ഇടുക്കി: കുടുംബ കലഹത്തെ തുടർന്ന് ഇടുക്കിയിൽ ഭാര്യാപിതാവിനെ മരുമകൻ വെട്ടികൊലപ്പെടുത്തി. ഇടുക്കി നെടുംകണ്ടം കൗന്തിയിലാണ് സംഭവം. പുതുപ്പറമ്പിൽ ടോമി ആണ് കൊല്ലപ്പെട്ടത്. മരുമകൻ ജോബിൻ തോമസിനെ പൊലീസ് കസ്റ്റഡിയിലെടുത്തു.ജോബിന്റെ ഭാര്യയും ടോമിയുടെ മകളുമായ ടിന്റുവിനുനേരെയും ആക്രമണം ഉണ്ടായി. ജോബിൻ ടിന്റുവിനെയും കത്തികൊണ്ട് ആക്രമിക്കുകയായിരുന്നു.

വെട്ടേറ്റ് ഗുരുതരമായി പരിക്കേറ്റ ടിന്റുവിനെ കോട്ടയം മെഡിക്കൽ കോളജിൽ പ്രവേശിപ്പിച്ചു. ടിന്റുവിന്റെ ആരോഗ്യനില ഗുരുതരമായി തുടരുകയാണ്. കുടുംബ കലഹത്തെതുടർന്നാണ് കൊലപാതകമെന്നാണ് പൊലീസ് സംശയിക്കുന്നത്. സംഭവത്തിൽ കേസെടുത്ത പൊലീസ് അന്വേഷണം ആരംഭിച്ചു. മകളെ ആക്രമിക്കാനുള്ള ജോബിന്റെ ശ്രമം ടോമി തടയുകയായിരുന്നു. ഇതിനിടെയാണ് ടോമിക്ക് വെട്ടേറ്റത് എന്നാണ് സൂചന.

ബംഗളൂരുവിൽ കച്ചവടം ചെയ്തുവരുകയായിരുന്നു ജോബിൻ. ഏറെ നാളായി ഭാര്യ ടിന്റുവുമായി ജോബിൻ തർക്കത്തിലായിരുന്നു. ഇരുവരും അകന്നുകഴിയുകയായിരുന്നു. ഇന്നലെ അർധരാത്രിക്കുശേഷമാണ് നെടുംകണ്ടം കൗന്തിയിലെ ടോമിയുടെ വീട്ടിലെത്തി ജോബിൻ ആക്രമണം നടത്തിയത്.

കൊലപ്പെടുത്തുക എന്ന ഉദ്ദേശത്തോടെയാണ് ജോബിൻ വീട്ടിലെത്തിയത് എന്നാണ് സൂചന. ടിന്റുവിന് തലയ്ക്കാണ് പരിക്കേറ്റത്.

മറുനാടന്‍ മലയാളി

    മറുനാടന്‍ മലയാളി ബ്യൂറോ