യുവരാജ് സിംഗിനും സുരേഷ് റെയ്നയ്ക്കും റോബിന്‍ ഉത്തപ്പയ്ക്ക് ശിഖര്‍ ധവാനും സ്വത്ത് നഷ്ടമാകുമോ? കായിക താരങ്ങളും കള്ളപ്പണം വെളുപ്പിച്ചതിന്റെ ഭാഗം; കോടിക്കണക്കിന് രൂപയുടെ സ്വത്ത് കണ്ടു കെട്ടിയേക്കും
ന്യൂഡല്‍ഹി : ഓണ്‍ലൈന്‍ വാതുവയ്പ്പ്, ഗെയിമിംഗ് പ്ലാറ്റ്ഫോമുമായി ബന്ധപ്പെട്ട കേസില്‍ കള്ളപ്പണം വെളുപ്പിക്കല്‍ വിരുദ്ധ നിയമപ്രകാരം ചില കായികതാരങ്ങളുടെയും അഭിനേതാക്കളുടെയും സ്വത്ത് കണ്ടുകെട്ടാന്‍ എന്‍ഫോഴ്സ്മെന്റ് ഡയറക്ടറേറ്റ് (ഇഡി) നടപടികള്‍ തുടങ്ങി. കോടിക്കണക്കിന് രൂപയുടെ സ്വത്തുക്കള്‍ ഇ ഡി കണ്ടുകെട്ടിയേക്കും. '1xBet' എന്ന ഓണ്‍ലൈന്‍ ബെറ്റിങ്ങ് ആപ്പുമായി ബന്ധപ്പെട്ട കേസിലാണ് നടപടികള്‍. അന്വേഷണത്തില്‍ ഈ സെലിബ്രിറ്റികളില്‍ ചിലര്‍ അവര്‍ക്ക് നല്‍കിയ എന്‍ഡോഴ്സ്മെന്റ് ഫീസ് ഉപയോഗിച്ച് കള്ളപ്പണം വെളുപ്പിക്കല്‍ വിരുദ്ധ നിയമപ്രകാരം കേസെടുക്കാവുന്ന വിവിധ സ്വത്തുക്കള്‍ സമ്പാദിച്ചതായി കണ്ടെത്തിയിരുന്നു.
അന്വേഷണത്തിന്റെ ഭാഗമായി യുവരാജ് സിംഗ്, സുരേഷ് റെയ്ന, റോബിന്‍ ഉത്തപ്പ, ശിഖര്‍ ധവാന്‍ തുടങ്ങിയ ക്രിക്കറ്റ് താരങ്ങളെയും കൂടാതെ അഭിനേതാക്കളായ സോനു സൂദ്, മിമി ചക്രവര്‍ത്തി, അങ്കുഷ് ഹസ്ര, ഉര്‍വശി റൗട്ടേല, വിജയ് ദേവരകൊണ്ട, റാണ ദഗ്ഗുബതി എന്നിവര്‍ക്ക് ഇ ഡി നോട്ടീസ് അയച്ചിരുന്നു. കോടിക്കണക്കിന് രൂപയുടെ തട്ടിപ്പും വന്‍തോതില്‍ നികുതി വെട്ടിപ്പ് നടത്തിയതായും ആരോപിക്കപ്പെടുന്ന നിയമവിരുദ്ധ വാതുവെപ്പ് ആപ്പുകള്‍ ഉള്‍പ്പെടുന്ന നിരവധി കേസുകളാണ് ഇ ഡി അന്വേഷിക്കുന്നത്. വാതുവെപ്പ് വ്യവസായത്തില്‍ 18 വര്‍ഷമായി പ്രവര്‍ത്തിക്കുന്ന കമ്പനിയാണ് 1ഃആല.േ ബ്രാന്‍ഡിന്റെ ഉപഭോക്താക്കള്‍ക്ക് നിരവധി കായിക ഇനങ്ങളില്‍ വാതുവെപ്പ് നടത്താം. കമ്പനിയുടെ വെബ്സൈറ്റും ആപ്പും 70 ഭാഷകളില്‍ ലഭ്യമാണ്.
വിദേശ രാജ്യങ്ങളില്‍ ഉള്ളവ ഉള്‍പ്പെടെ, ഈ ജംഗമ, സ്ഥാവര സ്വത്തുക്കള്‍ കണ്ടുകെട്ടുന്നതിനുള്ള ഒരു താല്‍ക്കാലിക അറ്റാച്ച്‌മെന്റ് ഉത്തരവ് ഫെഡറല്‍ അന്വേഷണ ഏജന്‍സി ഉടന്‍ തന്നെ പുറപ്പെടുവിക്കുമെന്നാണ് വിവരം. ആസ്തികളുടെ മൂല്യനിര്‍ണയം നടക്കുകയാണ്. കള്ളപ്പണം വെളുപ്പിക്കല്‍ വഴി ലഭിക്കുന്ന തുകയില്‍ നിന്ന് സമ്പാദിച്ച സ്വത്തുക്കള്‍ കുറ്റകൃത്യത്തിന്റെ പരിധിയാണ് ഉള്‍പ്പെടുത്തിയിട്ടുള്ളത്. കണ്ടുകെട്ടല്‍ ഉത്തരവ് പുറപ്പെടുവിച്ച ശേഷം, അത് പിഎംഎല്‍എയ്ക്ക് കീഴിലുള്ള അഡ്ജുഡിക്കേറ്റിംഗ് അതോറിറ്റിക്ക് സ്ഥിരീകരണത്തിനായി അയയ്ക്കുമെന്നും, അംഗീകാരം ലഭിച്ചുകഴിഞ്ഞാല്‍, ഈ സ്വത്തുക്കള്‍ കണ്ടുകെട്ടുന്നതിനായി നിയുക്ത കോടതിയില്‍ കുറ്റപത്രം സമര്‍പ്പിക്കുമെന്നും ഇ ഡി വ്യക്തമാക്കിയതായി വാര്‍ത്താ ഏജന്‍സികള്‍ അറിയിച്ചു.
അടുത്തിടെ പുതിയ നിയമനിര്‍മ്മാണത്തിലൂടെ കേന്ദ്ര സര്‍ക്കാര്‍ റിയല്‍ മണി ഓണ്‍ലൈന്‍ ഗെയിമിംഗ് നിരോധിച്ചിരുന്നു. മാര്‍ക്കറ്റ് വിശകലന സ്ഥാപനങ്ങളുടെയും അന്വേഷണ ഏജന്‍സികളുടെയും കണക്കുകള്‍ പ്രകാരം, ഇത്തരം വിവിധ ഓണ്‍ലൈന്‍ വാതുവെപ്പ് ആപ്പുകളിലായി ഏകദേശം 22 കോടി ഇന്ത്യന്‍ ഉപയോക്താക്കളുണ്ട്. അതില്‍ പകുതിയും (ഏകദേശം 11 കോടി) സ്ഥിരം ഉപയോക്താക്കളാണ്.
