രാജ്യത്ത് സ്ത്രീകളെയും പെൺകുട്ടികളെയും കാണാതാകുന്നതിന്റെ കണക്കുകളിൽ ഞെട്ടിക്കുന്ന വർധന; ദേശീയ ക്രൈം റെക്കോർഡ്സ് ബ്യൂറോ കണക്കുകളിൽ മുന്നിൽ മധ്യപ്രദേശും മഹാരാഷ്ട്രയും; ഏറ്റവും കുറവ് മിസോറമിലും ലക്ഷദ്വീപിലും
ന്യൂഡൽഹി: രാജ്യത്ത് സ്ത്രീകളെയും പെൺകുട്ടികളെയും കാണാതാകുന്നതിൽ കഴിഞ്ഞ മൂന്ന് വർഷത്തിനിടെ ഞെട്ടിക്കുന്ന വർധന. ദേശീയ ക്രൈം റെക്കോർഡ്സ് ബ്യൂറോ കണക്കുകൾ പ്രകാരം രാജ്യത്താകെ 2019ൽ 18 വയസിന് മുകളിൽ പ്രായമുള്ള 3,42,168 സ്ത്രീകളെയും 18 വയസിന് താഴെയുള്ള 82,084 പേരെയുമാണ് കാണാതായത്. 2020ൽ 3,44,422 സ്ത്രീകളെയും 79,233 പെൺകുട്ടികളെയും കാണാതായി. 2021ൽ 3,75,058 സ്ത്രീകളെയും 90,113 പെൺകുട്ടികളെയുമാണ് കാണാതായത്.
ഏറ്റവും അധികം സ്ത്രീകളെയും പെൺകുട്ടികളെയും കാണാതായ കണക്കുകളിൽ മുന്നിൽ മധ്യപ്രദേശ്, മഹാരാഷ്ട്ര സംസ്ഥാനങ്ങളാണെന്ന് ദേശീയ ക്രൈം റെക്കോർഡ്സ് ബ്യൂറോ കണക്കുകൾ പറയുന്നു. 2019, 2020, 2021 വർഷങ്ങളിലെ കണക്കുകളുടെ അടിസ്ഥാനത്തിലാണ് ക്രൈം റെക്കോർഡ്സ് ബ്യൂറോ ഇക്കാര്യം വ്യക്തമാക്കുന്നത്.
2021ലെ കണക്കുകൾപ്രകാരം മധ്യപ്രദേശിൽ നിന്ന് 55,704 സ്ത്രീകളെയും 13,034 പെൺകുട്ടികളെയുമാണ് കാണാതായത്. 2020ൽ 50,357 സ്ത്രീകളെയും 11,885 പെൺകുട്ടികളെയും കാണാതായി. 2019ൽ 52,119 സ്ത്രീകളെയും 13,315 പെൺകുട്ടികളെയുമാണ് മധ്യപ്രദേശിൽ നിന്ന് കാണാതായത്. 2021ൽ മഹാരാഷ്ട്രയിൽ നിന്ന് 56,498 സ്ത്രീകളെയും 3,937 പെൺകുട്ടികളെയുമാണ് കാണാതായതെന്ന് റിപ്പോർട്ടിൽ പറയുന്നു. 2020ൽ 58,735 സ്ത്രീകളെയാണ് കാണാതായത്, 4,517 പെൺകുട്ടികളെയും. 2019ൽ 63,167 സ്ത്രീകളെയും 4,579 പെൺകുട്ടികളെയും കാണാതായി.
ഉത്തർപ്രദേശിൽ നിന്ന് 2019ൽ 3,492 പെൺകുട്ടികളെയും 8,985 സ്ത്രീകളെയും കാണാതായി. 2020ൽ 2,773 പെൺകുട്ടികളെയും 8,542 സ്ത്രീകളെയും കാണാതായി. 2021ൽ 3,214 പെൺകുട്ടികളെയും 9,035 സ്ത്രീകളെയുമാണ് കാണാതായത്. പശ്ചിമ ബംഗാളിൽ നിന്ന് 2019ൽ 11,847 പെൺകുട്ടികളെയും 54,348 സ്ത്രീകളെയും കാണാതായി. 2020ൽ 11,481 പെൺകുട്ടികളെയും 51,559 സ്ത്രീകളെയും കാണാതായി. 2021ൽ 13,278 പെൺകുട്ടികളെയും 50,998 സ്ത്രീകളെയുമാണ് പശ്ചിമ ബംഗാളിൽ നിന്ന് കാണാതായത്.
2019 മുതൽ 2020 വരെ മിസോറം, ലക്ഷദ്വീപ് എന്നിവിടങ്ങളിൽ മാത്രമാണ് ഒരു കേസ് പോലും റിപ്പോർട്ട് ചെയ്യാത്തത്. കേരളത്തിൽ നിന്ന് കാണാതാവുന്ന സ്ത്രീകളുടെയും പെൺകുട്ടികളുടെയും എണ്ണം കുറയുകയാണെന്ന് കണക്കുകൾ വ്യക്തമാക്കുന്നു. 2019ൽ കേരളത്തിൽ നിന്ന് 1,118 പെൺകുട്ടികളെയാണ് കാണാതായത്, 8202 സ്ത്രീകളെയും. 2020ൽ 942 പെൺകുട്ടികളെയും 5,929 സ്ത്രീകളെയുമാണ് കാണാതായത്. 2021 എത്തുമ്പോൾ 951 പെൺകുട്ടികളെയാണ് കാണാതായത്. 5,657 സ്ത്രീകളെയും.
അരുണാചൽ പ്രദേശ്, മണിപ്പൂർ, മേഘാലയ, നാഗാലാൻഡ്, സിക്കിം, പുതുച്ചേരി എന്നിവിടങ്ങളിൽ കാണാതാവുന്ന സ്ത്രീകളുടെയും പെൺകുട്ടികളുടെയും എണ്ണം കുറവാണ്. ലഡാക്കിൽ 2021ൽ മൂന്ന് പെൺകുട്ടികളെയും 22 സ്ത്രീകളെയും കാണാതായതായി കണക്കുകൾ വ്യക്തമാക്കുന്നു.
