വാക്കുതർക്കത്തിനിടെ ഭാര്യാപിതാവിനെ കോണിപ്പടിയിൽനിന്ന് തള്ളിയിട്ടു; തിരികെ കട്ടിലിൽ കിടത്തി; വീണ്ടും എടുത്തുയർത്തി കോണിപ്പടിയിൽ നിന്ന് താഴെയിട്ടു; കൊലപാതക ശേഷം ദമ്പതിമാർ സ്ഥലം വിട്ടു; കൊല്ലപ്പെട്ട 75കാരന്റെ മകനെ കണ്ടെത്തിയത് കട്ടിലിനടിയിൽ
കൊൽക്കത്ത: ഭാര്യാപിതാവിനെ കോണിപ്പടിയിൽനിന്ന് തള്ളിയിട്ട് കൊലപ്പെടുത്തിയ യുവാവ് പോലീസിന്റെ പിടിയിലായതോടെ പുറത്ത് വരുന്നത് ഞെട്ടിക്കുന്ന വിവരം. കൊൽക്കത്തയിലെ ഗോൾഫ് ഗ്രീൻ സ്വദേശിയായ 30 വയസ്സുള്ള സഞ്ജിത് ദാസ് ആണ് 75 വയസ്സുള്ള ഭാര്യാപിതാവ് സാമിക് കിഷോർ ഗുപ്തയെ കൊലപ്പെടുത്തിയത്. വിവാഹം കഴിഞ്ഞ് വെറും 20 ദിവസത്തിനുള്ളിലാണ് സഞ്ജിത് ദാസ് കൊലപാതകം നടത്തിയത്. രൂക്ഷമായ വാക്കുതർക്കമാണ് കൊലപാതകത്തിലേക്ക് നയിച്ചത്.
പോലീസ് നൽകുന്ന വിവരങ്ങൾ അനുസരിച്ച്, വ്യാഴാഴ്ച വൈകുന്നേരം ആറരയോടെയാണ് സഞ്ജിത്തും ഭാര്യാപിതാവ് സാമിക് കിഷോർ ഗുപ്തയും മകളായ സൗമശ്രീയും തമ്മിൽ വാക്കുതർക്കം ആരംഭിക്കുന്നത്. വഴക്കിനിടെ പ്രകോപിതനായ സഞ്ജിത്, ഗുപ്തയെ കട്ടിലിൽനിന്ന് വലിച്ചിറക്കി കോണിപ്പടിയിലൂടെ താഴേക്ക് തള്ളിയിടുകയായിരുന്നു. ആദ്യ വീഴ്ചയ്ക്ക് ശേഷം ഗുപ്തയെ വീണ്ടും കട്ടിലിൽ കിടത്തിയെന്നും, പിന്നീട് എടുത്തുയർത്തി കോണിപ്പടിയുടെ ലാൻഡിങ്ങിലേക്ക് വീണ്ടും തള്ളിയിട്ടതായും പോലീസ് പറയുന്നു.
സംഭവത്തിൽ ഗുപ്തയുടെ മകൻ സുജോയ് ഗുപ്തയെയും വീട്ടിലെ കട്ടിലിനടിയിൽനിന്ന് അബോധാവസ്ഥയിൽ കണ്ടെത്തി. ഇയാളെ അടിയന്തരമായി ആശുപത്രിയിൽ പ്രവേശിപ്പിച്ചു. തലയ്ക്ക് ഗുരുതരമായി പരിക്കേറ്റ സാമിക് കിഷോർ ഗുപ്ത സംഭവസ്ഥലത്ത് വെച്ച് തന്നെ മരിച്ചതായാണ് പ്രാഥമിക നിഗമനം.
സംഭവത്തിന് ശേഷം പ്രതിയും ഭാര്യയും ഓടി രക്ഷപ്പെട്ടിരുന്നു. പിറ്റേന്ന് രാവിലെ അയൽവാസിയാണ് കോണിപ്പടിയുടെ ലാൻഡിങ്ങിൽ ഗുപ്തയുടെ മൃതദേഹം കണ്ടെത്തിയത്. തുടർന്ന് ഗുപ്തയുടെ ഭാര്യ ജയശ്രീയുടെ മൊഴിയുടെ അടിസ്ഥാനത്തിൽ പോലീസ് കേസെടുത്ത് അന്വേഷണം ആരംഭിച്ചു. ഗുപ്തയുടെ മകന് ബോധം നഷ്ടപ്പെടാനുണ്ടായ കാരണവും അന്വേഷിച്ചുവരികയാണ്.
