കരച്ചില് നിര്ത്താന് കുഞ്ഞിന്റെ വയറ്റിലിടിച്ച് കൊടുംക്രൂരത; പോസ്റ്റ്മോര്ട്ടം റിപ്പോര്ട്ട് വന്നതോടെ ആ നാടകം പൊളിഞ്ഞു; നെയ്യാറ്റിന്കരയില് ഒരു വയസുകാരനെ കൊന്നത് സ്വന്തം പിതാവ്; ചോദ്യം ചെയ്യലില് കുറ്റസമ്മതം
തിരുവനന്തപുരം: നെയ്യാറ്റിന്കരയിലെ ഒരു വയസുകാരന്റെ മരണത്തിലെ ദുരൂഹത നീങ്ങി. മരണം കൊലപാതകമാണെന്ന് പൊലീസ് സ്ഥിരീകരിച്ചു. കുട്ടിയുടെ അച്ഛന് ചോദ്യം ചെയ്യലില് കുറ്റം സമ്മതിച്ചു. കുട്ടിയെ മടിയിലിരുത്തി കൈമുട്ട് കൊണ്ട് വയറ്റില് ഇടിച്ചുവെന്നാണ് കുട്ടിയുടെ അച്ഛന് ഷിജിന്റെ മൊഴി. കാഞ്ഞിരംകുളം തവ്വാവിള ഷിജില് ഭവനില് താമസിക്കുന്ന ഷിജില്-കൃഷ്ണപ്രിയ ദമ്പതിമാരുടെ ഒരു വയസുള്ള മകന് ഇഹാനാണ് 16-ാം തീയതി കുഴഞ്ഞുവീണ് മരിച്ചത്. ഷിജിന് നല്കിയ ബിസ്കറ്റ് കഴിച്ചശേഷം കുഞ്ഞ് മരിച്ചുവെന്നായിരുന്നു ആദ്യം പുറത്തുവന്ന റിപ്പോര്ട്ടുകള്. ആന്തരിക രക്തസ്രാവമാണ് കുഞ്ഞിന്റെ മരണകാരണം എന്നായിരുന്നു പോസ്റ്റ്മോര്ട്ടം റിപ്പോര്ട്ട്.
നെയ്യാറ്റിന്കര ഡിവൈഎസ്പിയുടെ നേതൃത്വത്തില് ഇന്ന് വൈകിട്ട് നടത്തിയ ചോദ്യം ചെയ്യലിലാണ് കുറ്റസമ്മതം. കുട്ടിയുടെ അച്ഛന് ഷിജിനെ പൊലീസ് ഉടന് അറസ്റ്റ് ചെയ്യും. കഴിഞ്ഞ ശനിയാഴ്ചയാണ് ചികിത്സയിലിരിക്കെ ഒരു വയസ്സുകാരന് മരിച്ചത്. മരണത്തില് ദുരൂഹത തുടരുന്നതിനിടെയാണ് കുട്ടിയുടെ അച്ഛന്റെ കുറ്റസമ്മതം. അച്ഛന് കുറ്റം സമ്മതിച്ചതോടെ കൊലപാതകമടക്കമുള്ള വകുപ്പുകള് ചേര്ത്ത് പൊലീസ് കേസെടുക്കും.
കുഞ്ഞിന്റെ മരണത്തില് വ്യക്തതവരുത്താന് പോലീസ് പോസ്റ്റുമോര്ട്ടം റിപ്പോര്ട്ടിനായി കാത്തിരിക്കുകയായിരുന്നു. പോസ്റ്റുമോര്ട്ടം റിപ്പോര്ട്ടില് കുട്ടിയുടെ വയറ്റില് ചതവ് കണ്ടിരുന്നു. ഇതേത്തുടര്ന്നാണ് പോലീസ് പിതാവ് ഷിജിലിനെ വീണ്ടും വിശദമായി ചോദ്യം ചെയ്തതും ഷിജില് കുറ്റം സമ്മതിച്ചതും. കുഞ്ഞിന്റെ രാത്രിയുള്ള കരച്ചില് അസ്വസ്ഥപ്പെടുത്തിയിരുന്നുവെന്നാണ് ഷിജിലിന്റെ മൊഴി. കൈമുട്ടുകൊണ്ട് കുഞ്ഞിന്റെ വയറ്റില് ഇടിക്കുകയായിരുന്നുവെന്നും ഷിജില് സമ്മതിച്ചു. പോസ്റ്റുമോര്ട്ടം റിപ്പോര്ട്ടില് കണ്ടെത്തിയ ആന്തരിക രക്തസ്രാവം പിതാവിന്റെ കൈമുട്ടുകൊണ്ടേറ്റ ക്ഷതത്തെ തുടര്ന്നുണ്ടായതാണെന്ന് ഇതോടെ വ്യക്തമായി.
