ബൈക്കിന്റെ ഫുട്റെസ്റ്റിൽ കാൽചവിട്ടി നിന്നതിന്റെ പേരിൽ പ്ലസ്ടു വിദ്യാർത്ഥികളെ കുത്തിവീഴ്‌ത്തിയത് പേപ്പർ കട്ടിങ് കൊണ്ട്; ഒളിവിലായിരുന്ന ബി എസ് എൻ എൽ താൽക്കാലിക ജീവനക്കാരൻ അറസ്റ്റിൽ; കൂട്ടുപ്രതിക്കായി അന്വേഷണം
മല്ലപ്പള്ളി: ബൈക്കിന്റെ ഫുട്ട് റെസ്റ്റിൽ കാൽ ചവുട്ടി നിന്ന പ്ലസ് ടു വിദ്യാർത്ഥികളെ കുത്തി പരുക്കേൽപ്പിച്ച ശേഷം ഒളവിൽ പോയ പ്രതി പിടിയിൽ. കുന്നന്താനം വള്ളമല കാലായിൽ അഭിലാഷ് കുമാർ (39)ആണ് കീഴ്‌വായ്‌പ്പൂർ പൊലീസിന്റെ പിടിയിലായത്. ഇയാളുടെ സഹായി അനീഷ് ഒളിവിലാണ്. ഇരുവരും കുന്നന്താനം ബിഎസ്എൻഎൽ എക്സ്ചേഞ്ചിലെ താൽകാലിക ജീവനക്കാരാണ്. ശനിയാഴ്ച രാവിലെ 11.30 ന് കുന്നന്താനം ബി എസ് എൻ എൽ ഓഫീസിനു മുന്നിലാണ് സംഭവം.
ട്യൂഷൻ കഴിഞ്ഞ് വീട്ടിലേക്ക് മടങ്ങാൻ ബസ് കാത്തു നിന്ന കുട്ടികളെയാണ്കുത്തിയത്. കുന്നന്താനം എൻ.എസ്.എസ് എച്ച്.എസ്.എസ് വിദ്യാർത്ഥികളായ
വൈശാഖ്, എൽബിൻ എന്നിവർക്കാണ് കുത്തേറ്റത്. ഇവിടെ വച്ചിരുന്ന ബൈക്കിന്റെ ഫുട്ട് റെസ്റ്റിൽ കാൽ വച്ചുനിന്ന വൈശാഖിന്റെ അടുക്കലെത്തി അഭിലാഷ് കുമാർ അസഭ്യം വിളിക്കുകയും രണ്ടാം പ്രതി അനീഷ് വൈശാഖിന്റെ കൂട്ടുകാരനായ സുജിത്തിനെ പിടിച്ചുതള്ളുകയും ചെയ്തു.
അഭിലാഷ്, വൈശാഖിന്റെ മറ്റൊരു സുഹൃത്തായ എൽബിന് നേരേ കത്തി വീശുന്നതു കണ്ട്, പിടിച്ചു മാറ്റുന്നതിനിടയ്ക്കാണ് നെഞ്ചിനു കുത്തേറ്റത്. എൽബിന്റെ ഇടതു നെഞ്ചിലും കത്തികൊണ്ട് മുറിവുപറ്റി. സുജിത്തിന്റെ ഇടതു കൈക്കാണ് മുറിവേറ്റത്. വൈശാഖിന്റെ നെഞ്ചിൽ 17 തുന്നലിടേണ്ടി വന്നു. വൈശാഖ് പിന്നിലേക്ക് മാറിയതിനാൽ മുറിവ് ഗുരുതരമായില്ല.
സംഭവം കണ്ട് അടുത്ത കടയിലെ ബിബിൻ ഓടിയെത്തി അഭിലാഷിനെ പിടിച്ചു മാറ്റുകയായിരുന്നു. മറ്റ് കൂട്ടുകാർ ചേർന്ന് ഉടനെതന്നെ വിദ്യാർത്ഥികളെ മല്ലപ്പള്ളി താലൂക്ക് ആശുപത്രിയിൽ എത്തിച്ചു. തുടർന്ന് നടത്തിയ അന്വേഷണത്തിൽ കുന്നന്താനത്ത് നിന്നമാണ് അഭിലാഷിനെ പിടികൂടിയത്. ഇയാളുടെ പാന്റിന്റെ പോക്കറ്റിൽ നിന്നും കടലാസിൽ പൊതിഞ്ഞ നിലയിൽ കുത്താൻ ഉപയോഗിച്ച പേപ്പർ കട്ടിങ് കത്തി കണ്ടെടുത്തു.
രണ്ടാം പ്രതി അനീഷ് ഒളിവിലാണ്, ഇയാൾക്കായി പൊലീസ് തെരച്ചിൽ തുടരുകയാണ്. കീഴ്‌വായ്‌പ്പൂർ പൊലീസ് ഇൻസ്പെക്ടർ വിപിൻ ഗോപിനാഥിന്റെ നേതൃത്വത്തിലുള്ള അന്വേഷണസംഘത്തിൽ എസ് ഐ ആദർശ്, എ എസ് ഐ ഉണ്ണികൃഷ്ണൻ, എസ് സി പി ഒ അൻസിം, സി പി ഓമാരായ ടോജോ, ജെയ്സൺ എന്നിവരാണ് ഉണ്ടായിരുന്നത്.
