സ്വകാര്യ ലാബില്‍ ഡോക്ടറുടെ പേരില്‍ വ്യാജ പരിശോധനാ റിപ്പോര്‍ട്ട്; സംശയം തോന്നിയതോടെ പോലിസില്‍ അറിയിച്ച് ഡോക്ടര്‍മാരുള്‍പ്പെടെയുള്ളവര്‍: സ്ഥാപന ഉടമയും റേഡിയോളജിസ്റ്റും അറസ്റ്റില്‍
സ്വകാര്യ ലാബില്‍ ഡോക്ടറുടെ പേരില്‍ വ്യാജ പരിശോധനാ റിപ്പോര്‍ട്ട്; സ്ഥാപന ഉടമയും റേഡിയോളജിസ്റ്റും അറസ്റ്റില്‍
പാലാ: ഡോക്ടറുടെ പേരില്‍ വ്യാജ പരിശോധനാ റിപ്പോര്‍ട്ട് തയ്യാറാക്കി നല്‍കിയ സ്വകാര്യ ക്ലിനിക്കല്‍ ലാബിലെ റേഡിയോളജസിറ്റും സ്ഥാപന ഉടമയും അറസ്റ്റില്‍. റേഡിയോളജി വിഭാഗം ഡോക്ടറുടെ പേരില്‍ വ്യാജമായി പരിശോധനാ റിപ്പോര്‍ട്ട് തയാറാക്കി നല്‍കി പോന്ന കേസിലാണ് ടെക്‌നിഷ്യനെയും സ്ഥാപനയുടമയേയും പൊലീസ് പിടികൂടിയത്. പരിശോധന റിപ്പോര്ട്ടില് ഡോക്ടര്‍മാര്‍ക്ക് തോന്നിയ സംശയമാണ് അറസ്റ്റിലേക്ക് നയിച്ചത്.
ജനറല്‍ ആശുപത്രിക്കു സമീപം പ്രവര്‍ത്തിക്കുന്ന മോഡേണ്‍ ഡയഗ്‌നോസ്റ്റിക് സെന്ററിലെ റേഡിയോളജിസ്റ്റായ കാണക്കാരി എബിഭവനില്‍ എം.എബി (49), ഉടമ ഇടനാട് മങ്ങാട്ട് റെനി സജി ജോണ്‍ (52) എന്നിവരെയാണ് എസ്‌ഐ വി.എല്‍.ബിനുവിന്റെ നേതൃത്വത്തില്‍ അറസ്റ്റ് ചെയ്തത്. ഇരുവരും ചേര്‍ന്ന് സ്ഥാപനത്തില്‍ ഒരു ഡോക്ടറുടെ ബോര്‍ഡ് വച്ച് ഏഴു മാസമായി വ്യാജ പരിശോധന റിപ്പോര്‍ട്ട് തയാറാക്കി നല്‍കി വരികയായിരുന്നുവെന്നും പൊലീസ് പറഞ്ഞു.
ക്ലിനിക്കില്‍ പരിശോധനയ്ക്ക് എത്തുന്നവര്‍ക്ക് ഡോക്ടറുടെ പേരിലുള്ള കുറിപ്പ് തയാറാക്കി നല്‍കിയിരുന്നതു റേഡിയോളജി വിഭാഗം ജീവനക്കാരനായ എബിയായിരുന്നു എന്നു പൊലീസ് പറഞ്ഞു. പരിശോധനാ റിപ്പോര്ട്ടില് സംശയം തോന്നിയ ഡോക്ടര്‍മാര്‍ ഉള്‍പ്പെടെയുള്ളവരില്‍നിന്ന് പാലാ ഡിവൈഎസ്പി കെ.സദനു ലഭിച്ച രഹസ്യവിവരത്തെ തുടര്‍ന്ന് ഇന്നലെ വൈകിട്ട് സ്ഥാപനത്തില്‍ റെയ്ഡ് നടത്തുകയായിരുന്നു.
