കമലേശ്വരത്തെ സയനൈഡ് മരണം; ആ ചില്ല് കുപ്പിയിലെ മാരകവിഷം എവിടെ നിന്ന്? പോലീസ് അന്വേഷണം ഊര്ജിതം
തിരുവനന്തപുരം: കമലേശ്വരത്ത് ഭര്ത്താവിന്റെ ക്രൂരമായ പരിഹാസത്തിലും അപമാനത്തിലും മനംനൊന്ത് യുവതിയും അമ്മയും ജീവനൊടുക്കിയ സംഭവത്തില് സയനൈഡിന്റെ ഉറവിടം കണ്ടെത്താന് പൂന്തുറ പോലീസ് നടപടികള് വേഗത്തിലാക്കി. ഗ്രീമയും അമ്മ ബിന്ദുവും ആത്മഹത്യയ്ക്കായി സയനൈഡ് എങ്ങനെ കൈക്കലാക്കി എന്നതിലെ ദുരൂഹത നീക്കാനാണ് ശംഖുമുഖം അസിസ്റ്റന്റ് കമ്മീഷണറുടെ നേതൃത്വത്തിലുള്ള സംഘം ശ്രമിക്കുന്നത്.
മരിക്കുന്നതിന് മുന്പ് എഴുതിയ ആത്മഹത്യാക്കുറിപ്പില് സയനൈഡിനെക്കുറിച്ച് ഞെട്ടിക്കുന്ന വെളിപ്പെടുത്തലുണ്ട്. മാസങ്ങള്ക്ക് മുന്പ് ഹൃദയാഘാതം മൂലം അന്തരിച്ച ഗ്രീമയുടെ അച്ഛന് രാജീവിന്റെ കൈവശം സയനൈഡ് ഉണ്ടായിരുന്നുവെന്നാണ് കുറിപ്പില് പറയുന്നത്. സ്വര്ണ്ണപ്പണിക്കാരുമായി ബന്ധപ്പെട്ട ജോലിയോ മറ്റോ രാജീവിനുണ്ടായിരുന്നോ എന്നും അതുവഴി സയനൈഡ് ശേഖരിച്ചിരുന്നോ എന്നും പോലീസ് പരിശോധിക്കുന്നുണ്ട്. എന്നാല് അച്ഛന്റെ മരണശേഷം ഇത്രയും കാലം ഇത് എവിടെയായിരുന്നു എന്നതും ആരെങ്കിലും ഇവര്ക്ക് എത്തിച്ചു നല്കിയതാണോ എന്നതും അന്വേഷണ പരിധിയിലുണ്ട്.
രാജീവിന്റെ വേര്പാടില് തകര്ന്നിരുന്ന ഗ്രീമയെയും അമ്മയെയും ഭര്ത്താവ് ഉണ്ണിക്കൃഷ്ണന് നിരന്തരം മാനസികമായി പീഡിപ്പിച്ചിരുന്നു. ഇതിനിടെ ഒരു ബന്ധുവിന്റെ മരണാനന്തര ചടങ്ങിനായി നാട്ടിലെത്തിയ ഉണ്ണിക്കൃഷ്ണന് അവിടെ വെച്ച് ഗ്രീമയെയും അമ്മയെയും പരസ്യമായി ആക്ഷേപിക്കുകയും അപമാനിക്കുകയും ചെയ്തു. ഇതില് മനംനൊന്ത് വീട്ടിലെത്തിയ ഇരുവരും ഉടന് തന്നെ വിഷം കഴിച്ച് ജീവിതം അവസാനിപ്പിക്കുകയായിരുന്നു. ഇരുവരുടെയും ആന്തരികാവയവങ്ങളുടെ പരിശോധനാഫലം ലഭിച്ചാല് മാത്രമേ സയനൈഡ് തന്നെയാണ് മരണകാരണമെന്ന് ഔദ്യോഗികമായി സ്ഥിരീകരിക്കാനാകൂ.
സംഭവത്തിന് പിന്നാലെ ഉണ്ണിക്കൃഷ്ണന് രക്ഷപ്പെടാന് ശ്രമിച്ചിരുന്നു. പോലീസിനെ വെട്ടിച്ച് വിദേശത്തേക്ക് കടക്കാന് വിമാനത്താവളത്തിലെത്തിയ ഇയാളെ പൂന്തുറ പോലീസ് അതിസാഹസികമായാണ് പിടികൂടിയത്. ഗാര്ഹിക പീഡനം, ആത്മഹത്യാ പ്രേരണ എന്നീ കുറ്റങ്ങള് ചുമത്തി ഇയാളെ കോടതി റിമാന്ഡ് ചെയ്തു. ഉണ്ണിക്കൃഷ്ണനെ കസ്റ്റഡിയില് വാങ്ങി കൂടുതല് ചോദ്യം ചെയ്യുന്നതോടെ കുടുംബത്തിനുള്ളില് നടന്ന മറ്റ് ക്രൂരതകളും പുറത്തുവരുമെന്നാണ് പോലീസ് കരുതുന്നത്.
