മൂന്നാം വയസിൽ മോഷണം ഹോബിയാക്കി; ഏവസ്റ്റ് കീഴടക്കാനിറങ്ങി ഇരുപതാം വയസിൽ തോൽവി; ഫ്‌ളൈഓവറിന്റെ തൂണിൽ മുതൽ ഒളിപ്പിച്ച ആകാശക്കള്ളൻ; തിരുവനന്തപുരത്തെ മോഷണത്തിൽ വിറപ്പിച്ച തെലുങ്കാനാക്കാരന് ജാമ്യം; സമ്പത്തി ഉമാ പ്രാസദിനെ നിരീക്ഷിക്കാൻ പൊലീസും
തിരുവനന്തപുരം: തലസ്ഥാന നഗരത്തിലെ മോഷണ പരമ്പരയിൽ ജൂലൈ 5 മുതൽ ജയിലിൽ കഴിയുന്ന ആകാശക്കള്ളൻ തെലുങ്കാനക്കാരൻ സമ്പത്തി ഉമാ പ്രസാദിന് (23) കർശന ഉപാധികളോടെ ജില്ലാ കോടതി ജാമ്യം അനുവദിച്ചു. 4 മോഷണ കേസുകളും തീരും വരെ കേരളത്തിൽ തന്നെ താമസിക്കണം. വിചാരണ കോടതിയുടെ അനുമതിയില്ലാതെ കേരള സംസ്ഥാനം വിടരുത്. ഈ സാഹചര്യത്തിൽ പുറത്തിറങ്ങുന്ന പ്രതിയെ പൊലീസ് കർശന നിരീക്ഷണത്തിന് വിധേയനാക്കും.
ഇനിയൊരുത്തരവ് ഉണ്ടാകുന്നത് വരെ എല്ലാ ഒന്നിടവിട്ട ശനിയാഴ്ചകളിലും രാവിലെ 10 നും 1 നും ഇടക്ക് അന്വേഷണ ഉദ്യോഗസ്ഥൻ മുമ്പാകെ ഹാജരായി ഒപ്പിടണം. ഒരു ലക്ഷം രൂപയുടെ പ്രതിയുടെയും തുല്യ തുകക്കുള്ള രണ്ടാൾ ജാമ്യക്കാരും ( ഒരാൾ കേരള സംസ്ഥാനത്തുള്ളയാളായിരിക്കണം ) ചേർന്നുള്ള വസ്തു ജാമ്യ ബോണ്ട് ഹാജരാക്കണം. ജാമ്യക്കാലയളവിൽ സാക്ഷികളെ സ്വാധീനിക്കാനോ ഭീഷണിപ്പെടുത്താനോ തെളിവുകൾ നശിപ്പിക്കാനോ മറ്റു കുറ്റകൃത്യങ്ങൾ ചെയ്യാനോ പാടില്ല. എന്നീ നാല് കർശന ഉപാധികളോടെയാണ് പ്രിൻസിപ്പൽ ജില്ലാ ജഡ്ജി പി.വി.ബാലകൃഷ്ണൻ ജാമ്യം അനുവദിച്ചത്. ആന്ധ്രാപ്രദേശ് തെലുങ്കാന ഖമ്മം ജില്ല ബല്ലേപ്പള്ളി ഗ്രാമപഞ്ചായത്ത് വന്ദരംഗപുരം സ്വദേശി ചന്ദ്ര മൗലി മകൻ സമ്പത്തി ഉമാ പ്രസാദ് ( 23) ആണ് 4 കേസുകളിലെയും ഏക പ്രതി. പ്രതിയെ ചോദ്യം ചെയ്ത് മോഷണ തൊണ്ടി മുതലുകൾ വീണ്ടെടുക്കുന്നതിനും തെളിവു ശേഖരണത്തിനും ആകാശക്കള്ളനെ 5 ദിവസം പൊലീസ് കസ്റ്റഡിയിൽ വിട്ടിരുന്നു.
