ഒട്ടും വയ്യാതെ..ആശുപത്രി നടയിൽ എത്തിയവർ ഒന്ന് പതറി; അടിച്ചു പൂസായി ഒരാളുടെ അഴിഞ്ഞാട്ടം; വരുന്നവരോട് എല്ലാം മോശമായി സംസാരിച്ച് മുഴുവൻ ബഹളം; അവസാനം ഗതികെട്ട് ഇടപെട്ടത് രോഗികൾ; ശല്യക്കാരനെ കണ്ട് പോലിസിന് തലവേദന

തിരുവനന്തപുരം: തിരുവനന്തപുരം ജില്ലയിലെ വെള്ളറട സാമൂഹ്യാരോഗ്യ കേന്ദ്രത്തിൽ (സി.എച്ച്.സി.) മദ്യലഹരിയിൽ ഡ്യൂട്ടിക്കെത്തിയ ഡോക്ടർ ആശുപത്രിയിൽ പരിഭ്രാന്തി സൃഷ്ടിച്ചു. കഴിഞ്ഞ ദിവസം രാത്രി ഡ്യൂട്ടിയിൽ പ്രവേശിച്ച ഡോക്ടർ രോഗികളോടും കൂട്ടിരിപ്പുകാരോടും മോശമായി പെരുമാറുകയും തുടർന്ന് തർക്കത്തിൽ ഏർപ്പെടുകയുമായിരുന്നു. സംഭവത്തിൽ രോഗികളുടെയും നാട്ടുകാരുടെയും പരാതിയെത്തുടർന്ന് ഡോക്ടറെ വെള്ളറട പോലീസ് കസ്റ്റഡിയിലെടുക്കുകയും അറസ്റ്റ് രേഖപ്പെടുത്തുകയും ചെയ്തു.

വ്യാഴാഴ്ച രാത്രിയായിരുന്നു പൊതുജനാരോഗ്യ സംവിധാനത്തെ തന്നെ നാണക്കേടിലാക്കിയ സംഭവം. രാത്രി ഷിഫ്റ്റിൽ ഡ്യൂട്ടിയിലുണ്ടായിരുന്ന ഡോക്ടർ ജിത്തുവിനെതിരെയാണ് രോഗികൾ പരാതിയുമായി രംഗത്തെത്തിയത്. അത്യാസന്ന നിലയിലുള്ള രോഗികൾ അടക്കം ചികിത്സ തേടി ആശുപത്രിയിലെത്തിയ സമയത്താണ് ഡോക്ടർ മദ്യലഹരിയിൽ എത്തുകയും കൃത്യനിർവ്വഹണത്തിൽ വീഴ്ച വരുത്തുകയും ചെയ്തത്. ഡോക്ടറുടെ സംസാരത്തിലും പെരുമാറ്റത്തിലുമുള്ള അസ്വാഭാവികത ശ്രദ്ധയിൽപ്പെട്ടതോടെ രോഗികളും കൂട്ടിരിപ്പുകാരും ഇത് ചോദ്യം ചെയ്തു. ഇതോടെ ഡോക്ടർ പ്രകോപിതനാവുകയും തട്ടിക്കയറുകയും ചെയ്തു.

അടിയന്തിര ചികിത്സ നിഷേധിക്കപ്പെട്ടതോടെ ആശുപത്രിയിൽ വലിയതോതിലുള്ള ബഹളവും ആശയക്കുഴപ്പവും ഉടലെടുത്തു. രോഗികളുടെ ബുദ്ധിമുട്ട് വർധിച്ചതോടെ നാട്ടുകാരും സമീപവാസികളും വിഷയത്തിൽ ഇടപെടുകയും ഉടൻ തന്നെ വെള്ളറട പോലീസിനെ വിവരമറിയിക്കുകയുമായിരുന്നു. വിവരമറിഞ്ഞെത്തിയ പോലീസ് സംഘം ഡോക്ടറെ കസ്റ്റഡിയിലെടുത്ത് പാറശാല സർക്കാർ ആശുപത്രിയിൽ എത്തിച്ച് വൈദ്യപരിശോധന നടത്തി. വൈദ്യപരിശോധനയിൽ മദ്യപിച്ചിരുന്നതായി പ്രാഥമികമായി സ്ഥിരീകരിച്ചതിനെത്തുടർന്ന് ഡോക്ടർക്കെതിരെ കേസെടുക്കുകയും തുടർന്ന് സ്റ്റേഷൻ ജാമ്യത്തിൽ വിട്ടയക്കുകയും ചെയ്തു.

ഒരു സർക്കാർ സ്ഥാപനത്തിൽ, പ്രത്യേകിച്ച് രോഗികളുടെ ജീവൻ രക്ഷിക്കേണ്ട ആശുപത്രിയിൽ, മദ്യപിച്ചെത്തി ഡ്യൂട്ടിക്ക് ഹാജരാകുന്നത് ഗുരുതരമായ കൃത്യവിലോപമായാണ് നാട്ടുകാർ ചൂണ്ടിക്കാട്ടുന്നത്. മാത്രമല്ല, ഒരാഴ്ച മുൻപും സമാനമായ രീതിയിൽ ഡോക്ടർ മദ്യപിച്ചെത്തി രാത്രി ചികിത്സയ്ക്ക് വന്ന രോഗികളോട് മോശമായി പെരുമാറിയതായി രോഗികളും പരിസരവാസികളും പോലീസിനോട് വെളിപ്പെടുത്തി. ഈ ആവർത്തിച്ചുള്ള നടപടി ഡോക്ടറുടെ ഭാഗത്തുനിന്ന് ഉണ്ടാകുന്ന അനാസ്ഥയുടെ സൂചനയാണ് നൽകുന്നത്.

കേസിന്റെ തുടർനടപടികൾക്കായി പോലീസ് രക്തപരിശോധനയുടെ ഫലം കാത്തിരിക്കുകയാണ്. രക്തത്തിൽ മദ്യത്തിന്റെ അളവ് സ്ഥിരീകരിച്ചാൽ വകുപ്പുതല നടപടികൾ അടക്കം ഉണ്ടാകുമെന്ന് പോലീസ് അറിയിച്ചു. പൊതുജനാരോഗ്യത്തെയും സുരക്ഷയെയും ബാധിക്കുന്ന ഇത്തരം സംഭവങ്ങൾക്കെതിരെ കർശന നടപടിയെടുക്കണമെന്നാണ് നാട്ടുകാരുടെയും സാമൂഹ്യ പ്രവർത്തകരുടെയും ആവശ്യം.