പാർലമെന്റിലെ സുരക്ഷാവീഴ്ച; ഡൽഹി പൊലീസിനെ പൂർണമായും ഒഴിവാക്കി; സുരക്ഷാചുമതല സിഐഎസ്എഫിന് നൽകി കേന്ദ്രസർക്കാർ; ബോഡി സ്‌കാൻ മെഷിനുകൾ സ്ഥാപിക്കും; സന്ദർശകരുടെ ഗ്യാലറി ചില്ലുകൊണ്ട് മറക്കാനും തീരുമാനം
ന്യൂഡൽഹി: പാർലമെന്റിലെ സുരക്ഷ വീഴ്ചയുടെ പശ്ചാത്തലത്തിൽ പാർലമെന്റ് മന്ദിരസമുച്ചയത്തിന്റെ സുരക്ഷാ ചുമതല ഇനി സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്‌സ് (സിഐഎസ്എഫ്) ഏറ്റെടുക്കും. അടുത്തിടെ നടന്ന പാർലമെന്റ് സുരക്ഷാ ലംഘനത്തിന്റെ പശ്ചാത്തലത്തിലാണ് ഡൽഹി പൊലീസിൽ നിന്ന് സുരക്ഷാ ചുമതല സിഐഎസ്എഫ് ഏറ്റെടുക്കുക. പുറത്തിറക്കിയ വിജ്ഞാപനത്തിലാണ് ആഭ്യന്തര വകുപ്പ് ഇക്കാര്യം വ്യക്തമാക്കിയത്. പ്രവേശനം നടത്തുന്നവരെ പരിശോധിക്കുന്നതുൾപ്പടെ എല്ലാ അനുബന്ധ ഉത്തരവാദിത്തങ്ങളും സിഐഎസ്എഫ് ഏറ്റെടുക്കുമെന്നും ആഭ്യന്തര മന്ത്രാലയം അറിയിച്ചു.
പാർലമെന്റിനുള്ളിലെ സുരക്ഷാചുമതലയിൽ നിന്ന് ഡൽഹി പൊലീസിനെ പൂർണമായും ഒഴിവാക്കിയാണ് കേന്ദ്രസർക്കാരിന്റെ പുതിയ തീരുമാനം. ഇതുസംബന്ധിച്ച ഉത്തരവ് സർക്കാർ ബുധനാഴ്ച പുറത്തിറക്കി. പാർലമെന്റിനുള്ളിൽ പ്രവേശിക്കുന്നവരുടെ ദേഹപരിശോധന ഉൾപ്പെടെ എല്ലാവിധ സുരക്ഷാനടപടിക്രമങ്ങളും ഇനി മുതൽ സിഐഎസ്എഫ് കൈകാര്യം ചെയ്യും.
കെട്ടിടസമുച്ചയത്തിനുള്ളിലെ സുരക്ഷയുടെ ഉത്തരവാദിത്വം ലോക്സഭാ സെക്രട്ടേറിയറ്റിനുതന്നെയായിരിക്കും. മന്ദിരത്തിനുപുറത്തുള്ള സുരക്ഷാചുമതല ഡൽഹി പൊലീസിനാണ്. കഴിഞ്ഞയാഴ്ച ഉണ്ടായ സുരക്ഷാവീഴ്ചയെ തുടർന്ന് ആഭ്യന്തര മന്ത്രാലയം നിർദേശിച്ചിട്ടുള്ള വിശദമായ സുരക്ഷാപരിശോധനയ്ക്ക് ശേഷമായിരിക്കും സുരക്ഷാഏജൻസികളുടെ ചുമതലയിലുള്ള മാറ്റം നടപ്പിലാക്കുന്നത്. വിമാനത്താവളങ്ങളും അണുശക്തികേന്ദ്രങ്ങളും ഉൾപ്പെടെ 350-ലധികം സ്ഥാപനങ്ങളിൽ നിലവിൽ സിഐഎസ്എഫ് സുരക്ഷാചുമതല നിർവഹിക്കുന്നുണ്ട്.
സുരക്ഷാപാളിച്ച ഉണ്ടായതിനുപിന്നാലെ പാർലമെന്റ് മന്ദിരത്തിലേക്കുള്ള പ്രവേശനവ്യവസ്ഥകൾ കേന്ദ്രസർക്കാർ കൂടുതൽ കടുപ്പിച്ചിരുന്നു. സന്ദർശകർക്കും അത്യാവശ്യമല്ലാത്ത ജീവനക്കാർക്കും വിലക്കേർപ്പെടുത്തി. എംപിമാർക്കും അവരുടെ സ്റ്റാഫിനും പ്രത്യേക പ്രവേശനകവാടങ്ങൾ അനുവദിച്ചു. മാധ്യമപ്രവർത്തകർക്ക് താത്കാലികവിലക്കേർപ്പെടുത്തി, പിന്നീട് മൂന്നാമത്തെ കവാടത്തിലൂടെ പ്രവേശനാനുമതി നൽകി. സന്ദർശകരെ വീണ്ടും അനുവദിക്കുന്നപക്ഷം നാലാം ഗേറ്റിലൂടെയാകും പ്രവേശിപ്പിക്കുന്നത്. സന്ദർശകരുടെ ഗ്യാലറി ചില്ലുകൊണ്ട് മറക്കാനും തീരുമാനമായി. വിമാനത്താവളങ്ങളിലേതുപോലെയുള്ള ബോഡി സ്‌കാൻ മെഷിനുകൾ സ്ഥാപിക്കാനും തീരുമാനിച്ചിട്ടുണ്ട്.
