വടുതലയെ കണ്ണീരിലാഴ്ത്തി അഞ്ചംഗ കുടുംബത്തിന്റെ അന്ത്യം; ചികിത്സയ്ക്കായെത്തി മരണത്തിന് കീഴടങ്ങി; മുറിയില് കണ്ടത് രണ്ട് സ്ത്രീകളുടെയും മൂന്ന് കുഞ്ഞുങ്ങളുടെയും ചേതനയറ്റ ശരീരങ്ങള്; മരിച്ചത് വിളപ്പില്ശാല സ്വദേശികള്; ആത്മഹത്യയെന്ന് പ്രാഥമിക നിഗമനം
കൊച്ചി: വടുതലയിലെ കര്മ്മല റോഡില് ചികിത്സയ്ക്കായി തിരുവനന്തപുരത്തുനിന്നും കൊച്ചിയിലെത്തിയ വിളപ്പില്ശാല സ്വദേശികളായ അഞ്ചംഗ കുടുംബത്തെ വാടകവീട്ടില് മരിച്ച നിലയില് കണ്ടെത്തി. രണ്ട് സ്ത്രീകളും മൂന്ന് പിഞ്ചുകുഞ്ഞുങ്ങളുമാണ് മുറിയില് മരണത്തിന് കീഴടങ്ങിയത്. ആത്മഹത്യയാണെന്ന പ്രാഥമിക നിഗമനത്തിലാണ് പോലീസ്.
തിരുവനന്തപുരം വിളപ്പില്ശാല സ്വദേശികളായ ഇവര് ഏകദേശം രണ്ട് മാസങ്ങള്ക്ക് മുന്പാണ് കൊച്ചിയിലെത്തിയത്. ആസ്റ്റര് മെഡിസിറ്റിയിലെ ചികിത്സയുമായി ബന്ധപ്പെട്ടാണ് ഇവര് വടുതലയില് വാടകയ്ക്ക് താമസിച്ചുവന്നിരുന്നത്. രണ്ട് നിലകളുള്ള വീടിന്റെ താഴത്തെ നിലയിലായിരുന്നു ഇവരുടെ താമസം. മുകളിലത്തെ നില പൂട്ടിയിട്ടിരിക്കുകയായിരുന്നു. കഴിഞ്ഞ കുറച്ചു ദിവസങ്ങളായി വീടിനുള്ളില് നിന്നും അനക്കങ്ങളൊന്നും കാണാത്തതിനെ തുടര്ന്ന് അയല്വാസികള് നടത്തിയ പരിശോധനയിലാണ് ഞെട്ടിക്കുന്ന വിവരം പുറംലോകമറിഞ്ഞത്.
വാതില് തുറന്ന് അകത്തു കയറിയവര് കണ്ടത് കണ്ടുനില്ക്കാനാവാത്ത ദൃശ്യങ്ങളായിരുന്നു. രണ്ട് സ്ത്രീകള് ഫാനില് തൂങ്ങിമരിച്ച നിലയിലായിരുന്നു. പിഞ്ചുകുഞ്ഞുങ്ങള് കിടപ്പുമുറിയിലെ കട്ടിലില് ചലനമറ്റ നിലയില് കിടക്കുകയായിരുന്നു. കുട്ടികള്ക്ക് വിഷം നല്കിയ ശേഷം സ്ത്രീകള് ആത്മഹത്യ ചെയ്തതാകാമെന്നാണ് പോലീസിന്റെ പ്രാഥമിക നിഗമനം. മൃതദേഹങ്ങള്ക്ക് ദിവസങ്ങളുടെ പഴക്കമുണ്ടോ എന്നും സംശയിക്കുന്നുണ്ട്.
സംഭവമറിഞ്ഞ ഉടന് നോര്ത്ത് പോലീസ് സ്ഥലത്തെത്തി മേല്നടപടികള് സ്വീകരിച്ചു. ഇന്ക്വസ്റ്റ് നടപടികള്ക്ക് ശേഷം മൃതദേഹങ്ങള് പോസ്റ്റ്മോര്ട്ടത്തിനായി മാറ്റി. ചികിത്സാ സംബന്ധമായ മാനസിക വിഷമമാണോ അതോ സാമ്പത്തിക പ്രതിസന്ധിയാണോ ഇത്തരമൊരു കടുത്ത തീരുമാനത്തിലേക്ക് ഇവരെ നയിച്ചതെന്ന് പോലീസ് അന്വേഷിച്ചു വരികയാണ്. അയല്വാസികളില് നിന്നും ബന്ധുക്കളില് നിന്നും പോലീസ് മൊഴിയെടുക്കുന്നുണ്ട്.
ചികിത്സ തേടിയെത്തിയ കുടുംബം ഇങ്ങനെ അന്ത്യം കുറിച്ചത് വടുതല നിവാസികളെ ഒന്നടങ്കം നടുക്കിയിരിക്കുകയാണ്. പോസ്റ്റ്മോര്ട്ടം റിപ്പോര്ട്ട് പുറത്തുവരുന്നതോടെ മരണത്തിന്റെ കൃത്യമായ കാരണം വ്യക്തമാകും.
