മോഷ്ണം പോയ സ്വര്‍ണം കണ്ടെത്തിയത് വീടിനോട് ചേര്‍ന്നുള്ള തോട്ടത്തിനുള്ളില്‍നിന്ന്; സ്വര്‍ണം തുണിസഞ്ചിയില്‍ പൊതിഞ്ഞ നിലയില്‍; വിരലടയാള പരിശോധനയില്‍ ആറുപേരുടെ വിരലടയാളങ്ങള്‍ ശേഖരിച്ചു; പ്രതികളെ ഉടന്‍ പിടിക്കുമെന്ന് പോലീസ്
കരിവെള്ളൂര്‍: വിവാഹവീട്ടില്‍ നിന്നു മോഷണം പോയ സ്വര്‍ണാഭരണങ്ങള്‍ പോലീസ് കണ്ടെത്തു. 30 പവനോളം വരുന്ന സ്വര്‍ണം വീടിന്റെ അടുത്ത് ഉപേക്ഷിച്ച നിലയിലാണ് കണ്ടെത്തിയത്. പലിയേരിയിലെ ചൂരക്കാട്ട് മനോഹരന്റെ മകന്‍ അര്‍ജുനന്റെ ഭാര്യ ആര്‍ച്ചയുടെ ആഭരണങ്ങളാണ് വീടിനോട് ചേര്‍ന്ന് തെക്കുവശത്തുള്ള തോട്ടത്തിനരികില്‍ തുണിസഞ്ചിയില്‍ പൊതിയപ്പെട്ട നിലയില്‍ കണ്ടെത്തിയത്.
മേയ് ഒന്നിന് നടന്ന വിവാഹത്തിന് ശേഷം അടുത്ത ദിവസം ബന്ധുക്കള്‍ക്ക് കാണിക്കാനായി അലമാര തുറന്നപ്പോഴാണ് ആഭരണങ്ങള്‍ കാണാതായതായി വീട്ടുകാര്‍ തിരിച്ചറിയുന്നത്. തുടര്‍ന്ന് പയ്യന്നൂര്‍ പോലീസ് കേസ് എടുത്ത് അന്വേഷണം ആരംഭിച്ചിരുന്നു. പ്രാഥമിക നിഗമനമനുസരിച്ച്, മേയ് ഒന്നിനുതന്നെ കവര്‍ച്ച നടന്നതായാണ് പോലീസ് സൂചന.
പയ്യന്നൂര്‍ പോലീസ് സ്റ്റേഷനിലെ സബ് ഇന്‍സ്പെക്ടര്‍മാരായ കെ. മനോജ് കുമാര്‍, പി. യദുകൃഷ്ണന്‍ എന്നിവരുടെ നേതൃത്വത്തില്‍ ബുധനാഴ്ച രാവിലെ 11 മണിയോടെ നടത്തിയ പരിശോധനയ്ക്കിടെ വീടിന്റെ ചുറ്റുപാടില്‍ നടത്തിയ അന്വേഷണത്തിലാണ് ആഭരണങ്ങള്‍ കണ്ടെടുത്തത്. ഒന്‍പത് വളകള്‍, നാല് മാലകള്‍, ബ്രേസ്ലറ്റ്, മോതിരം എന്നിവ അടങ്ങിയ തുണിസഞ്ചിയാണ് കണ്ടെത്തിയത്. നഷ്ടമായ മുഴുവന്‍ ആഭരണങ്ങളും തിരികെ ലഭിച്ചു.
കേസുമായി ബന്ധപ്പെട്ട് അന്വേഷിച്ച വിരലടയാള പരിശോധനയില്‍ ആറുപേരുടെ വിരലടയാളങ്ങള്‍ പോലീസ് ശേഖരിച്ചു. ഇവയുടെ അടിസ്ഥാനത്തില്‍ അന്വേഷണം മുന്നോട്ടുപോകുകയാണെന്നും കുറ്റവാളികളെ ഉടന്‍ പിടികൂടാനാകുമെന്നും പോലീസ് അറിയിച്ചു. കണ്ടെത്തിയ ആഭരണങ്ങള്‍ പയ്യന്നൂര്‍ ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരാക്കും. കേസ് നഷ്ടപരിഹാരമൊന്നും ഇല്ലാതെ അവസാനിപ്പിക്കില്ലെന്നും നടപടികള്‍ ശക്തമാകുമെന്നും അന്വേഷണ സംഘം വ്യക്തമാക്കി.
സ്‌പെഷ്യല്‍ ബ്രാഞ്ച് എസ്ഐ കെ.വി. മനോജന്‍, കെ. രാഗേഷ്, എ.ജി. ജബ്ബാര്‍, കെ. പ്രമോദ് എന്നിവര്‍ അന്വേഷണ സംഘത്തിലുണ്ടായിരുന്നു.
