ചിക്കന്‍ ബിരിയാണിയില്‍ ചിക്കന്‍ കുറഞ്ഞു; വിരമിക്കല്‍ ചടങ്ങിനിടെ പോലീസ് സ്റ്റേഷനില്‍ കൂട്ടയടി; പള്ളുരുത്തി ട്രാഫിക് സ്റ്റേഷനില്‍ തമ്മിലടിച്ചത് ഹോം ഗാര്‍ഡുകള്‍; തലയ്ക്ക് പരുക്കേറ്റയാള്‍ ആശുപത്രിയില്‍ ചികിത്സയില്‍
കൊച്ചി: ചിക്കന്‍ ബിരിയാണിയില്‍ ചിക്കന്‍ കുറഞ്ഞുപോയതിന്റെ പേരില്‍ തമ്മില്‍ തല്ല്. എറണാകുളം പള്ളുരുത്തി ട്രാഫിക് സ്റ്റേഷനിലാണ് സംഭവം. സെന്റ് ഓഫ് പാര്‍ട്ടിക്കിടെ ട്രാഫിക് ഹോം ഗാര്‍ഡുകള്‍ തമ്മിലാണ് തല്ലുണ്ടായത്. ഹോം ഗാര്‍ഡുകള്‍ ആയ രാധാകൃഷ്ണനും ജോര്‍ജ്ജും തമ്മിലാണ് അടിപിടി ഉണ്ടായത്. മറ്റൊരു ഹോം ഗാര്‍ഡിന്റെ റിട്ടയര്‍മെന്റ് പാര്‍ട്ടിക്കിടെയായിരുന്നു സംഘര്‍ഷം.
പരുക്കേറ്റ ഒരാളെ എറണാകുളം ജനറല്‍ ആശുപത്രിയില്‍ പ്രവേശിപ്പിച്ചു. ജോര്‍ജ്, രാധാകൃഷ്ണന്‍ എന്നീ ഹോം ഗാര്‍ഡുകള്‍ക്കാണ് പരുക്കേറ്റത്. തലയ്ക്ക് പരുക്കേറ്റ രാധാകൃഷ്ണനെ ആണ് ജനറല്‍ ആശുപത്രിയില്‍ പ്രവേശിപ്പിച്ചത്.
വ്യാഴാഴ്ച ഉച്ചയോടെയായിരുന്നു സംഭവം. കൂട്ടത്തില്‍ ഒരു ഹോം ഗാര്‍ഡിന്റെ വിരമിക്കല്‍ ചടങ്ങുമായി ബന്ധപ്പെട്ട് ഒരു സ്ഥലത്ത് ഒത്തു കൂടിയിരുന്നു. ഇവിടെ വെച്ച് രണ്ട് ഹോം ഗാര്‍ഡുകള്‍ തമ്മില്‍ വാക്കുതര്‍ക്കത്തില്‍ ഏര്‍പ്പെടുകയായിരുന്നു. കൂടെ ഉണ്ടായിരുന്നവര്‍ രണ്ടുപേരെയും പിടിച്ചു മാറ്റിയെങ്കിലും അത് സംഘര്‍ഷത്തില്‍ കലാശിക്കുകയായിരുന്നുവെന്നാണ് വിവരം. പിന്നീട് പോലീസ് സ്റ്റേഷനിലേക്കും തര്‍ക്കം നീണ്ടതായാണ് വിവരം.
