തായി പള്ളിപ്പറമ്പന്‍ മനാഫിനെ ഒതായി പട്ടാപ്പകല്‍ അടിച്ചും കുത്തിയും കൊലപ്പെടുത്തിയ കേസ്; ഒന്നാം പ്രതി മാലങ്ങാടന്‍ ഷെഫീഖിന് ജീവപര്യന്തം; ശിക്ഷിച്ചത് പിവി അന്‍വറിന്റെ സഹോദരീ പുത്രനെ
മലപ്പുറം : ഓട്ടോറിക്ഷ ഡ്രൈവര്‍ ഒതായി പള്ളിപ്പറമ്പന്‍ മനാഫിനെ ഒതായി പട്ടാപ്പകല്‍ അടിച്ചും കുത്തിയും കൊലപ്പെടുത്തിയ കേസില്‍ ഒന്നാം പ്രതി മാലങ്ങാടന്‍ ഷെഫീഖിന് ജീവപര്യന്തം. മുന്‍ എംഎല്‍എ പി വി അന്‍വറിന്റെ സഹോദരീപുത്രനാണ് ഷെഫീഖ്. മഞ്ചേരി അഡീഷണല്‍ ജില്ലാ സെഷന്‍സ് കോടതി ജഡ്ജി എ വി ടെല്ലസാണ് ശിക്ഷവിധിച്ചത്. ഐപിസി 302 വകുപ്പ് പ്രകാരം കൊലപാതകക്കുറ്റമാണ് തെളിഞ്ഞത്. ഒരു ലക്ഷം രൂപ പിഴയും വിധിച്ചു. പിഴത്തുക മനാഫിന്റെ സഹോദരിക്ക് നല്‍കണം. പിഴ അടച്ചില്ലെങ്കില്‍ ഒരു വര്‍ഷം കൂടി തടവ് അനുഭവിക്കണം.
രണ്ടാം പ്രതി ഷെഫീഖിന്റെ സഹോദരന്‍ ഷെരീഫ്, മൂന്നാം പ്രതി നിലമ്പൂര്‍ ജനതപ്പടി കോട്ടപ്പുറം മുനീബ്, നാലാം പ്രതി എളമരം മപ്രം പയ്യനാട്ട്‌തൊടിക കബീര്‍ എന്ന ജാബിര്‍ എന്നിവരെ വെറുതെവിട്ടു. കൊലപാതകം നടന്ന് ശേഷം വിദേശത്തേക്കു കടന്ന് 25 വര്‍ഷം ഒളിവില്‍ കഴിഞ്ഞ പ്രതികളെയാണ് വിചാരണക്കെത്തിച്ചത്. സിബിഐയുടെ മുന്‍ സീനിയര്‍ സ്‌പെഷല്‍ പ്രോസിക്യൂട്ടര്‍ വി എന്‍ അനില്‍കുമാറായിരുന്നു സ്‌പെഷല്‍ പ്രോസിക്യൂട്ടര്‍. 1995 ഏപ്രില്‍ 13ന് ഒതായി അങ്ങാടിയില്‍ നാട്ടുകാര്‍ നോക്കിനില്‍ക്കെ പട്ടാപ്പകലാണ് മനാഫിനെ അടിച്ചും കുത്തിയും കൊലപ്പെടുത്തിയത്. കേസില്‍ രണ്ടാം പ്രതിയായിരുന്നു പി വി അന്‍വര്‍. ഒന്നാംസാക്ഷി കൂറുമാറിയതോടെ 2009ല്‍ പി വി അന്‍വര്‍ ഉള്‍പ്പെടെ 21 പ്രതികളെ കുറ്റവിമുക്തരാക്കിയിരുന്നു. ഏഴാം പ്രതിയായിരുന്ന അന്‍വറിന്റെ പിതാവ് പി വി ഷൗക്കത്തലി കുറ്റപത്രം സമര്‍പ്പിക്കുംമുമ്പെ മരിച്ചു.
1995ന് ഒതായി അങ്ങാടിയില്‍വച്ച് മനാഫിനെ നാട്ടുകാര്‍ നോക്കിനില്‍ക്കെ പ്രതികള്‍ അടിച്ചും കുത്തിയും കൊലപ്പെടുത്തിയെന്നാണ് കേസ്. കൊലപാതകശേഷം നാല് പ്രതികളും വിദേശത്തേക്ക് കടന്നു. 25 വര്‍ഷത്തോളം ഒളിവിലായിരുന്നു. മനാഫിന്റെ സഹോദരന്‍ അബ്ദുല്‍ റസാഖ് നടത്തിയ നിയമ പോരാട്ടത്തിനൊടുവിലാണ് ഇവര്‍ പിടിയിലായത്. അബ്ദുല്‍റസാഖ് കോടതിയെ സമീപിച്ചതോടെയാണ് മറ്റു നാലു പ്രതികളെയും ലുക്കൗട്ട് നോട്ടീസിറക്കി ഇന്റര്‍പോള്‍ സഹായത്തോടെ പിടികൂടാന്‍ മഞ്ചേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി 2018 ജൂലൈ 25ന് ഉത്തരവിട്ടത്.
ഒന്നാം പ്രതി ഷെഫീഖ് ദുബായില്‍ കഴിയുകയായിരുന്നു. കോവിഡ് പ്രതിസന്ധിയെ തുടര്‍ന്ന് ഷാര്‍ജയില്‍നിന്ന് ചാര്‍ട്ടേഡ് വിമാനത്തില്‍ കരിപ്പൂരിലെത്തിയപ്പോഴാണ് പിടിയിലായത്. ഇതോടെ അന്‍വറിന്റെ സഹോദരി പുത്രനും രണ്ടാം പ്രതിയുമായ മാലങ്ങാടന്‍ ഷെരീഫ് ഉള്‍പ്പെടെയുള്ള മൂന്ന് പ്രതികളും കീഴടങ്ങി. പി വി അന്‍വര്‍ അടക്കം വെറുതെവിട്ട 21 പ്രതികള്‍ക്ക് ശിക്ഷ നല്‍കണമെന്നാവശ്യപ്പെട്ടുള്ള അബ്ദുല്‍റസാഖിന്റെ റിവിഷന്‍ ഹര്‍ജി ഹൈക്കോടതിയുടെ പരിഗണനയിലാണ്.