പോസ്റ്റ്മോര്ട്ടം റിപ്പോര്ട്ടില് ആന്തരിക രക്തസ്രാവം ഉണ്ടായെന്ന് കണ്ടെത്തിയെങ്കിലും അതിനുള്ള കാരണം തിരിച്ചറിയാനായിരുന്നില്ല. കുഞ്ഞിന്റെ വയറ്റില് ക്ഷതമുണ്ടായിരുന്നുവെന്നും കണ്ടെത്തിയിരുന്നു. സംഭവത്തിനുശേഷം കുട്ടിയുടെ മാതാപിതാക്കളെ പൊലീസ് ചോദ്യം ചെയ്തിരുന്നു. ആദ്യഘട്ടത്തില് ഇവരെ ചോദ്യം ചെയ്തപ്പോള് കാര്യമായ വിവരം ലഭിച്ചിരുന്നില്ല. നെയ്യാറ്റിന്കര കവളാകുളത്താണ് ഷിജിന്-കൃഷ്ണപ്രിയ ദമ്പതികളുടെ ഒരു വയസുള്ള കുട്ടിയുടെ മരണം. കുഞ്ഞിന്റെ കയ്യില് മൂന്നാഴ്ചയോളം പഴക്കമുള്ള പൊട്ടലുമുണ്ടായിരുന്നു.
ഇത് അറിഞ്ഞില്ലെന്നായിരുന്നു മാതാപിതാക്കള് നല്കിയ മൊഴി. കഴിഞ്ഞ വെള്ളിയാഴ്ച്ച രാത്രിയാണ് ഷിജിന്റെയും കൃഷ്ണപ്രിയയുടെയും മകനായ ഇഹാന് കുഴഞ്ഞ് വീണത്. പിന്നാലെ കുട്ടിയെ നെയ്യാറ്റിന്കര ജനറല് ആശുപത്രിയില് പ്രവേശിപ്പിച്ചു. എന്നാല്, ശനിയാഴ്ച്ച പുലര്ച്ചെ കുട്ടി മരിച്ചു. വെള്ളിയാഴ്ച്ച രാത്രി ഷിജിന് വാങ്ങികൊണ്ടുവന്ന ബിസ്കറ്റ് കഴിച്ചശേഷം കുഞ്ഞ് കുഴഞ്ഞുവീഴുകയായിരുന്നു. വായില് നിന്ന് നുരയും പതയും വന്നിരുന്നു. ചുണ്ടിനും വായ്ക്കും നിറ വ്യത്യാസമുണ്ടാവുകയും ചെയ്തു. ഇതിന്റെ സാമ്പിള് ഫോറന്സിക് പരിശോധനയ്ക്കും അയച്ചിരുന്നു.
ഷിജിലും കൃഷ്ണപ്രിയയും മൂന്നു മാസത്തിലേറെയായി പിരിഞ്ഞു താമസിക്കുകയായിരുന്നു. ബന്ധുക്കള് ഇടപെട്ടതിനെത്തുടര്ന്നാണ് ഇവര് വീണ്ടും ഒന്നിച്ചു താമസിക്കാന് തുടങ്ങിയത്. കുഞ്ഞ് ജനിക്കുമ്പോള് ഷിജില് ഒപ്പമില്ലായിരുന്നു. പിന്നീട് കുഞ്ഞിന് ആറുമാസം പ്രായമുള്ളപ്പോഴാണ് ഇരുവരും വീണ്ടും ഒന്നിച്ചു ജീവിക്കാന് തുടങ്ങിയത്. അതിനിടയിലാണ് അച്ഛന്റെ ഈ ക്രൂരകൃത്യം.
