പോക്‌സോ കേസില്‍ പെടുത്തി കുടുംബം നശിപ്പിക്കും എന്ന് ഭീഷണി; 10 ലക്ഷം രൂപ തട്ടിയെടുത്തു; തിരൂരില്‍ ഡപ്യൂട്ടി തഹസില്‍ദാരെ കാണാതായ സംഭവത്തില്‍ മൂന്നുപേര്‍ കസ്റ്റഡിയില്‍; മാനസിക പ്രയാസത്തില്‍ ചാലിബ് വീടുവിട്ടുപോകാന്‍ കാരണം ഇങ്ങനെ
തിരൂരില്‍ ഡപ്യൂട്ടി തഹസില്‍ദാരെ കാണാതായ സംഭവത്തില്‍ മൂന്നുപേര്‍ കസ്റ്റഡിയില്‍
മലപ്പുറം: തിരൂരില്‍ ഡപ്യൂട്ടി തഹസില്‍ദാരെ കാണായ സംഭവത്തില്‍ കൂടുതല്‍ വിവരങ്ങള്‍ പുറത്ത്. മൂന്നുപേരെ തിരൂര്‍ പൊലീസ് കസ്റ്റഡിയില്‍ എടുത്തു. തിരോധാനത്തിന് പിന്നില്‍ ബ്ലാക്‌മെയിലിങ് എന്ന് പൊലീസ് വ്യക്തമാക്കി
ഷഫീഖ്, (35)ഫൈസല്‍, (43) അജ്മല്‍( 37) എന്നിവരാണ് പിടിയിലായത്. പോക്‌സോ കേസില്‍ പെടുത്തി കുടുംബം നശിപ്പിക്കും എന്ന് ഇവര്‍ ഡപ്യൂട്ടി തഹസില്‍ദാര്‍ ചാലിബ് പി ബിയെ ഭീഷണിപ്പെടുത്തി. 10 ലക്ഷം രൂപ പ്രതികള്‍ തട്ടിയെടുത്തതായും പറയുന്നു.
തിരൂര്‍ ഡപ്യൂട്ടി തഹസില്‍ദാര്‍ തിരൂര്‍ മാങ്ങാട്ടിരി സ്വദേശി ചാലിബ് പി ബി ബുധനാഴ്ച മാനസിക പ്രയാസത്തില്‍ വീടുവിട്ടുപോയതെന്നാണ് കഴിഞ്ഞ ദിവസം ഫോണില്‍ വിളിച്ച് ഭാര്യയോട് പറഞ്ഞത്. ചാലിബിനെ ബുധനാഴ്ച്ച വൈകിട്ട് മുതലാണ് കാണാതായത്. മൊബൈല്‍ ടവര്‍ ലൊക്കേഷന്‍ കര്‍ണാടകയിലെ ഉഡുപ്പി കാണിക്കുന്നതിനാല്‍ അന്വേഷണം കര്‍ണാടകയിലേക്കും വ്യാപിപ്പിച്ചിരുന്നു.
വൈകീട്ട് ഓഫീസില്‍ നിന്നും ഇറങ്ങിയ ശേഷം വൈകുമെന്ന വിവരം വീട്ടുകാര്‍ക്ക് നില്‍കിരുന്നു. ഏറെ സമയം കഴിഞ്ഞിട്ടും കാണാതായതിനെ തുടര്‍ന്നാണ് വീട്ടുകാര്‍ തിരൂര്‍ പൊലീസില്‍ പരാതി നല്‍കിയത്. മൊബൈല്‍ ടവര്‍ ലൊക്കേഷന്‍ ആദ്യം കോഴിക്കോടും പിന്നീട് കര്‍ണാടകയിലെ ഉഡുപ്പിയിലുമാണ് കാണിച്ചത്. പുലര്‍ച്ചെ 02.02 വരെ ഓണായ ഫോണ്‍ പിന്നീട് ഓഫായി. എടിഎമ്മില്‍ നിന്ന് പതിനായിരം രൂപ പിന്‍വലിച്ചതായും പൊലീസ് കണ്ടെത്തി. ഇതിന് പിന്നാലെയാണ് കര്‍ണ്ണാടകയിലുണ്ടെന്ന സൂചനകള്‍ ലഭിച്ചത്. കൃത്യസമയത്ത് പരാതി കിട്ടിയതും നവീന്‍ ബാബു ആത്മഹത്യാ കേസ് മുന്നിലുളളതും പോലീസിന് തിരിച്ചറിവായി.
