സ്വകാര്യ ആശുപത്രിയിലെ നഴ്‌സ് ആത്മഹത്യ ചെയ്ത സംഭവം; അമീന നേരിട്ടത് കടുത്ത അനീതി; കോഴ്‌സ് കഴിഞ്ഞ് വിദേശത്തേക്ക് പോകാനിരിക്കെയാണ് ആത്മഹത്യ; മറ്റ് ജീവനക്കാരും നേരിടുന്നത് വലിയ പ്രശ്‌നം; താമസിക്കുന്നത് തകരഷീറ്റിന് കീഴെ
കുറ്റിപ്പുറം: സ്വകാര്യ ആശുപത്രിയില്‍ ഒ.ടി. പരിശീലനത്തിനായി എത്തിയ ആന്ധ്രാപ്രദേശിലെ അമീനയുടെ ആത്മഹത്യയ്ക്ക് പിന്നാലെ ആരംഭിച്ച അന്വേഷണത്തില്‍ ഗുരുതര തെളിവുകളാണ് പുറത്തുവന്നത്. വൈദ്യപരിശീലനത്തിനായി കൊണ്ടുവന്ന വിദ്യാര്‍ഥിനിയായ അമീനയോട് ജനറല്‍ മാനേജര്‍ അബ്ദുല്‍ റഹ്‌മാന്‍ വളരെ മോശമവയും അനീതിപൂര്‍ണവുമായും പെരുമാറിയതാണെന്ന് അന്വേഷണസംഘം കണ്ടെത്തിയതായി പൊലീസ് അറിയിച്ചു.
എറണാകുളം കോതമംഗലത്തെ സ്ഥാപനത്തില്‍ പരിശീലനം നടത്തിവരികയായിരുന്ന അമീനയെ പ്രായോഗിക പരിശീലനത്തിനായി കുറ്റിപ്പുറത്തെ സ്വകാര്യ ആശുപത്രിയിലേക്കാണ് അയച്ചത്. 2024 ഡിസംബറില്‍ പരിശീലനം പൂര്‍ത്തിയാക്കിയെങ്കിലും പരിചയസര്‍ട്ടിഫിക്കറ്റ് നല്‍കാതെ മാനേജറുടെ സമ്മര്‍ദ്ദത്തില്‍ കൂടി ആ ആശുപത്രിയില്‍ കൂടി തുടരേണ്ടി വന്നു. പിന്നീട് ഗള്‍ഫില്‍ ജോലി ലഭിച്ചെങ്കിലും സര്‍ട്ടിഫിക്കറ്റ് നിഷേധിച്ചതിച്ചു. ഇതാണ് മരണത്തിലേക്ക് നയിച്ചത്.
അമീനയെ അറിയാത്ത ജോലികള്‍ ചെയ്യാന്‍ നിര്‍ബന്ധിച്ചെന്നും ഇത് പുറത്ത് പറഞ്ഞാല്‍ സര്‍ട്ടിഫിക്കറ്റ് നിഷേധിക്കുമെന്ന് ഭീഷണിപ്പെടുത്തിയെന്നുമാണ് അന്വേഷണ റിപ്പോര്‍ട്ടില്‍ പറയുന്നത്. തൊഴിലിടത്തിലെ മോശം സാഹചര്യങ്ങള്‍ ജീവനക്കാരുടെയും മുന്‍ ജീവനക്കാരുടെയും മൊഴികളില്‍ പ്രതിഫലിച്ചു. ആശുപത്രി ജീവനക്കാര്‍ക്ക് ആവശ്യമായ അടിസ്ഥാന സൗകര്യങ്ങള്‍ പോലും ലഭ്യമായിരുന്നില്ല. തകരഷീറ്റിനു കീഴിലുള്ള താമസവും ശോചനീയമായ ശുചിമുറികളും ഇരുമ്പുകട്ടിലുമാണ് അവശേഷിച്ച സൗകര്യങ്ങള്‍. സ്വകാര്യസ്ഥാപനമായിട്ടും ജീവനക്കാരെ മാനുഷികതയില്ലാതെ കൈകാര്യം ചെയ്തിരുന്ന സാഹചര്യത്തില്‍ നിരവധി പരാതികള്‍ ഉയര്‍ന്നിട്ടുണ്ടായിരുന്നുവെങ്കിലും അധികൃതര്‍ അവയെ കണ്ടിരുന്നില്ലെന്നും പരാതി ലഭിച്ചിട്ടുണ്ട്.
ഒളിവില്‍ പോയിരുന്ന ജനറല്‍ മാനേജറെ പൊലീസ് കഴിഞ്ഞ ദിവസം പിടികൂടുകയായിരുന്നു. മലപ്പുറം ജില്ലാ പൊലീസ് മേധാവി ആര്‍. വിശ്വനാഥിന്റെ നിര്‍ദേശപ്രകാരം രൂപീകരിച്ച പ്രത്യേക സംഘമാണ് അറസ്റ്റ് നടത്തിയത്. പ്രതിയെ ബുധനാഴ്ച കോടതിയില്‍ ഹാജരാക്കി റിമാന്‍ഡ് ചെയ്തു. സംഭവത്തെ തുടര്‍ന്ന് ആശുപത്രിയിലെ ജീവനക്കാരുടെയും സ്ഥാപന സംവിധാനങ്ങളുടെയും കാര്യത്തില്‍ ആരോഗ്യ വകുപ്പ് ഉദ്യോഗസ്ഥര്‍ പരിശോധനയ്ക്ക് തയ്യാറെടുക്കുന്നുവെന്നാണ് വിവരം. നിയമപരമായ നടപടികള്‍ തുടരുമെന്നും പൊലീസ് അറിയിച്ചു.
