കഴിഞ്ഞ വര്ഷം പലതവണ ലൈംഗികപീഡനത്തിന് ഇരയായി; പ്ലസ് വണ് വിദ്യാര്ത്ഥി ജീവനൊടുക്കിയ നിലയില്; ബന്ധുവും അയല്ക്കാരനും അറസ്റ്റില്; പ്രതികള് പിടിയിലായിട്ടും പെണ്കുട്ടി കടുത്ത മാനസിക സംഘര്ഷത്തിലായിരുന്നുവെന്ന് വിവരം
കല്പറ്റ: വയനാട്ടില് ലൈംഗിക പീഡനത്തിന് ഇരയായ പ്ലസ് വണ് വിദ്യാര്ത്ഥി ജീവനൊടുക്കി. തിങ്കളാഴ്ചയാണ് പ്ലസ് വണ് വിദ്യാര്ത്ഥിനി ആത്മഹത്യ ചെയ്തത്. വിദ്യാര്ത്ഥിനിയെ പീഡിപ്പിച്ച കേസില് 2 പേരെ പൊലീസ് അറസ്റ്റ് ചെയ്തിരുന്നു. ബന്ധുവും അയല്വാസിയുമാണ് കേസില് അറസ്റ്റില് ആയത്. പീഡനത്തിന് ഇരയായ വിവരം സ്കൂള് അധികൃതരാണ് പോലീസിനെ അറിയിച്ചത്.
കഴിഞ്ഞ തിങ്കളാഴ്ച വീട്ടില് തൂങ്ങിമരിച്ച നിലയില് പെണ്കുട്ടിയെ വീട്ടുകാര് കണ്ടെത്തുകയായിരുന്നു. കുട്ടി പല തവണ പീഡനത്തിന് ഇരയായി എന്ന ഞെട്ടിക്കുന്ന വിവരമാണ് പുറത്തുവരുന്നത്. 2024-25 വര്ഷത്തിലാണ് പെണ്കുട്ടി അതിക്രമത്തിന് ഇരയായത്. സ്കൂളിലെ കൗണ്സിലിംഗിലാണ് കുട്ടി ഇക്കാര്യം വെളിപ്പെടുത്തുന്നത്. കഴിഞ്ഞ പത്താം തീയതി സ്കൂള് അധികൃതര് പൊലീസിനെ അറിയിക്കുന്നത്. കുട്ടിയുടെ മൊഴിയുടെ അടിസ്ഥാനത്തില് 2 പേരെ പൊലീസ് അറസ്റ്റ് ചെയ്തിരുന്നു. പ്രതികള് പിടിയിലായെങ്കിലും കടുത്ത മാനസിക സംഘര്ഷത്തിലായിരുന്നു പെണ്കുട്ടിയെന്നും അതാണ് ജീവനൊടുക്കുന്നതിലേക്ക് നയിച്ചതെന്നുമാണ് വിവരം. സംഭവത്തില് പൊലീസ് അസ്വഭാവിക മരണത്തിന് കേസെടുത്തു. അന്വേഷണം കൂടുതല് പേരിലേക്കും എത്തിയേക്കാനും സാധ്യതയുണ്ട്.
