അസം സ്വദേശിനിയായ മായ ഗൊഗോയി വ്‌ലോഗര്‍; കണ്ണൂരുകാരന്‍ ആരവുമായി കുറച്ചുനാളായി അടുപ്പത്തില്‍; നഗരത്തിലെ സര്‍വീസ് അപ്പാര്ട്ട്മെന്റില് ഇരുവരും ഒരുമിച്ചെത്തിയ സി സി ടിവി ദൃശ്യങ്ങളും പുറത്ത്; കൊല്ലപ്പെട്ട യുവതിയുടെ നെഞ്ചില്‍ ഒന്നിലധികം തവണ കുത്തേറ്റു; ആരവിരായി കണ്ണൂരിലേക്ക് ബംഗളുരു പോലീസിന്റെ പരിശോധന
അസം സ്വദേശിയായ മായ ഗൊഗോയി വ്‌ലോഗര്‍
ബെംഗളൂരു: ബംഗളുരു നഗരത്തിലെ സര്‍വീസ് അപ്പാര്ട്ട്മെന്റില് അസം സ്വദേശിയായ യുവതിയെ കൊല്ലപ്പെട്ട നിലയില്‍ കണ്ടെത്തിയ സംഭവത്തില്‍ കൊലയാളിയെന്ന് സംശയിക്കുന്ന യുവാവിനെ കണ്ടെത്താനായി തിരച്ചില്‍ ഊര്‍ജ്ജിതമാക്കി ബംഗളുരു പോലീസ്. ബെംഗളൂരുവിലെ സ്വകാര്യ കമ്പനിയില്‍ ജീവനക്കാരിയായ മായ ഗൊഗോയി(25)യെയാണ് ഇന്ദിരാനഗറിലെ സര്‍വീസ് അപ്പാര്ട്ട്മെന്റില് കൊല്ലപ്പെട്ട നിലയില്‍ കണ്ടെത്തിയത്. വ്‌ലോഗര്‍ കൂടിയാണ് യുവതി.
യുവതിയെ കൊലപ്പെടുത്തിയത് ആണ്‍സുഹൃത്താണെന്നാണ് പോലീസ് പറയുന്നത്. കണ്ണൂര്‍ സ്വദേശിയായ ആരവ് കുറച്ചുകാലമായി യുവതിമായി അടുപ്പത്തിലായിരുന്നു. സാഹചര്യ തെളിവുകളില്‍ നിന്നും ആരവ് തന്നെയാണ് കൊലപാതകത്തിന് പിന്നിലെന്നാണ് പോലീസിന്റെ സംശയം. സംഭവത്തിന് പിന്നാലെ അപ്പാര്‍ട്ട്മെന്റില്‍നിന്ന് കാണാതായ ഇയാള്‍ക്കായി പോലീസ് തിരച്ചില്‍ കണ്ണൂരിലേക്കും വ്യാപിപ്പിച്ചിട്ടുണ്ട്. യുവാവിന്റെ മൊബൈല്‍ഫോണ്‍ കേന്ദ്രീകരിച്ചാണ് പോലീസ് അന്വേഷണവും പുരോഗമിക്കുന്നത്.
രണ്ട് ദിവസം മുമ്പാണ് കണ്ണൂര്‍ സ്വദേശിയായ ആരവും അസം സ്വദേശിയായ യുവതിയും ഇന്ദിരാനഗറിലെ അപ്പാര്ട്ട്മെന്റില് മുറിയെടുത്തത്. ഇരുവരും അപ്പാര്‍ട്ട്മെന്റിലേക്ക് ഒരുമിച്ചെത്തിയതിന്റെ സിസിടിവി ദൃശ്യങ്ങള്‍ പോലീസ് കണ്ടെടുത്തിട്ടുണ്ട്. ഇതിന് ശേഷം യുവതിയെ കൂടാതെ ഒറ്റക്കാണ് യുവാവ് പുറത്തേക്ക് പോയത്. ഇതും ദൃശ്യങ്ങളില്‍ വ്യക്തമാണ്. യുവതിയെ കൊലപ്പെടുത്തിയ ശേഷം യുവാവ് കടന്നുകളഞ്ഞതായാണ് പോലീസ് പറയുന്നത്.
