അവയവം ആവശ്യം ഉള്ളവരില്‍ നിന്ന് 50 ലക്ഷം വരെ വാങ്ങുമ്പോള്‍, ദാനം ചെയ്യുന്നവര്‍ക്ക് 6 ലക്ഷം മാത്രം; വാഗ്ദാനം ചെയ്ത തുക പോലും പലപ്പോഴും കിട്ടില്ല; മെഡിക്കല്‍ ടൂറിസത്തിന്റെ മറവില്‍ മനുഷ്യക്കടത്തും അവയവക്കടത്തും; കൊച്ചിയിലെ 'സ്റ്റെമ്മ ക്ലബ്ബ്' മുഖ്യ പണമിടപാട് കേന്ദ്രം; മലയാളികള്‍ അടക്കം സൂത്രധാരന്‍മാര്‍ എന്‍.ഐ.എ. കസ്റ്റഡിയില്‍
മെഡിക്കല്‍ ടൂറിസത്തിന്റെ മറവില്‍ മനുഷ്യക്കടത്തും അവയവക്കടത്തും
കൊച്ചി: രാജ്യാന്തര അവയവക്കടത്ത് റാക്കറ്റിന്റെ പണമിടപാടുകള്‍ നടന്നത് കൊച്ചിയിലെ മെഡിക്കല്‍ ട്രീറ്റ്‌മെന്റ് ടൂറിസം സ്ഥാപനമായ 'സ്റ്റെമ്മ ക്ലബ്ബ്' വഴിയെന്ന് ദേശീയ അന്വേഷണ ഏജന്‍സി (എന്‍.ഐ.എ.). കേസില്‍ അറസ്റ്റിലായ പാലാരിവട്ടം സ്വദേശി മധു ജയകുമാറിനെ കസ്റ്റഡിയില്‍ ആവശ്യപ്പെട്ട് പ്രത്യേക കോടതിയില്‍ നല്‍കിയ അപേക്ഷയിലാണ് എന്‍.ഐ.എ. ഈ നിര്‍ണായക വിവരം വ്യക്തമാക്കിയത്.
അവയവക്കടത്തിനു പിന്നില്‍ കൂടുതല്‍ മലയാളികള്‍ ഉള്‍പ്പെട്ടിട്ടുണ്ടെന്നും ഏജന്‍സി സൂചന നല്‍കുന്നുണ്ട്. കേസില്‍ അറസ്റ്റിലായ മധു ജയകുമാറിനെ ഈ മാസം 24 വരെ എന്‍.ഐ.എ. കസ്റ്റഡിയില്‍ വിട്ടു.
'സ്റ്റെമ്മ ക്ലബ്ബ്': മനുഷ്യക്കടത്തിനുള്ള മറ
മെഡിക്കല്‍ ടൂറിസം സ്ഥാപനമെന്ന് വിശ്വസിപ്പിച്ച് മധു ജയകുമാര്‍ ആരംഭിച്ച സ്റ്റെമ്മ ക്ലബ്ബിനെ, മനുഷ്യക്കടത്തിനും അവയവക്കച്ചവടത്തിനുമുള്ള മറയായി ഉപയോഗിക്കുകയായിരുന്നു എന്നാണ് കേന്ദ്ര അന്വേഷണ ഏജന്‍സിയുടെ വിലയിരുത്തല്‍. അവയവക്കടത്തുമായി ബന്ധപ്പെട്ട എല്ലാ പണവും എത്തിയിരുന്നത് സ്റ്റെമ്മ ക്ലബ്ബിന്റെ പേരിലായിരുന്നു.
