വിവാഹ മോചിതയായ യുവതി സോഷ്യൽ മീഡിയയിൽ സജീവ സാന്നിധ്യം; കാണാതാകുന്നതിന് മുമ്പ് ചിലർക്ക് തിരിച്ചു കൊടുക്കാനുള്ള പണവുമായി ബന്ധപ്പെട്ട ചില ഇടപാടുകൾ നടത്തിയതിനും തെളിവ്; രണ്ടാം വിവാഹ നിശ്ചയത്തിന് അഞ്ചു നാൾ മുമ്പ് കാണാതായി; വീട്ടിന് അടുത്തുള്ള പൊട്ടക്കണറ്റിൽ മൃതദേഹവും; വെമ്പായത്തെ അനുജയുടെ മരണത്തിൽ ദുരൂഹത ഏറെ
തിരുവനന്തപുരം: വെമ്പായം വേറ്റിനാട് ആളൊഴിഞ്ഞ ഉപയോഗശൂന്യമായ കിണറ്റിൽനിന്നും യുവതിയുടെ മൃതദേഹം കണ്ടെടുക്കുമ്പോൾ ചർച്ചയാകുന്നത് ദുരൂഹത. കഴിഞ്ഞ മാസം 30ന് കാണാതായ വേറ്റിനാട് ചന്തയ്ക്കു സമീപം കുന്നും പുറത്ത് വീട്ടിൽ പത്മാവതിയുടെ മകൾ അനുജ (26)യുടെ മൃതദേഹമാണ് കണ്ടെത്തിയത്. വീട്ടിനടുത്തുള്ള ഇരുപത് അടിയോളം താഴ്ചയുള്ള കിണറ്റിൽ നിന്നാണ് മൃതദേഹം കണ്ടെത്തിയത്.
സോഷ്യൽ മീഡിയയിൽ സജീവമായിരുന്ന അനുജയ്ക്ക് നിരവധി സോഷ്യൽ മീഡിയ അക്കൗണ്ടുകൾ ഉണ്ടായിരുന്നു. അനുജയെ കാണാതായത് മുതൽ ഇത് കേന്ദ്രീകരിച്ചും സുഹൃത്തുക്കളെ കേന്ദ്രീകരിച്ചും പൊലീസ് അന്വേഷണം നടത്തിയിരുന്നു. കാണാതാകുന്നതിന് മുമ്പ് ചില സാമ്പത്തിക ഇടപാടുകൾ അനുജ നടത്തിയെന്ന് പൊലീസ് കണ്ടെത്തിയിരുന്നു . വിവാഹ മോചിതയായിരുന്ന അനുജയുടെ പുനർവിവാഹം ഈ മാസം 3ന് നിശ്ചയിച്ചിരുന്നു. ഇതിനിടയിലാണ് മൃതദേഹം കണ്ടെത്തിയത്. പോസ്റ്റ്‌മോർട്ടം നടപടികൾ നിർണ്ണായകമാകും.
ഓഗസ്റ്റ് 31-ന് അനുജയുടെ അമ്മ അനുജയെ കാണാനില്ലെന്ന് വട്ടപ്പാറ പൊലീസിൽ പരാതി നൽകിയിരുന്നു. നെടുമങ്ങാട് ഡിവൈഎസ്‌പിയുടെ നേതൃത്വത്തിൽ അനുജയെ കണ്ടെത്താൻ ഉള്ള അന്വേഷണവും നടന്നുവരികയായിരുന്നു. ഇതിനിടയിലാണ് ഇന്നലെ വൈകുന്നേരത്തോടെ വീടിനടുത്തുള്ള കിണറിൽ അനുജയുടെ മൃതദേഹം കണ്ടെത്തിയത്. തുടർന്ന് ഇന്ന് രാവിലെ പൊലീസും ഫയർഫോഴ്‌സും എത്തി മൃതദേഹം പുറത്തെടുക്കുകയായിരുന്നു.
മൃതദേഹം പൂർണമായും അഴുകിയ നിലയിലായിരുന്നു. ധരിച്ചിരുന്ന വസ്ത്രത്തിന്റെ അടിസ്ഥാനത്തിലാണു മൃതദേഹം അനുജയുടേത് എന്ന് മനസ്സിലാക്കിയത്. പോസ്റ്റുമോർട്ടം നടപടികൾക്കായി മൃതദേഹം തിരുവനന്തപുരം മെഡിക്കൽ കോളേജിലേക്കു കൊണ്ടുപോയി. പോസ്റ്റുമോർട്ടത്തിന് ശേഷമേ മറ്റ് കാര്യങ്ങൾ പറയാനാകു എന്ന് പൊലീസ് വ്യക്തമാക്കി. തുടർ അന്വേഷണവും പോസ്റ്റുമോർട്ടം റിപ്പോർട്ടിന്റെ അടിസ്ഥാനത്തിലാകും
പരാതിയുടെ അടിസ്ഥാനത്തിൽ പൊലീസ് അന്വേഷണം നടത്തിവരുകയായിരുന്നു. മിക്കവാറും ദിവസങ്ങളിൽ ഈ പ്രദേശങ്ങൾ പൊലീസ് സന്ദർശിക്കുന്നുണ്ടായിരുന്നു. വീടിനു സമീപത്തുള്ള ഉപയോഗശൂന്യമായ കിണറ്റിൽ പരിശോധന നടത്തുമ്പോഴാണ് മൃതദേഹം കണ്ടെത്തിയത്. വട്ടപ്പാറ പൊലീസും അഗ്നിരക്ഷാസേനയും ചേർന്നാണ് മൃതദേഹം കരയ്ക്കെടുത്തത്. പോസ്റ്റുമോർട്ടം നടപടികൾക്കായി മൃതദേഹം തിരുവനന്തപുരം മെഡിക്കൽ കോളേജിലേക്കു കൊണ്ടുപോയി. കഴിഞ്ഞ മാസം 30നാണ് അനൂജയെ കാണാതായത്. കാണാതായ അന്നുതന്നെ വട്ടപ്പാറ പൊലീസിൽ പരാതി നൽകിയിരുന്നു .
കാണാതാകുന്നതിന് മുമ്പ് ചിലർക്ക് തിരിച്ചു കൊടുക്കാനുള്ള പണവുമായി ബന്ധപ്പെട്ട ചില ഇടപാടുകൾ അനുജ നടത്തിയെന്ന് പൊലീസ് കണ്ടെത്തിയിരുന്നു . പോസ്റ്റ്‌മോർട്ടം വിവരങ്ങൾ പുറത്തുവന്ന ശേഷം വിശദമായ അന്വേഷണത്തിനൊരുങ്ങുകയാണ് പൊലീസ്.
