വസ്ത്രം ഉള്ള്യേരി ടൗണില്‍ ഉപേക്ഷിച്ചു മുങ്ങി; ഈ വസ്ത്രത്തില്‍ നിന്ന് ലഭിച്ച മൊബൈല്‍ നമ്പര്‍ നിര്‍ണ്ണായകമായി; ഉള്ള്യേരിയില്‍ ലാബില്‍ ജീവനക്കാരിയെ പീഡിപ്പിക്കാന്‍ ശ്രമിച്ച ഹോട്ടല്‍ ജീവനക്കാരന്‍ പിടിയില്‍
കോഴിക്കോട്: ഉള്ള്യേരിയില്‍ ലാബില്‍ ജീവനക്കാരിയെ പീഡിപ്പിക്കാന്‍ ശ്രമിച്ച ഹോട്ടല്‍ ജീവനക്കാരന്‍ പിടിയില്‍. പരപ്പനങ്ങാടി സ്വദേശി മുഹമ്മദ് ജാസിനാണ് പിടിയിലായത്.
തിങ്കളാഴ്ചയായിരുന്നു പീഡന ശ്രമം. രാവിലെ ആറരയോടെ ലാബ് തുറക്കാന്‍ എത്തിയ ജീവനക്കാരിയെ ഇയാള്‍ കടന്നുപിടിച്ച് അക്രമിക്കുകയായിരുന്നു. രക്ഷപ്പെട്ട് പുറത്തേക്ക് ഓടിയ യുവതി ബഹളം വെച്ചതോടെ സമീപത്തെ ഹോട്ടല്‍ ജീവനക്കാര്‍ ഇയാളെ പിന്തുടര്‍ന്നു. പക്ഷേ പിടിക്കാനായില്ല. ചൊവ്വാഴ്ച രാവിലെ 11 മണിയോടെ കുന്ദമംഗലത്തുവെച്ചാണ് പ്രതിയെ പിടികൂടിയത്.
ജോലി തേടി എത്തിയ ഇയാള്‍ വഴിയിലൂടെ നടന്നുപോകുമ്പോള്‍ ജീവനക്കാരി ലാബ് തുറക്കുന്നത് കണ്ട് അകത്തുകയറി ആക്രമിക്കുകയായിരുന്നു. സമാനമായ മറ്റ് മൂന്ന് കേസുകള്‍ കൂടി വിവിധ സ്റ്റേഷനുകളില്‍ പ്രതിക്കെതിരെ രജിസ്റ്റര്‍ ചെയ്തിട്ടുണ്ടെന്ന് പോലീസ് അറിയിച്ചു. സംഭവസമയത്ത് പ്രതി ഉപയോഗിച്ചിരുന്ന വസ്ത്രം ഉള്ള്യേരി ടൗണില്‍ ഉപേക്ഷിച്ചിരുന്നു. ഈ വസ്ത്രത്തില്‍നിന്ന് ലഭിച്ച മൊബൈല്‍നമ്പറാണ് നിര്‍ണ്ണായകമായത്.