സംഘം ഓരോ അവയവ ഇടപാടിനും ആവശ്യക്കാരില്‍ നിന്ന് 50 ലക്ഷം രൂപ വരെ ഈടാക്കുന്നുണ്ട്. എന്നാല്‍ അവയവം ദാനം ചെയ്യുന്നവര്‍ക്ക് വാഗ്ദാനം ചെയ്തിരുന്നത് 6 ലക്ഷം രൂപ മാത്രമാണ്. ഈ വാഗ്ദാനം ചെയ്ത തുക പോലും ദാതാക്കള്‍ക്ക് പൂര്‍ണമായി ലഭിച്ചിരുന്നില്ലെന്നും വിവരം പുറത്തുവന്നിട്ടുണ്ട്.
ഇറാന്‍ റൂട്ടില്‍ മനുഷ്യക്കടത്ത്
തൃശൂര്‍ സ്വദേശി സാബിത് നാസര്‍ കഴിഞ്ഞ വര്‍ഷം മേയ് 18-ന് നെടുമ്പാശേരി വിമാനത്താവളത്തില്‍ പിടിയിലായതോടെയാണ് രാജ്യാന്തര അവയവക്കടത്ത് സംഘത്തെക്കുറിച്ചുള്ള വിവരങ്ങള്‍ പുറത്തുവന്നത്. കൊച്ചി, കുവൈറ്റ്, ഇറാന്‍ റൂട്ടില്‍ നിരന്തരം യാത്ര ചെയ്തിരുന്ന സാബിത് നാസറാണ് വൃക്ക നല്‍കാന്‍ തയ്യാറാകുന്നവരെ കണ്ടെത്തി ഇറാനിലേക്ക് കടത്തിയിരുന്നത്. വൃക്ക നല്‍കുന്നത് നിയമപരമാണെന്ന് വിശ്വസിപ്പിക്കാനായി വ്യാജരേഖകള്‍ നിര്‍മ്മിച്ചാണ് ഇയാള്‍ ആളുകളെ ഇറാനിലേക്ക് കൊണ്ടുപോയത്.
അവയവ ദാതാക്കളില്‍ ഭൂരിഭാഗവും കര്‍ണാടക, ആന്ധ്രപ്രദേശ്, തെലങ്കാന സംസ്ഥാനങ്ങളില്‍ നിന്നുള്ളവരും, സ്വീകര്‍ത്താക്കള്‍ ഉത്തരേന്ത്യന്‍ സംസ്ഥാനങ്ങളില്‍ നിന്നുള്ളവരുമാണ്.
മുഖ്യസൂത്രധാരന്മാരും അറസ്റ്റില്‍
സാബിത് നാസറിന് പിന്നാലെ അവയവക്കടത്തിലെ മുഖ്യസൂത്രധാരന്‍ എന്ന് കരുതപ്പെടുന്ന ഹൈദരാബാദ് സ്വദേശി ബെല്ലംകൊണ്ട രാമപ്രസാദ്, പണം കൈകാര്യം ചെയ്തിരുന്ന കൊച്ചി എടത്തല സ്വദേശി സജിത്ത് ശ്യാം എന്നിവരും അറസ്റ്റിലായിരുന്നു.
ഇറാനില്‍ നിന്ന് നവംബര്‍ ഏഴിന് കൊച്ചി അന്താരാഷ്ട്ര വിമാനത്താവളത്തില്‍ എത്തിയപ്പോഴാണ് കേസിന്റെ പ്രധാന പ്രതികളിലൊരാളായ മധു ജയകുമാറിനെ ആദ്യം പോലീസ് അറസ്റ്റ് ചെയ്തത്. പിന്നീട് കേസ് എന്‍.ഐ.എ. ഏറ്റെടുക്കുകയായിരുന്നു. റാക്കറ്റിന്റെ പ്രവര്‍ത്തനങ്ങളെക്കുറിച്ച് കൂടുതല്‍ വിവരങ്ങള്‍ ശേഖരിക്കുന്നതിനായി സ്റ്റെമ്മ ക്ലബ്ബിന്റെ പ്രവര്‍ത്തനങ്ങളെക്കുറിച്ച് വിശദമായ അന്വേഷണം എന്‍.ഐ.എ. നടത്തുന്നുണ്ട്.
