ശരീരം മുഴുവൻ കുത്തികീറി ആകെ വികൃതമാക്കി; നിമിഷ നേരം കൊണ്ട് മുറി മുഴുവൻ ചോരക്കളമായി; വേദന കൊണ്ട് അലറിവിളിച്ചപ്പോൾ കഴുത്ത് ഞെരിച്ച് ക്രൂരത; കാമുകി രക്ഷപ്പെട്ടത് ഭാഗ്യം കൊണ്ട് മാത്രം; സർഫിംഗ് ഇതിഹാസം കുർട്ട് വാന്റെ അരുംകൊലയിൽ ഞെട്ടൽ; വീട്ടിൽ കയറിയവരുടെ ഉദ്ദേശലക്ഷ്യം വെളിപ്പെടുത്തി പോലീസ്
കോസ്റ്റാറിക്ക: സർഫിംഗ് ലോകത്തെ അതികായനും കാലിഫോർണിയ സ്വദേശിയുമായ 66-കാരൻ കുർട്ട് വാൻ ഡൈക്കിനെ കോസ്റ്റാറിക്കയിലെ ടലാമാങ്കയിലുള്ള അദ്ദേഹത്തിന്റെ അപ്പാർട്ട്മെന്റിൽ കൊല്ലപ്പെട്ട നിലയിൽ കണ്ടെത്തി. വീട് കൊള്ളയടിക്കാനുള്ള ശ്രമത്തിനിടെ നടന്ന ക്രൂരമായ ആക്രമണമാണ് അദ്ദേഹത്തിന്റെ ജീവനെടുത്തതെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.
ശനിയാഴ്ച രാവിലെ ഏകദേശം 10:50-ഓടെയാണ് സംഭവം പുറംലോകമറിയുന്നത്. കുർട്ട് വാൻ ഡൈക്കും അദ്ദേഹത്തിന്റെ 31 വയസ്സുള്ള കാമുകിയും അപ്പാർട്ട്മെന്റിൽ ഉണ്ടായിരുന്ന സമയത്ത് രണ്ട് സായുധധാരികൾ ഉള്ളിൽ കടക്കുകയായിരുന്നു. കുർട്ടിനെ മർദ്ദിക്കുകയും ശ്വാസം മുട്ടിച്ച് കൊല്ലുകയും ചെയ്ത ശേഷം കൊള്ളക്കാർ വിലപിടിപ്പുള്ള വസ്തുക്കളും അവരുടെ കാറും മോഷ്ടിച്ച് കടന്നുകളഞ്ഞു.
കുർട്ടിന്റെ ശരീരത്തിൽ ഒന്നിലധികം കുത്തേറ്റ മുറിവുകൾ ഉണ്ടായിരുന്നതായും കഴുത്ത് ഞെരിച്ചതിന്റെ ലക്ഷണങ്ങൾ കണ്ടതായും കോസ്റ്റാറിക്കയിലെ ജുഡീഷ്യൽ ഇൻവെസ്റ്റിഗേഷൻ ഏജൻസി (OIJ) അറിയിച്ചു. കട്ടിലിന് താഴെ തലയിൽ ഷീറ്റ് പുതച്ച നിലയിലായിരുന്നു മൃതദേഹം കണ്ടെത്തിയത്.
കുർട്ടിന്റെ കാമുകിയെ അക്രമികൾ കൈകാലുകൾ കെട്ടിയിട്ട ശേഷം ഉപദ്രവിച്ചെങ്കിലും അവർ നിസ്സാര പരിക്കുകളോടെ രക്ഷപ്പെട്ടു. അവർ നൽകിയ മൊഴിയുടെ അടിസ്ഥാനത്തിലാണ് അന്വേഷണം പുരോഗമിക്കുന്നത്.
കാലിഫോർണിയയിലെ സാന്താ ക്രൂസിൽ നിന്നുള്ള വാൻ ഡൈക്ക് കുടുംബം സർഫിംഗ് രംഗത്തെ പ്രശസ്തരാണ്. കുർട്ടിന്റെ പിതാവ് ജീൻ വാൻ ഡൈക്ക് വടക്കൻ കാലിഫോർണിയയിലെ സർഫിംഗ് ഇതിഹാസമായിരുന്നു. മാതാവ് ബെറ്റി വാൻ ഡൈക്ക് 1950-കളിൽ സ്ത്രീ സർഫർമാർക്കിടയിൽ വലിയ മാറ്റങ്ങൾ കൊണ്ടുവന്ന വ്യക്തിയായിരുന്നു.
1980-കളിൽ കോസ്റ്റാറിക്കയിലേക്ക് താമസം മാറിയ കുർട്ട് അവിടെ ഒരു ഹോട്ടൽ നടത്തിവരികയായിരുന്നു. അവിടുത്തെ വിനോദസഞ്ചാര മേഖലയിലും സർഫിംഗ് കമ്മ്യൂണിറ്റിയിലും അദ്ദേഹം വളരെ പ്രിയപ്പെട്ടവനായിരുന്നു. "കിംഗ്" (The King) എന്ന വിളിപ്പേരിലായിരുന്നു സർഫിംഗ് സർക്കിളുകളിൽ അദ്ദേഹം അറിയപ്പെട്ടിരുന്നത്.
അതീവ സുരക്ഷിതമെന്ന് കരുതപ്പെടുന്ന കോസ്റ്റാറിക്കൻ തീരപ്രദേശത്ത് നടന്ന ഈ കൊലപാതകം പ്രദേശവാസികളെയും ടൂറിസ്റ്റുകളെയും ഭീതിയിലാഴ്ത്തിയിട്ടുണ്ട്. പ്രതികളെ കണ്ടെത്താനായി പോലീസ് വ്യാപകമായ തിരച്ചിൽ ആരംഭിച്ചു. പ്രതികൾ കടന്നുകളഞ്ഞ 2013 മോഡൽ ഹ്യുണ്ടായ് എലാൻട്ര കാറിനായി പോലീസ് അന്വേഷണം തുടരുകയാണ്.
കുർട്ടിന്റെ വിയോഗത്തിൽ വലിയ അനുശോചനമാണ് സോഷ്യൽ മീഡിയയിൽ ഉയരുന്നത്. "ചിലർ കാലടയാളങ്ങൾ ബാക്കി വെക്കുന്നു, നീ തിരമാലകളെ ബാക്കി വെച്ചാണ് പോകുന്നത്" എന്നായിരുന്നു അദ്ദേഹത്തിന്റെ സുഹൃത്തായ റൊണാൾഡ് ഉമാനയുടെ ഹൃദയസ്പർശിയായ വാക്കുകൾ.