പുതിയതും പഴയതുമായ പാർലമെന്റ് സമുച്ചയവും അനുബന്ധ കെട്ടിടങ്ങളും സിഐഎസ്എഫിന്റെ സമഗ്ര സുരക്ഷാ കവറേജിന് കീഴിൽ കൊണ്ടുവരും, പാർലമെന്റ് സെക്യൂരിറ്റി സർവീസ് (പിഎസ്എസ്), ഡൽഹി പൊലീസ്, പാർലമെന്റ് ഡ്യൂട്ടി ഗ്രൂപ്പ് (പിഡിജി) എന്നിവയുടെ നിലവിലുള്ള ഘടകങ്ങളും ഉണ്ടായിരിക്കും. സമുച്ചയത്തിനുള്ളിലെ സുരക്ഷ ലോക്സഭാ സെക്രട്ടേറിയറ്റിന്റെ ഉത്തരവാദിത്തമായി തുടരും. അതേസമയം കെട്ടിടത്തിനു പുറത്തുള്ള ഡൽഹി പൊലീസ് സംരക്ഷണം തുടരും. സുരക്ഷാ പ്രോട്ടോക്കോളുകൾ കാര്യക്ഷമമാക്കാനുള്ള ശ്രമത്തിന്റെ ഭാഗമായി കൂടിയാണ് മാറ്റം. സുരക്ഷാ ലംഘനത്തെത്തുടർന്ന് ആഭ്യന്തര മന്ത്രാലയം ഉത്തരവിട്ട വിശദമായ സുരക്ഷാ സർവേയ്ക്ക് ശേഷമാണ് ചുമതലയേറ്റെടുക്കുക.
കേന്ദ്ര സർക്കാർ മന്ത്രാലയങ്ങളെ സംരക്ഷിക്കുന്ന സിഐഎസ്എഫിന്റെ സർക്കാർ ബിൽഡിങ് സെക്യൂരിറ്റി (ജിബിഎസ്) യൂണിറ്റിൽ നിന്നുള്ള വിദഗ്ദ്ധർ, സേനയുടെ ഫയർ കോംബാറ്റ് ആൻഡ് റെസ്പോൺസ് ഓഫീസർമാർ, നിലവിലെ പാർലമെന്റ് സെക്യൂരിറ്റി ടീമിലെ ഉദ്യോഗസ്ഥർ തുടങ്ങിയവരടങ്ങിയ ടീം ഈ ആഴ്ച അവസാനത്തോടെ സർവേ നടത്തും. സർവേ നടത്തിയ ശേഷം സിഐഎസ്എഫ് റിപ്പോർട്ട് സമർപ്പിക്കും.
സെൻസിറ്റീവ് പൊതുമേഖലാ സ്ഥാപനങ്ങൾക്ക് സംയോജിത സുരക്ഷാ പരിരക്ഷ നൽകുന്ന കേന്ദ്ര സായുധ പൊലീസ് സേനയാണ് സിഐഎസ്എഫ്. നിലവിൽ എയ്റോസ്പേസ് ഡൊമെയ്നുകൾ, സിവിൽ എയർപോർട്ടുകൾ, ആണവ സൗകര്യങ്ങൾ തുടങ്ങി പല കേന്ദ്ര സർക്കാർ മന്ത്രാലയ കെട്ടിടങ്ങളും ഉൾപ്പെടെ 350-ലധികം സ്ഥലങ്ങളിൽ സിഐഎസ്എഫ് സുരക്ഷാ ഒരുക്കുന്നുണ്ട്.
ഈ മാസം പതിമൂന്നിനായിരുന്നു പാർലമെന്റിൽ അതിക്രമമുണ്ടായത്. 2001-ൽ പാർലമെന്റിനുള്ളിൽ നടന്ന ഭീകരാക്രമണത്തിൽ ഒമ്പത് പേർ മരിച്ചിരുന്നു. ഇതിന്റെ 22-ാം വാർഷികദിനത്തിലാണ് അക്രമസംഭവമുണ്ടായത്. ശൂന്യവേള അവസാനിക്കുന്നതിന് മിനിറ്റുകൾക്കു മുൻപായിരുന്നു സംഭവം. കേന്ദ്ര സർക്കാരിനെതിരെ മുദ്രാവാക്യം വിളികളുമായി ലോക്സഭാ സന്ദർശക ഗാലറിയിൽ നിന്ന് സാഗർ ശർമ, ഡി മനോരഞ്ജൻ എന്നിവർ സഭാംഗങ്ങളുടെ ചേംബറിലേക്ക് ചാടുകയും മഞ്ഞകളറിലുള്ള സ്മോക് സ്പ്രേ ഉപയോഗിക്കുകയും ചെയ്തിരുന്നു.
അമോൽ ഷിൻഡെ, നീലം ദേവി എന്നിവർ പുറത്ത് പ്രതിഷേധിക്കുകയായിരുന്നു. ഇവർക്ക് ആവശ്യമായ നിർദേശങ്ങളും സഹായങ്ങളും നൽകിയ വിശാൽ ശർമ എന്ന അഞ്ചാമനെ ഗുരുഗ്രാമിൽ നിന്നും അറസ്റ്റ് ചെയ്തിരുന്നു. ആക്രമണത്തിന്റെ മുഖ്യ സൂത്രധാരനെന്ന് കരുതുന്ന ലളിത് ഝാ എന്നയാളും കീഴടങ്ങിയിട്ടുണ്ട്. പാർലമെന്റിലുണ്ടായ സുരക്ഷാവീഴ്ചയെ തുടർന്നുണ്ടായ പ്രതിപക്ഷ അംഗങ്ങളുടെ പ്രതിഷേധം 143 പ്രതിപക്ഷ എംപിമാരുടെ സസ്പെൻഷനിലേക്കും നയിച്ചു.
