വിധത്തില്‍ രണ്ടു വിഭാഗങ്ങള്‍ തമ്മില്‍ നീണ്ടുനില്‍ക്കുന്ന തര്‍ക്കം കഴിഞ്ഞ ദിവസങ്ങളിലായി കൈയാങ്കളിയിലേക്കും ആയുധം ഉപയോഗിച്ച ആക്രമണത്തിലേക്കുമെത്തിയിരുന്നു. ഇക്കാര്യത്തില്‍ ഇടപെട്ട തൃശ്ശൂര്‍ റൂറല്‍ പോലീസിലെ ഒരു ഉന്നത ഉദ്യോഗസ്ഥന്‍ ഒരു വിഭാഗത്തിങ്കല്‍ നിന്നും പത്തുലക്ഷം രൂപ കൈപ്പറ്റിയെന്നാണ് ആരോപണം. മറുവിഭാഗത്തെ നിഷ്‌ക്രിയമാക്കാനായിരുന്നുവത്രേ ഈ ഇടപെടല്‍.
സംഭവവുമായി ബന്ധപ്പെട്ട് പരാതി നല്‍കിയിരുന്നുവെങ്കിലും, കൈയാങ്കളിയും ആയുധം ഉപയോഗിച്ച ആക്രമണവും ഉണ്ടായിട്ടും പോലീസ് കേസ് രജിസ്റ്റര്‍ ചെയ്തില്ലെന്നതാണ് ഇപ്പോഴത്തെ പ്രധാന ആരോപണം. സംഭവ സ്ഥലം ഇപ്പോള്‍ പോലീസ് സേനയുടെ കനത്ത സുരക്ഷയിലാണ്.
ആരോപണത്തിന്റെ ഗൗരവം കണക്കിലെടുത്ത് പോലീസ് സ്‌പെഷ്യല്‍ ബ്രാഞ്ച് അര്‍ഹമായ അന്വേഷണവും നടത്തിയിരുന്നു. അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് ആഭ്യന്തരവകുപ്പ് ഇപ്പോള്‍ നടപടിയുമായി മുന്നോട്ടു പോകുന്നത്. അതേസമയം, ആരോപണ വിധേയനായ ഉദ്യോഗസ്ഥന്റെ നിലപാട് സംബന്ധിച്ച് ഔദ്യോഗിക പ്രതികരണം ലഭ്യമായിട്ടില്ല.