നഗരത്തിന്റെ വിവിധ കോണുകൾ ഗൂഗിളിൽ തെരഞ്ഞ് മനസിലാക്കിയ ശേഷമാണ് സമ്ബത്തി ഉമാപ്രസാദ് തിരുവനന്തപുരത്ത് മെയ്‌ 28ന് വിമാനമിറങ്ങിയത്. പഴവങ്ങാടി ഫോർട്ട് വ്യൂ ഹോട്ടലിൽ റൂമെടുത്ത ശേഷം ആദ്യം പത്മനാഭസ്വാമിക്ഷേത്രത്തിൽ ദർശനം നടത്തി. കോവളം,ശംഖുംമുഖം,വേളി,മ്യൂസിയം ഉൾപ്പെടെയുള്ള സ്ഥലങ്ങളിലും ചുറ്റിയടിച്ചു. നഗരത്തിന്റെ വിവിധ ഭാഗങ്ങളിൽ ഓട്ടോറിക്ഷയിൽ യാത്ര ചെയ്ത് ലൊക്കേഷനുകൾ മനസിൽ പതിച്ചതായും പ്രതിയുടെ കുറ്റസമ്മത മൊഴിയിൽ പറയുന്നതായും പ്രതി ചെയ്ത മോഷണകൃത്യങ്ങൾ സമ്മതിച്ച് മൊഴി നൽകിയതായും കോടതിയിൽ സമർപ്പിച്ച പൊലീസ് റിപ്പോർട്ടിൽ പറയുന്നു.
ജൂൺ രണ്ടിന് ആന്ധ്രയിലേക്ക് മടങ്ങിയ ഉമാപ്രസാദ് മൂന്ന് ദിവസം കഴിഞ്ഞ് ആറാം തീയതി വ്യക്തമായ പദ്ധതികളോടെ തിരികെയെത്തി. ജൂൺ 19ന് ഫോർട്ട് സ്റ്റേഷൻ പരിധിയിൽ വാഴപ്പള്ളിയിലെ രത്‌നമ്മയുടെ വീട്ടിലായിരുന്നു ആദ്യ മോഷണം. 24ന് മൂലവിളാകത്ത് കോമത്ത് മോഹനന്റെ വീട്ടിൽ രണ്ടാമത്തെയും 28ന് മണക്കാട് നജാബിന്റെ വീട്ടിൽ മൂന്നാമത്തെയും മോഷണം നടത്തി. ദൗത്യം പൂർത്തിയാക്കി ജൂലായ് ഒന്നിനായിരുന്നു മടക്കം. പിടിക്കപ്പെടാത്ത സ്ഥിതിക്ക് താൻ സുരക്ഷിതനാണെന്നും തിരുവനന്തപുരം കേന്ദ്രീകരിച്ച് കൂടുതൽ മോഷണം നടത്തണമെന്നും ഉമാപ്രസാദ് പദ്ധതിയിട്ടു. ഇതിന്റെ അടിസ്ഥാനത്തിലാണ് 5 ന് തിരുവനന്തപുരത്തേക്ക് തിരിച്ചെത്തിയത്. എന്നാൽ കേരള പൊലീസ് രഹസ്യമായി നടത്തിയ നീക്കം ഉമാപ്രസാദിന്റെ പദ്ധതികളെ തകിടംമറിച്ചു.
ചാക്ക ബൈപ്പാസിൽ അനന്തപുരി ആശുപത്രിക്ക് എതിർവശമുള്ള ഫ്‌ളൈഓവറിന്റെ തൂണുകൾക്കരികെയാണ് കവറിൽ 5.27 ലക്ഷം രൂപയുടെ സ്വർണവും വജ്രവും ഉമാപ്രസാദ് സൂക്ഷിച്ചത്. ഒരാഴ്ച അടുപ്പിച്ച് ആഭരണങ്ങൾ ഇവിടെയിരിപ്പുണ്ടായിരുന്നു. രാവിലെ വിമാനത്താവളത്തിൽ നിന്ന് പ്രതിയുമായി പൊലീസ് ഇവിടേക്കാണ് ആദ്യമെത്തിയത്. വിലപിടിപ്പുള്ള സ്വർണവും വജ്രവും സൂക്ഷിച്ചിരുന്ന സ്ഥലം കണ്ട് പലരും അമ്ബരന്നു. മോഷണത്തിനായി ഉപയോഗിച്ചിരുന്ന ഉപകരണങ്ങളും ചെറിയ സ്യൂട്ട്കേസിൽ പാലത്തിന് താഴെയാണ് സൂക്ഷിച്ചിരുന്നതെന്ന് പേട്ട സിഐ സാബു.ബി പറഞ്ഞു.