ആരവും മായയും തമ്മില്‍ അടുപ്പത്തിലായിരുന്നുവെന്നാണ് പോലീസ് നല്‍കുന്നവിവരം. ഇക്കാര്യം യുവതിയുടെ സുഹൃത്തുക്കള്‍ വഴിയും പോലീസ് സ്ഥിരീകരിച്ചിട്ടുണ്ട്. കണ്ണൂര്‍ സ്വദേശിയായ ആരവ് ഏതാനും നാളുകളായി ബെംഗളൂരുവിലുണ്ട്. ഇയാളെക്കുറിച്ചുള്ള കൂടുതല്‍ വിവരങ്ങള്‍ ലഭ്യമായിട്ടില്ല. ഇയാള്‍ സ്വദേശത്തേക്ക് കടന്നിരിക്കാനുള്ള സാധ്യതയുള്ളതിനാല്‍ കേരളത്തിലേക്കും ബെംഗളൂരു പോലീസ് അന്വേഷണം വ്യാപിപ്പിച്ചിട്ടുണ്ട്.
മായയുടെ നെഞ്ചില്‍ ഒന്നിലധികം തവണ കുത്തേറ്റിട്ടുണ്ട്. നെഞ്ചിനേറ്റ കുത്താണ് യുവതിയുടെ മരണത്തിലേക്ക് നയിച്ചത് എന്നാണ് പോലീസ് വ്യക്തമാക്കുന്നത്. യുവതിയെ കൊലപ്പെടുത്തിയ ശേഷം ചൊവ്വാഴ്ച പുലര്‍ച്ചെയാണ് ആരവ് സംഭവസ്ഥലത്തുനിന്ന് രക്ഷപ്പെട്ടതെന്നാണ് ദേശീയ മാധ്യമങ്ങളുടെ റിപ്പോര്‍ട്ടുകള്‍. അതുവരെ ഇയാള്‍ മൃതദേഹത്തിനൊപ്പം അപ്പാര്ട്ട്മെന്റില് കഴിഞ്ഞു.
കോറമംഗളയിലാണ് മായ ജോലി ചെയ്തിരുന്നത്. ''ഞങ്ങള്‍ സ്ഥലത്തുണ്ട്. പ്രതി കേരളത്തില്‍ നിന്നുള്ളയാളാണ്. കൂടുതല്‍ വിവരങ്ങള്‍ ലഭിക്കാന്‍ ശ്രമിക്കുന്നുണ്ട്. പ്രാഥമിക അന്വേഷണത്തെ കുറിച്ചുള്ള കൂടുതല്‍ വിവരങ്ങള്‍ വൈകിട്ട് മാധ്യമങ്ങളെ അറിയിക്കും'' ഡെപ്യൂട്ടി പൊലീസ് കമ്മിഷണര്‍ (ഈസ്റ്റ്) ഡി. ദേവരാജ് പറഞ്ഞു.
ഫാഷന്‍, ഫുട് വ്‌ലോഗറാണ് യുവതി. ഇത്തരം വീഡിയോകള്‍ യുട്യൂബില്‍ പങ്കിട്ടാണ് മായ ഗോഗോയി ശ്രദ്ധ നേടിയത്. അസമീസ് വെഡ്ഡിംഗ് വീഡിയോകള്‍ അടക്കം അവര്‍ ഷെയര്‍ചെയ്തിട്ടുണ്ട്. ഷാരൂഖ് ഖാനെയും മെസ്സിയേയും ഇന്‍സ്പിരേഷനായി താന്‍ കാണുന്നുണ്ട് എന്നത് അടക്കമുള്ള വീഡിയോകള്‍ അവര്‍ യുട്യൂബില്‍ പോസ്റ്റ് ചെയ്തിരുന്നു. ആരവുമായി എങ്ങനെയാണ് യുവതി പരിചയപ്പെട്ടത് എന്നാണ് ഇനി അറിയേണ്ടത്.
