ഒരു കാറിനെ വിടാതെ ഫോളോ..ചെയ്യുന്ന യുവാക്കൾ; ചില്ലുകൾ അടിച്ചുതകർത്ത് മുഴുവൻ ഭീതി; പെട്ടെന്ന് റെയിൽ ക്രോസിംഗ് ഗേറ്റിന് മുന്നിലെത്തിയതും ആ ബോഡി ബിൽഡറെ കലി തീരുന്നതുവരെ അടിച്ചുനുറുക്കി; വേദന കൊണ്ട് പിടഞ്ഞ് ജീവൻ; എല്ലാത്തിനും കാരണം വിവാഹ വേദിയിലെ സെൽഫി എടുക്കലെന്ന് പോലീസ്

ചണ്ഡീഗഡ്: ഹരിയാനയിലെ ഭിവാനി ജില്ലയിൽ വിവാഹ ചടങ്ങിനിടെയുണ്ടായ തർക്കത്തെ തുടർന്ന് 26 വയസ്സുകാരനായ ബോഡി ബിൽഡറെ ഒരു സംഘം യുവാക്കൾ തല്ലിക്കൊന്നു. സ്ത്രീകളോട് മോശമായി പെരുമാറുകയും മോശം ഭാഷ ഉപയോഗിക്കുകയും ചെയ്തത് ചോദ്യം ചെയ്തതാണ് കൊലപാതകത്തിൽ കലാശിച്ചത്.

ഹുമയൂൺപൂർ ഗ്രാമത്തിലെ രോഹിത് ധൻഖർ എന്ന യുവാവാണ് ക്രൂരമായ ആക്രമണത്തിൽ കൊല്ലപ്പെട്ടത്. ജിം പരിശീലകനും ദേശീയ-സംസ്ഥാന തല ബോഡി ബിൽഡിംഗ് മത്സരങ്ങളിൽ നിരവധി മെഡലുകൾ നേടിയ താരവുമായിരുന്നു രോഹിത്.

വെള്ളിയാഴ്ച രാത്രിയാണ് സംഭവം. ഭിവാനിയിലെ ഒരു വിവാഹ വേദിയിൽ വെച്ച് സെൽഫിയെടുക്കുന്നതിനെ ചൊല്ലിയുള്ള തർക്കമാണ് കൊലപാതകത്തിന് തുടക്കമിട്ടതെന്ന് ഭിവാനി എസ്.എച്ച്.ഒ അറിയിച്ചു.

വിവാഹ സ്ഥലത്ത് ഒരു കൂട്ടം യുവാക്കൾ സെൽഫികൾ എടുക്കുന്നതിനിടെ, അതുവഴി കടന്നുപോകേണ്ട സ്ത്രീകൾക്ക് സൗകര്യത്തിനായി മാറിനിൽക്കാൻ രോഹിത് ധൻഖർ അവരോട് ആവശ്യപ്പെട്ടു. ഇതിനെ തുടർന്നാണ് യുവാക്കൾ രോഹിതുമായി തർക്കത്തിലേർപ്പെട്ടത്.

കൊല്ലപ്പെട്ട രോഹിതിൻ്റെ സുഹൃത്ത് ജതിൻ വെളിപ്പെടുത്തിയതനുസരിച്ച്, "പെൺകുട്ടികൾ ഉള്ള സമയത്ത് മോശം ഭാഷ ഉപയോഗിച്ച് സംസാരിക്കുന്നത് രോഹിത് ധൻഖർ ശക്തമായി എതിർത്തതാണ് അക്രമികളെ പ്രകോപിപ്പിച്ചത്." രോഹിതിൻ്റെ കുടുംബാംഗങ്ങളും സമാനമായ ആരോപണമാണ് ഉന്നയിച്ചത്; വിവാഹ ചടങ്ങിനിടെ സ്ത്രീകളെ അപമാനിക്കുന്നതും ഉപദ്രവിക്കുന്നതും തടഞ്ഞതിനാലാണ് രോഹിത് ആക്രമണത്തിന് ഇരയായതെന്നാണ് അവരുടെ വാദം.

തുടക്കത്തിൽ വിവാഹ വേദിയിൽ വെച്ച് വാക്കേറ്റവും ചെറിയ സംഘർഷവും ഉണ്ടായെങ്കിലും, കാര്യങ്ങൾ പിന്നീട് രക്തച്ചൊരിച്ചിലിലേക്ക് വഴിമാറുകയായിരുന്നു. തർക്കത്തിന് ശേഷം അക്രമിസംഘം രോഹിതും ജതിനും സഞ്ചരിച്ച കാറിനെ പിന്തുടർന്നു.

രോഹിതും സുഹൃത്തും യാത്ര ചെയ്ത കാറിൻ്റെ ചില്ലുകൾ ആദ്യം അക്രമികൾ തകർത്തു. തുടർന്ന് റെയിൽ ക്രോസിംഗ് ഗേറ്റിന് സമീപത്ത് വെച്ച് ഇവർ കാർ തടയുകയും, രോഹിതിനെ പുറത്തേക്ക് വലിച്ചിഴക്കുകയും ചെയ്തു. ഒരു ഡസനിലധികം വരുന്ന അക്രമികൾ ചേർന്ന് രോഹിതിനെ ക്രൂരമായി മർദ്ദിക്കുകയാണുണ്ടായത്. മർദ്ദനത്തിൽ ഗുരുതരമായി പരിക്കേറ്റ രോഹിത് സംഭവസ്ഥലത്തു വെച്ച് തന്നെ മരണപ്പെടുകയായിരുന്നു.

സംഭവവുമായി ബന്ധപ്പെട്ട് ഒരു ഡസനിലധികം ആളുകൾക്കെതിരെ പോലീസ് കൊലപാതക കേസ് രജിസ്റ്റർ ചെയ്തിട്ടുണ്ട്. പ്രതികൾ ഒളിവിലാണെന്നും, അവർക്കുവേണ്ടി തിരച്ചിൽ ഊർജ്ജിതമാക്കിയതായും എസ്.എച്ച്.ഒ അറിയിച്ചു.