അളിയാ...വണ്ടി ഒന്ന് തരാമോ..മാഹി വരെ പോകണം; എന്തിനാ..എന്ന ചോദ്യത്തിൽ വെള്ളമടി തന്നെ പ്ലാൻ എന്ന് മറുപടി; ബൈക്ക് താരാൻ പറ്റില്ല എന്ന് പറഞ്ഞത് ഇഷ്ടമായില്ല; രാത്രി ഇയാൾ ഒളിച്ചിരുന്ന് ചെയ്തത്; നിലവിളി കേട്ട് നാട്ടുകാർ ഓടിയെത്തിയപ്പോൾ കണ്ടത്

കോഴിക്കോട്: മാഹിയിൽ പോയി മദ്യപിക്കാൻ ബൈക്ക് നൽകാത്തതിന്റെ പേരിൽ യുവാവിനെ ഇരുമ്പ് പൈപ്പ് കൊണ്ടും മറ്റ് ആയുധങ്ങൾ ഉപയോഗിച്ചും ക്രൂരമായി മർദ്ദിച്ച കേസിൽ ഒരാളെ ചോമ്പാല പോലീസ് അറസ്റ്റ് ചെയ്തു. കോഴിക്കോട് അഴിയൂർ കോറോത്ത് റോഡ് ആശാരിത്താഴ കുനിയിൽ അൻജിത്ത് (25) ആണ് പിടിയിലായത്. സംഭവവുമായി ബന്ധപ്പെട്ട് ഇയാളുടെ സുഹൃത്തായ മുഹമ്മദ് അലി റിഹാനെയും പോലീസ് തിരയുന്നുണ്ട്.

കഴിഞ്ഞ ജൂലൈ മാസത്തിൽ നടന്ന സംഭവത്തിൽ, അൻജിത്തും മുഹമ്മദ് അലി റിഹാനും ചേർന്ന് അഴിയൂർ കോറോത്ത് റോഡിലെ യുവാവിനോട് മാഹിയിൽ പോയി മദ്യപിക്കാനായി ബൈക്ക് ആവശ്യപ്പെടുകയായിരുന്നു. എന്നാൽ യുവാവ് ഇതിന് തയ്യാറാകാതിരുന്നതോടെ ഇവർ പ്രകോപിതരായി. ബൈക്ക് നൽകാത്തതിലുള്ള വൈരാഗ്യത്തിൽ, വഴിയിൽ ഒളിച്ചിരുന്ന് യുവാവിനെ ഇരുവരും ചേർന്ന് ഇരുമ്പ് കട്ടയും ഇരുമ്പ് പൈപ്പ് ഉൾപ്പെടെയുള്ള ആയുധങ്ങൾ ഉപയോഗിച്ച് ക്രൂരമായി മർദ്ദിച്ചു.

ഈ അക്രമത്തിൽ യുവാവിന് തലയ്ക്കും കാലിനും ഗുരുതരമായ പരിക്കുകൾ ഏൽക്കുകയും കണ്ണൂരിലെ ഒരു സ്വകാര്യ ആശുപത്രിയിൽ ശസ്ത്രക്രിയക്ക് വിധേയനാകേണ്ടി വരികയും ചെയ്തു. പോലീസ് അന്വേഷണം ആരംഭിച്ചതോടെ പ്രതിയായ അൻജിത്ത് ആന്ധ്രപ്രദേശിലേക്ക് കടന്നുകളഞ്ഞിരുന്നു. എന്നാൽ ഇയാൾ നാട്ടിലെത്തിയതായി വിവരം ലഭിച്ചതിനെ തുടർന്ന് പോലീസ് നടത്തിയ തിരച്ചിലിലാണ് ഇയാൾ പിടിയിലായത്.

ചോമ്പാല പോലീസ് സ്റ്റേഷനിലെ എഎസ്ഐ പ്രവീൺ കുമാർ, സീനിയർ സിവിൽ പോലീസ് ഓഫീസർ വി.കെ. ഷമീർ, സിവിൽ പോലീസ് ഓഫീസർ സന്ധ്യ എന്നിവരടങ്ങുന്ന സംഘമാണ് പ്രതിയെ പിടികൂടിയത്. കേസിൽ കൂടുതൽ അന്വേഷണം പുരോഗമിക്കുകയാണ്.