പ്രണയബന്ധത്തിന് മക്കള്‍ തടസ്സമാകുമെന്ന് സംശയം; മക്കളെ വിഷം കൊടുത്ത് കൊലപ്പെടുത്തി അമ്മ; പ്രതിയെ പോലീസ് അറസ്റ്റ് ചെയ്തു; കാമുകനായി അന്വേഷണം ആരംഭിച്ച് പോലീസ്
മുസഫര്‍നഗര്‍: സ്വന്തം പ്രണയബന്ധത്തിന് മക്കള്‍ തടസ്സമാകുന്നുവെന്ന സംശയത്തിലാണ് ഇരുപത്തിഒരുകാരിയായ മുസ്‌കാന്‍ സ്വന്തം കുഞ്ഞുങ്ങളെ വിഷം നല്‍കി കൊലപ്പെടുത്തിയ ഭയാനക സംഭവം. റോഡ്കലി ഗ്രാമത്തില്‍ നിന്നുമാണ് സംഭവം റിപ്പോര്‍ട്ട് ചെയ്തത്. പൊലീസ് അറസ്റ്റ് ചെയ്ത മുസ്‌കാനൊപ്പം കാമുകനായ ജുനൈദിനെയും കേസില്‍ അന്വേഷണം പുരോഗമിക്കുന്നു. ഇയാള്‍ നിലവില്‍ ഒളിവിലാണ്.
വ്യാഴാഴ്ചയാണ് മുസ്‌കാന്റെ മകന്‍ അര്‍ഹാന്‍ (5)യും മകള്‍ ഇനയ (1)യുമെല്ലാം ദുരൂഹ സാഹചര്യത്തില്‍ മരിച്ച നിലയില്‍ വീടിനുള്ളില്‍ കണ്ടെത്തിയത്. തുടര്‍നടപടികളില്‍ പൊലീസ് നടത്തിയ ചോദ്യം ചെയ്യലിലാണ് മുസ്‌കാന്‍ കുറ്റം സമ്മതിച്ചത് എന്നാണ് എസ്.പി സഞ്ജയ് കുമാര്‍ മാധ്യമങ്ങളോട് പറഞ്ഞത്.
മുസ്‌കാന്റെ ഭര്‍ത്താവ് വസീം ജോലി സംബന്ധിച്ച് ചണ്ഡീഗഢിലാണ് താമസിക്കുന്നത്. ഈ സാഹചര്യത്തിലാണ് മുസ്‌കാനും ജുനൈദുമായുള്ള ബന്ധം ആരംഭിച്ചതെന്ന് പൊലീസ് അന്വേഷണത്തില്‍ കണ്ടെത്തി. കുട്ടികളെ വകവരുത്തിയ ശേഷം ഇരുവരും 'ഹണിമൂണ്‍' ആഘോഷിക്കാന്‍ പദ്ധതിയിട്ടിരുന്നതായും പൊലീസ് വെളിപ്പെടുത്തുന്നു.
കള്ളബന്ധം മറച്ചുവെച്ചുകൊണ്ടുള്ള ക്രൂരതയുടെ ഭാഗമായി ഇത്തരം സംഭവങ്ങള്‍ ആവര്‍ത്തിക്കപ്പെടുന്ന സാഹചര്യത്തില്‍ മാതൃസ്‌നേഹത്തിനും കുടുംബ ബന്ധത്തിനുമുള്ള ബഹുമാനം തകര്‍ന്നുവെന്ന ദുഃഖത്തിലാണ് നാട്ടുകാര്‍. സംഭവവുമായി ബന്ധപ്പെട്ട് കൂടുതല്‍ അന്വേഷണം തുടരുകയാണെന്ന് പൊലീസ് അറിയിച്ചു.
