തിരുച്ചിറപ്പള്ളി-ചെന്നൈ ദേശീയപാതയില്‍ വന്‍ കവര്‍ച്ച; കവര്‍ന്നത് 1250 പവന്‍ സ്വര്‍ണം; സംഭവം ആഭരണങ്ങള്‍ സംസ്ഥാനത്തെ വിവിധ ജ്വല്ലറികളിലേക്ക് വിതരണം ചെയ്ത ശേഷം ബാക്കി സ്വര്‍ണവുമായി തിരികെ പോകുമ്പോള്‍
ചെന്നൈ: തിരുച്ചിറപ്പള്ളി-ചെന്നൈ ദേശീയപാതയില്‍ നടന്ന വന്‍ കവര്‍ച്ചയില്‍ 1250 പവന്‍ സ്വര്‍ണാഭരണങ്ങള്‍ കവര്‍ന്നു. ചെന്നൈ ആസ്ഥാനമായ ആര്‍കെ ജ്വല്ലറിയുടെ മാനേജരും ജീവനക്കാരും സഞ്ചരിച്ച വാഹനമാണ് ലക്ഷ്യമിട്ടത്. ആഭരണങ്ങള്‍ സംസ്ഥാനത്തെ വിവിധ ജ്വല്ലറികളിലേക്ക് വിതരണം ചെയ്ത ശേഷം ബാക്കി സ്വര്‍ണവുമായി മടങ്ങുമ്പോഴായിരുന്നു സംഭവം.
പോലീസ് നല്‍കുന്ന വിവരങ്ങള്‍ പ്രകാരം, സംഘം സമയപുരത്തിന് സമീപം വാഹനം നിര്‍ത്തി വിശ്രമിക്കുകയായിരുന്ന ജീവനക്കാരെ ആക്രമിച്ച് സ്വര്‍ണം കവര്‍ന്നു. മുകളുപൊടി എറിഞ്ഞ് ജീവനക്കാരെ തളര്‍ത്തിയ ശേഷമാണ് ആക്രമണം നടന്നത്. സ്വര്‍ണത്തിന്റെ വലിയൊരു ഭാഗം കവര്‍ന്ന സംഘം സ്ഥലത്ത് നിന്ന് വേഗത്തില്‍ രക്ഷപ്പെട്ടു.
ആക്രമണത്തില്‍ മാനേജര്‍ ഉള്‍പ്പെടെ ചിലര്‍ക്ക് പരിക്കേറ്റതായാണ് വിവരം. ഇവരെ സമീപത്തെ ആശുപത്രിയില്‍ പ്രവേശിപ്പിച്ചു. സംഭവത്തെ തുടര്‍ന്ന് പ്രദേശത്ത് ശക്തമായ പൊലീസ് പരിശോധന നടന്നു. ദേശീയപാതയിലൂടെ സിസിടിവി ദൃശ്യങ്ങള്‍ ശേഖരിച്ച് സംഘം രക്ഷപ്പെട്ട വഴി കണ്ടെത്താന്‍ ശ്രമിക്കുന്നതായും പൊലീസ് അറിയിച്ചു.
മാനേജര്‍ ഉടന്‍ സമയപുരം പൊലീസ് സ്റ്റേഷനില്‍ പരാതി നല്‍കിയതിനെ തുടര്‍ന്ന് കേസ് രജിസ്റ്റര്‍ ചെയ്തു. കുറ്റവാളികളെ പിടികൂടുന്നതിനായി നാല് പ്രത്യേക അന്വേഷണ സംഘങ്ങളെ രൂപീകരിച്ചിട്ടുണ്ടെന്ന് പൊലീസ് അറിയിച്ചു. സമീപ ജില്ലകളിലേക്കുള്ള അതിര്‍ത്തികളിലും പരിശോധന ശക്തമാക്കിയിട്ടുണ്ട്.
സംഭവം ആഭരണവ്യാപാര മേഖലയില്‍ വലിയ ആശങ്ക സൃഷ്ടിച്ചിരിക്കുകയാണ്. സമാനമായ രീതിയില്‍ കഴിഞ്ഞ മാസങ്ങളിലും ആക്രമണങ്ങള്‍ നടന്നിരുന്നു. ആഭരണങ്ങളുടെ സുരക്ഷ ഉറപ്പാക്കാന്‍ പ്രത്യേക മാര്‍ഗരേഖ രൂപീകരിക്കേണ്ടതുണ്ടെന്ന ആവശ്യം വ്യാപാരികള്‍ ഉയര്‍ത്തിയിട്ടുണ്ട്. പോലീസ് വിവിധ കോണുകളില്‍ നിന്ന് അന്വേഷണം ശക്തമാക്കിയിരിക്കുകയാണെന്നും ഉടന്‍ തന്നെ പ്രതികളെ പിടികൂടുമെന്ന വിശ്വാസമുണ്ടെന്നും അന്വേഷണ സംഘം അറിയിച്ചു.