കരുതലോടെ അന്വേഷണവും നടത്തി. ഇതിനിടെയാണ് ചാലിബിനെ കുറിച്ചുളള വിവരവും കിട്ടിയത്. കോഴിക്കോട് മാമി തിരോധാന കേസില്‍ പോലീസ് തുടക്കത്തല്‍ വേണ്ടത്ര കരുതല്‍ എടുത്തില്ല. ഇത് വിവാദമായി. ഈ സാഹചര്യത്തിലാണ് ചാലിബിന് വേണ്ടി അതിവേഗ അന്വേഷണം നടത്തിയത്.
കണ്ണൂര്‍ എഡിഎം ആയിരുന്ന നവീന്‍ ബാബുവിനെ പോലെ സത്യസന്ധനായ നിലപാടുകള്‍ എടുക്കുന്ന വ്യക്തിയായിരുന്നു ചാലിബ്. നിരവധി ശത്രുക്കളും ഉണ്ട്. അതുകൊണ്ടു തന്നെ എന്താണ് സംഭവിച്ചതെന്നത് ദുരൂഹതയായി മാറി. ഓഫീസില്‍ നിന്ന് വൈകിട്ട് അഞ്ചേകാലോടെ ഇറങ്ങിയതായി സഹപ്രവര്‍ത്തകര്‍ അറിയിച്ചു. അതിനുശേഷം ഭാര്യ വിളിച്ചപ്പോള്‍ തിരിച്ചെത്താന്‍ വൈകും എന്ന് അറിയിച്ചിരുന്നു. പിന്നീട് വാട്സാപ്പില്‍ വളാഞ്ചേരി ഇരിമ്പിളിയത്ത് ഒരു റെയ്ഡ് ഉണ്ടെന്നും കൂടെ പോലീസ്, എക്‌സൈസ് ടീം ഉണ്ടെന്നും പറഞ്ഞിരുന്നു. രാത്രി 11 വരെ കാണാത്തതിനെത്തുടര്‍ന്ന് ബന്ധുക്കള്‍ തിരൂര്‍ പോലീസ് സ്റ്റേഷനില്‍ പരാതി നല്‍കി.
പിന്നീട് കൂടുതല്‍ വിവരങ്ങള്‍ ലഭ്യമായില്ല. ഇതോടെ ആശങ്ക കൂട്ടി. ഇതിന് പരിഹാരമെന്നോണമാണ് ചാലുബ് ഫോണില്‍ ഭാര്യയെ വിളിച്ചത്. ദേശീയപാത മണ്ണെടുപ്പ് പ്രശ്‌നത്തില്‍ ഇരിമ്പിളിയത്ത് ഇദ്ദേഹം സര്‍വേക്ക് പോയിരുന്നു. ബുധനാഴ്ച വൈകിട്ട് ഓഫിസില്‍ നിന്ന് ഇറങ്ങിയ ചാലിബ്, വീട്ടിലെത്താന്‍ വൈകുമെന്ന് ഭാര്യയെ അറിയിച്ചിരുന്നു. 8 മണിയോടെ വീണ്ടും അന്വേഷിച്ചപ്പോള്‍ വളാഞ്ചേരി ഭാഗത്താണെന്നും പരിശോധനയുള്ളതിനാല്‍ വീട്ടിലെത്താന്‍ വൈകുമെന്നും മെസേജ് അയക്കുകയായിരുന്നു. പിന്നീട് വിളിച്ചപ്പോഴൊന്നും ചാലിബിനെ ഫോണില്‍ കിട്ടിയില്ല. കണ്ടെത്താന്‍ സാധിക്കാതെ വന്നതോടെ പൊലീസില്‍ പരാതി നല്‍കി.
