വിവാഹ അഭ്യര്‍ത്ഥന യുവതി നിരസിച്ചു; മറ്റൊരാളുമായി വിവാഹം നിശ്ചയിച്ചു; വിവാഹം മുടക്കാന്‍ യുവതിയുടെ അച്ഛനെ വെടിവച്ച് കൊലപ്പെടുത്തി; സിസിടിവി ദൃശ്യങ്ങള്‍ തെളിവായി; ബി ഫാം വിദ്യാര്‍ത്ഥി അറസ്റ്റില്‍
നോയിഡ: യുവതി വിവാഹാഭ്യര്‍ത്ഥന നിരസിക്കുകയും മറ്റൊരാളുമായി വിവാഹം നിശ്ചയിക്കുകയും ചെയ്തതിന്റെ പകയില്‍ യുവതിയുടെ പിതാവിനെ വെടിവച്ച് കൊലപ്പെടുത്തിയ 23കാരന്‍ അറസ്റ്റില്‍. മൂന്നാം വര്‍ഷ ബിഫാം വിദ്യാര്‍ത്ഥിയാണ് അറസ്റ്റിലായത്. ദീപക് ഗോസ്വാമി എന്ന 23കാരനാണ് അറസ്റ്റിലായത്. 2022 മുതല്‍ മെഡിക്കല്‍ റെപ് ജോലിയാണ് ദീപക് ചെയ്തിരുന്നത്. നോയിഡയിലാണ് സംഭവം.
ഗ്രേറ്റര്‍ നോയിഡയില്‍ സ്ഥല കച്ചവടം ചെയ്തിരുന്ന 45കാരനായ മഹിപാല്‍ ആണ് കൊല്ലപ്പെട്ടത്. ഇയാളുടെ മകളെ ദീപകിന് വിവാഹം ചെയ്യാന്‍ താല്‍പര്യമുണ്ടായിരുന്നു. എന്നാല്‍ യുവതി താല്‍പര്യമില്ലെന്ന് പ്രതികരിച്ചതിന് പിന്നാലെയാണ് യുവതിയുടെ പിതാവിനെ കൊലപ്പെടുത്തിയതെന്നാണ് പൊലീസ് സംഭവത്തേക്കുറിച്ച് പറയുന്നത്. ഇയാളില്‍ നിന്ന് തോക്ക്, തിരകള്‍, ഐഫോണ്‍, മോട്ടോര്‍ സൈക്കിള്‍ എന്നിവ പൊലീസ് കസ്റ്റഡിയില്‍ എടുത്തു. ധൂം ബൈപാസില്‍ നിന്നാണ് പൊലീസ് ഇയാളെ പിടികൂടിയത്.
ഗൗതം ബുദ്ധ നഗറിലെ ബംബാവാഡ് സ്വദേശിയാണ് കൊല്ലപ്പെട്ട 45കാരന്‍. ഇയാളുടെ നെഞ്ചില്‍ രണ്ട് തവണയാണ് 23കാരന്‍ നിറയൊഴിച്ചത്. ഈസ്റ്റേണ്‍ പെരിഫെറല്‍ എക്‌സ്പ്രസ് വേയില്‍ നിന്നാണ് മഹിപാലിന്റെ മൃതദേഹം കണ്ടെത്തിയത്. വെള്ളിയാഴ്ചയാണ് വഴിയാത്രക്കാര്‍ മധ്യവയസ്‌കനെ പരിക്കേറ്റ നിലയില്‍ കണ്ട വിവരം പൊലീസിനെ അറിയിച്ചത്. പൊലീസ് സ്ഥലത്തെത്തി ഇയാളെ ആശുപത്രിയിലെത്തിച്ചെങ്കിലും മരണം സ്ഥിരീകരിക്കുകയായിരുന്നു. ആറ് സംഘമായി തിരിഞ്ഞ് പൊലീസുകാര്‍ സംഭവം നടന്ന മേഖലയിലുള്ള സിസിടിവികള്‍ സൂക്ഷ്മമായി പരിശോധിച്ചു.
അന്‍പതിലേറെ സിസിടിവി പരിശോധിച്ചതിലാണ് അക്രമിയിലേക്കുള്ള സൂചന ലഭിച്ചത്. മഹിപാല്‍ മകളുടെ വിവാഹം ഡിസംബര്‍ മാസത്തില്‍ നടത്താന്‍ തീരുമാനിച്ചതാണ് 23കാരനെ പ്രകോപിതനാക്കിയത്. നിരവധി തവണ യുവതിയോട് വിവാഹ അഭ്യര്‍ത്ഥന നടത്തി പരാജയപ്പെട്ടതോടെയാണ് വിവാഹം മുടക്കാന്‍ മഹിപാലിനെ കൊലപ്പെടുത്താന്‍ 23കാരന്‍ തീരുമാനിച്ചത്. ഒരു മാസത്തിലേറെയാണ് ഇതിനായുള്ള തയ്യാറെടുപ്പിലായിരുന്നു 23കാരന്‍.