വിമാനത്തിലാണ് വരവെങ്കിലും നഗരം ചുറ്റാൻ ഉമാപ്രസാദിന് ഇഷ്ടം ഓട്ടോയാണ്. ഊടുവഴികളിലൂടെയടക്കം സഞ്ചരിക്കാൻ ഓട്ടോ വഴി സാധിക്കും. പകൽ ഓട്ടോ പിടിച്ച് നഗരം മുഴുവൻ കറങ്ങും.മോഷണത്തിന് അനുയോജ്യമായ പ്രദേശവും വീടുകളും കണ്ടുപിടിക്കുകയാണ് ലക്ഷ്യം.രാത്രി ഒമ്ബതര ആകുന്നതോടെ കണ്ടുപിടിച്ച വീടിനടുത്തെത്തി പതുങ്ങിയിരിക്കും.എല്ലാവരും ഉറങ്ങിയെന്ന് ഉറപ്പുവരുത്തിയ ശേഷമാണ് തുടർചലനങ്ങൾ.
മൂന്നാം വയസ് മുതൽ മോഷണങ്ങൾ ഉമാപ്രസാദിന്റെ ഹോബിയാണ്.അന്നേ ആഭരണങ്ങളോടാണ് ഇഷ്ടം. കുറ്റവാസനയുള്ള ഉമാപ്രസാദ് എങ്ങനെ ഖമ്മം പൊലീസ് സ്റ്റേഷനിൽ കയറിപ്പറ്റിയെന്നതാണ് കൗതുകം. സ്റ്റേഷനിലെ പാർട് ടൈം ജീവനക്കാരനായിരുന്ന ഇയാൾ ജീവനക്കാരുടെ വിശ്വസ്തനായിരുന്നു.പൊലീസ് സ്റ്റേഷനിലെ രഹസ്യങ്ങളെല്ലാം അറിയാമായിരുന്ന ഉമാപ്രസാദ് അതും മുതലാക്കി. പത്തോളം ആഭരണ മോഷണ കേസുകളിൽ ഇയാൾ പ്രതിയാണ്. ഉത്തരേന്ത്യ കേന്ദ്രീകരിച്ചും മോഷണം നടത്തിയിട്ടുണ്ടോയെന്ന കാര്യം സംശയമാണ്. മോഷ്ടിക്കുന്നസ്വർണം പണയം വച്ച് കിട്ടുന്ന പണമാണ് വരുമാനം. വിമാനയാത്രയ്ക്കടക്കം ചെലവാക്കുന്നതും ഈ തുകയാണ്.
