കഞ്ചാവ് കേസിൽ പിടിയിലായ പ്രതികൾ ജാമ്യത്തിൽ വന്ന് അയൽവാസിയെ വെട്ടിവീഴ്‌ത്തി; ഭക്ഷണം കഴിച്ചു കൊണ്ടിരുന്ന വയോധികനെ അച്ഛനും മകനും വെട്ടിയത് എക്സൈസിന് ഒറ്റു കൊടുത്തുവെന്ന് ആരോപിച്ച്; പിതാവ് അറസ്റ്റിൽ
കോയിപ്രം: കഞ്ചാവുമായി എക്സൈസിന്റെ പിടിയിലായ അച്ഛനും മകനും ഒറ്റുകൊടുത്തുവെന്ന് ആരോപിച്ച് അയൽവാസിയായ വയോധികനെ വെട്ടിവീഴ്‌ത്തി. പിതാവിനെ പൊലീസ് അറസ്റ്റ് ചെയ്തു. മകൻ ഒളിവിൽ. കോയിപ്രം നെല്ലിമല വടക്കേക്കാലായിൽ വീട്ടിൽ പ്രദീപ് (43) ആണ് അറസ്റ്റിലായത്. ഇയാളുടെ മകനും ഒന്നാം പ്രതിയുമായ വിവേക് ഒളിവിലാണ്. നെല്ലിമല അടപ്പനാംകണ്ടത്തിൽ വീട്ടിൽ മാത്തുക്കുട്ടി എന്നുവിളിക്കുന്ന സാംകുട്ടി എബ്രഹാ(63)മിനെയാണ് പ്രതികൾ മാരകമായി വെട്ടിപ്പരുക്കേൽപ്പിച്ചത്.
വ്യാഴാഴ്ച ഉച്ചക്ക് ഒന്നരയോടെ വീട്ടിലെ ഹാൾമുറിയിൽ ഭക്ഷണം കഴിച്ചുകൊണ്ടിരുന്നപ്പോഴാണ് പ്രതികൾ അതിക്രമിച്ചഫ കയറി വടിവാൾ, കുപ്പിഗ്ലാസ് എന്നിവകൊണ്ട് വെട്ടിയും കുത്തിയും മാരകമായി മുറിവേൽപ്പിച്ചത്. ഒറ്റിക്കൊടുക്കുമോടാ എന്ന് ആക്രോശിച്ചുകൊണ്ടാണ് ഒന്നാം പ്രതി പിന്നിൽ ഒളിപ്പിച്ചുവച്ച വടിവാൾ കൊണ്ട് പലതവണ തലയിൽ വെട്ടിയത്. തലയുടെ ഉച്ചിയിൽ ആഴത്തിൽ മുറിവേറ്റു.
പ്രദീപ് മേശപ്പുറത്തിരുന്ന കുപ്പിഗ്ലാസ് എടുത്ത് മുഖത്തും കഴുത്തിലും തുരുതുരാ അടിക്കുകയായിരുന്നു. ഗ്ലാസ് പൊട്ടിത്തെറിച്ച് മുഖത്തും കഴുത്തിലും ആഴത്തിൽ മുറിവേറ്റു. താഴെവീണപ്പോൾ ഇടതു വാരിയെല്ലുകളുടെ ഭാഗത്തും മുറിവുകളുണ്ടായി. കോഴഞ്ചേരി ജില്ലാ ആശുപത്രിയിൽ ചികിത്സ തേടിയ സാംകുട്ടി എബ്രഹാം വീട്ടിൽ തിരിച്ചെത്തുകയും വിവരമറിഞ്ഞ പൊലീസ് അവിടെയെത്തി മൊഴി രേഖപ്പെടുത്തി കേസെടുക്കുകുകയുമായിരുന്നു. പ്രദീപിനെ ഇയാളുടെ വീടിനുസമീപത്തുനിന്നും പൊലീസ് ഉടനടി പിടികൂടി.
പ്രതി ചോദ്യം ചെയ്യലിൽ കുറ്റം സമ്മതിച്ചു. ശാസ്ത്രീയാന്വേഷണസംഘവും മറ്റും പരിശോധന നടത്തി തെളിവുകൾ ശേഖരിക്കാനുള്ള നടപടി കൈക്കൊണ്ടു. പ്രതിയെ സംഭവസ്ഥലത്ത് എത്തിച്ച് തെളിവെടുപ്പ് നടത്തി, ആയുധം കണ്ടെത്താനായില്ല. ജില്ലാ പൊലീസ് മേധാവി വി അജിത്തിന്റെ നിർദേശപ്രകാരം കോയിപ്രം പൊലീസ് ഇൻസ്പെക്ടർ സജീഷ് കുമാറിന്റെ നേതൃത്വത്തിൽ ഊർജ്ജിതമായ അന്വേഷണം തുടരുകയാണ്.
തിരുവല്ല ഡി വൈ എസ് പി അഷദിന്റെ മേൽനോട്ടത്തിൽ നടക്കുന്ന അന്വേഷണത്തിൽ, പൊലീസ് ഇൻസ്പെക്ടർ സജീഷ് കുമാറിനെ കൂടാതെ എസ് ഐ ഉണ്ണികൃഷ്ണൻ, എസ് സി പി ഓമാരായ ഷബാന അഹമ്മദ്, ജോബിൻ, സി പി ഓ ബ്ലെസ്സൺ എന്നിവരും പങ്കെടുത്തു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
