വർക്ക്ഷോപ്പ് മെക്കാനിക്ക് ബൈക്ക് മോഷ്ടിച്ചു; കൈയിൽ കിട്ടിയ പാടേ പൾസർ ബൈക്ക് കഷണങ്ങളാക്കി പലയിടത്ത് വിറ്റഴിച്ചു; സിസിടിവി ദൃശ്യങ്ങൾ പിന്തുടർന്ന് പ്രതി കസ്റ്റഡിയിൽ; ബൈക്കിന്റെ കഷണങ്ങൾ പല ഭാഗത്ത് നിന്ന് കണ്ടെടുത്തു

പത്തനംതിട്ട: വർക്ക്ഷോപ്പ് മെക്കാനിക്ക് ബൈക്ക് മോഷ്ടിച്ചാൽ ഇങ്ങനെയിരിക്കും. നിസാരമായി മോഷ്ടിച്ചെടുത്ത ബൈക്ക് കഷണങ്ങളാക്കി പലയിടത്തായി വിറ്റഴിച്ചു. നല്ലൊന്നാന്തരം പൾസർ ബൈക്ക് കിട്ടിയതാകട്ടെ പാർട്സ് പാർട്സായി.

ഇലന്തൂർ പരിയാരം അംബേദ്കർ കോളനി മഞ്ജുഷ് ഭവനിൽ മഞ്ജുഷിനെ(32)യാണ് ആറന്മുള പൊലീസ് അറസ്റ്റ് ചെയ്തത്. കോഴഞ്ചേരി തെക്കേമല സെൻട്രൽ ബാങ്കിന് സമീപമുള്ള ട്രഷറിയിലെ ഗാർഡിന്റെ ബൈക്കാണ് മഞ്ജുഷ് വിദഗ്ധമായി മോഷ്ടിച്ചത്. കേസിൽഇയാൾ പിടിയിലായെങ്കിലും ബൈക്ക് കഷണങ്ങളാക്കി ആക്രിക്കടകൾക്കും ചെറുകിട വർക്ക്‌ഷോപ്പുകൾക്കും കൈമാറിയിരുന്നു.

ആറന്മുള പൊലീസ് സ്റ്റേഷൻ പരിധിയിൽ കോഴഞ്ചേരി തെക്കേമല ജങ്ഷനിൽ സെൻട്രൽ ബാങ്ക് ഓഫ് ഇന്ത്യയുടെ മുൻവശത്ത് നിന്നും കഴിഞ്ഞ നാലിന് വൈകിട്ട് ആറിനാണ് ഗാർഡ് ഡ്യൂട്ടിയിലുള്ള ഉദ്യോഗസ്ഥന്റെ പൾസർ ബൈക്ക് വളരെ കൂളായി ലോക്ക് പൊട്ടിച്ച് എടുത്തു കൊണ്ട് പോയത്. സിസി ടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെക്കുറിച്ച് വിവരം ലഭിച്ചത്. ഇയാളെ കസ്റ്റഡിയിൽ എടുത്തപ്പോൾ മോഷ്ടിച്ച ബൈക്ക്പല ഭാഗങ്ങളാക്കി പത്തനംതിട്ടയിലും ഇലന്തൂർ, തെക്കേമല, തുടങ്ങിയ സ്ഥലങ്ങളിൽ കൊടുത്തതായി മൊഴി നൽകി. വാഹനത്തിന്റെ ഭാഗങ്ങൾ ഇവിടങ്ങളിൽ നിന്നും കണ്ടെടുത്തു.

നാരങ്ങാനത്ത് ടൂ വീലർ വർക്ക് ഷോപ്പ് നടത്തിയിരുന്ന പ്രതി ബൈക്ക് വിദഗ്ധമായി കടത്തിയ ശേഷം അഴിച്ച് ഭാഗങ്ങളാക്കുകയായിരുന്നു. അറസ്റ്റ്  ചെയ്ത പ്രതിയെ പത്തനംതിട്ട കോടതിയിൽ ഹാജരാക്കി ജില്ലാ പൊലീസ് മേധാവി സ്വപ്നൽ മഹാജന്റെ നിർദ്ദേശപ്രകാരം.
ഡിവൈ.എസ്‌പി എസ്. നന്ദകുമാറിന്റെ മേൽനോട്ടത്തിൽ ആറന്മുള പൊലീസ് സ്റ്റേഷൻ ഇൻസ്പെക്ടർ സി.കെ.മനോജ്, എസ്‌ഐ ജോൺസൺ, സി പി ഓ മാരായ നിതീഷ്, സഞ്ജയൻ , രാജഗോപാൽ, ജിതിൻ ഗബ്രിയേൽ , അഖിൽ ഫൈസൽ, സുനിൽ, സൈഫുദ്ദീൻ, എന്നിവരടങ്ങിയ സംഘമാണ് ശാസ്ത്രീയമായ അന്വേഷണം നടത്തി പ്രതിയെ പിടികൂടിയത്.