പേട്ട മൂലവിളാകത്തെ വീട്ടിൽ തലയിൽ തൊപ്പിയും മുഖത്ത് മാസ്‌കും കൈയുറയും ധരിച്ചായിരുന്നു കവർച്ച. മോഷണം നടന്ന വീട്ടിലെ ക്യാമറയിൽ നിന്നാണ് ദൃശ്യങ്ങൾ ലഭിച്ചത്.ഷോർട്‌സും ഫുൾകൈ ടീ ഷർട്ടുമായിരുന്നു വേഷം.എന്നാൽ മോഷ്ടാവിന്റെ മുഖം പൂർണമായും മറച്ച നിലയിലായതിനാൽ പ്രതിയെ പിടികൂടാൻ ബുദ്ധിമുട്ടി. വീട് പൂട്ടി കോവളത്ത് ഒരു ചടങ്ങിൽ പങ്കെടുക്കാൻ പോയ ഗൃഹനാഥനും ഭാര്യയും പിറ്റേദിവസം മടങ്ങിയെത്തിയപ്പോഴാണ് മോഷണവിവരം അറിഞ്ഞത്. വിരലടയാള വിദഗ്ദ്ധരും ഡോഗ് സ്‌ക്വാഡുമെല്ലാം പരിശോധന നടത്തിയെങ്കിലും തുമ്‌ബൊന്നും ലഭിച്ചില്ല. മതിൽ ചാടിക്കടന്ന് വീട്ടിലെ കോമ്ബൗണ്ടിലെത്തിയ മോഷ്ടാവ് സി.സി ടി.വി ക്യാമറയിലേക്ക് നോക്കുന്നതും ദൃശ്യങ്ങളിലുണ്ട്. തുടർന്ന് ജനൽക്കമ്ബി വളച്ച് വീട്ടിൽ കടന്നശേഷം ക്യാമറ സിസ്റ്റം ഓഫ് ചെയ്ത ശേഷമാണ് മോഷണം നടത്തി കടന്നത്. കിടപ്പുമുറിയിലെ ഇരുമ്ബ് അലമാര കുത്തിപ്പൊളിച്ചായിരുന്നു മോഷണം.സ്വർണാഭരങ്ങൾ സൂക്ഷിച്ചിരുന്ന അലമാരയിൽ 12,000 രൂപ ഉണ്ടായിരുന്നെങ്കിലും അത് നഷ്ടപ്പെട്ടില്ല.അകത്തുകടന്ന മോഷ്ടാവ് അടുക്കള വാതിലിലൂടെയാണ് രക്ഷപ്പെട്ടത്. വളർത്തുനായയുള്ള വീടാണിത്.
മണക്കാട് നജാബിന്റെ വീട്ടിൽ നടന്ന മോഷണത്തിൽ ആഭരണങ്ങൾക്കൊപ്പം സി.സി ടി.വി ബോക്സും കൊണ്ടുപോയി. മകന്റെ അഡ്‌മിഷനുമായി ബന്ധപ്പെട്ട് ജൂൺ 25 മുതൽ തൃശൂരിലായിരുന്ന നജാബും കുടുംബവും തിരിച്ചെത്തിയപ്പോഴാണ് മോഷണവിവരം അറിഞ്ഞത്. മോഷണദൃശ്യം പതിഞ്ഞ ക്യാമറ തുണികൊണ്ട് മറച്ച ശേഷം സി.സി.ടി.വി ബോക്സ് കള്ളൻ കൊണ്ടുപോവുകയായിരുന്നു. അന്ന് മൂലവിളാകത്തെ കള്ളൻ തന്നെയാണ് മോഷണത്തിന് പിന്നിലെന്ന് പൊലീസ് ഉറപ്പിച്ചിരുന്നു. പിന്നാലെയാണ് പേട്ടയിലെയും ഫോർട്ടിലെയും പൊലീസ് ഉദ്യോഗസ്ഥർ സംയുക്തമായുള്ള അന്വേഷണം ആരംഭിച്ചത്.പേട്ട സിഐ സാബു.ബി,ഫോർട്ട് സിഐ രാകേഷ്.കെ, തിരുവനന്തപുരം സിറ്റി ഷാഡോ പൊലീസ് എസ്‌ഐ ഉമേഷ്,പേട്ട എസ്‌ഐ അഭിലാഷ്,ഫോർട്ട് എസ്‌ഐമാരായ വിനോദ്,സാബു,തിരുവനന്തപുരം സിറ്റി ഷാഡോ ടീം സിവിൽ പൊലീസ് ഓഫീസർമാരായ ദീപു,രാജീവ്,രഞ്ജിത്ത് എന്നിവരാണ് അന്വേഷണസംഘത്തിലുണ്ടായിരുന്നത്.
മൂന്ന് വർഷം മുമ്പ് ഇരുപതാം വയസിൽ താൻ എവറസ്റ്റ് കീഴടക്കാൻ ശ്രമം നടത്തിയിരുന്നുവെന്നും മുഴുവൻ കയറാൻ പറ്റിയില്ലെന്നുമാണ് ഉമാപ്രസാദ് പൊലീസിനോടു പറഞ്ഞത്.
