മദ്രസ അദ്ധ്യാപകനായിരുന്ന പീഡകരിൽ ഒരാൾ അതേ മദ്രസയിൽ തന്നെ ഇപ്പോഴും അദ്ധ്യാപകനായി തുടരുന്നു; രണ്ടു പേർ രാഷ്ട്രീയമായി നല്ല പിടിപാടുള്ളവർ; മൊഴി മാറ്റാൻ കൈക്കൂലി വാഗ്ദാനം; വഴങ്ങില്ലെന്ന് ഉറപ്പായപ്പോൾ ലോറി ഇടിച്ചു കൊല്ലാൻ ശ്രമിച്ചു; പിന്നെ വെട്ടിക്കൊല്ലാനും; ഒന്നിനും പൊലീസിന് തെളിവില്ല; പോക്സോ അതിജീവിതമാർക്ക് രക്ഷയില്ല; ഇത് പീഡകർ വാഴം കേരളം
മലപ്പുറം: മൊഴിമാറ്റാനായി പ്രതികൾ 25 ലക്ഷം രൂപ വാഗ്ദാനം ചെയ്‌തെന്ന വെളിപ്പെടുത്തലുമായി പോക്സോ കേസിലെ അതിജീവിത എത്തുമ്പോൾ ചർച്ചയാകുന്നത് അട്ടിമറിക്ക് പിന്നിലെ മാഫിയാ ഇടപെടൽ. ബന്ധുവുമുൾപ്പെടെ 5 പേർ പീഡിപ്പിച്ചതായി 2018ൽ രജിസ്റ്റർ ചെയ്ത കേസിലെ ഇര ഞെട്ടിക്കുന്ന വെളിപ്പെടുത്തലാണ് നടത്തുന്നത്. മൊഴി മാറ്റിയാൽ പ്രതികൾ 5 ലക്ഷം രൂപ വീതം ആകെ 25 ലക്ഷം തരാമെന്നാണ് വാഗ്ദാനം. സ്വന്തമായി വീട് നിർമ്മിച്ചു നൽകാമെന്നും പറഞ്ഞു. എന്തെല്ലാം വാഗ്ദാനം ചെയ്താലും മൊഴി മാറ്റില്ലെന്നും ഇനിയൊരു പെൺകുട്ടിക്കും ഇത്തരമൊരു അനുഭവം ഉണ്ടാകരുതെന്നും അതിജീവിത പറയുന്നു.
രണ്ടു തവണ തനിക്കെതിരെ വധശ്രമവുമുണ്ടായെന്നും പരാതിയിൽ കേസെടുത്തെങ്കിലും തെളിവില്ലെന്ന് ചൂണ്ടിക്കാട്ടി പൊലീസ് അന്വേഷണം അവസാനിപ്പിച്ചെന്നും പെൺകുട്ടി ആരോപിക്കുന്നു. കുടുംബത്തിനൊപ്പമാണ് ഇപ്പോൾ പെൺകുട്ടി താമസിക്കുന്നത്. ഏഴാം വയസ്സ് മുതൽ പീഡനത്തിനിരയായതായി പെൺകുട്ടി പറയുന്നു. ക്ലാസ് അസംബ്ലിക്കിടെ തലചുറ്റി വീണതിനെത്തുടർന്ന് അദ്ധ്യാപകർ അന്വേഷിച്ചപ്പോഴാണു സംഭവം പുറത്തറിഞ്ഞത്. 2018ൽ പൊലീസ് കേസെടുത്തു. മലപ്പുറം ജില്ലയിൽ മൂന്നു പോക്സോ കോടതികൾ തുടങ്ങിയിട്ടുണ്ട്. എന്നിട്ടും ഈ കേസ ഇതുവരെ വിചാരണയ്ക്കെത്തിയിട്ടില്ല.
പ്രതികൾ 3 മാസം ജയിലിൽ കഴിഞ്ഞെങ്കിലും പിന്നീട് ജാമ്യം കിട്ടി പുറത്തിറങ്ങി. പ്രതികൾ സാധാരണ ജീവിതം നയിക്കുകയാണ്. പരാതി നൽകിയതിനു ശേഷം 2 തവണ വധശ്രമമുണ്ടായി. ആദ്യം ലോറി ഇടിപ്പിച്ച് കൊലപ്പെടുത്താനായിരുന്നു ശ്രമം. ലോറിയിൽ കേസിലെ പ്രതികളുണ്ടായിരുന്നു. എന്നാൽ പൊലീസ് കേസൊന്നും എടുത്തില്ല. പിന്നീട് സ്‌കൂളിലേക്കു പോകുന്നതിനിടെ കാറിലെത്തിയ സംഘത്തിന്റെ വെട്ടേറ്റു. സ്‌കൂൾ അധികൃതരും പരാതി നൽകി. പൊലീസ് അന്വേഷിച്ചെങ്കിലും തെളിവില്ലെന്നുപറഞ്ഞ് കേസ് അവസാനിപ്പിച്ചു. 7 വയസ്സു മുതൽ പെൺകുട്ടിക്ക് പീഡനത്തിനരയാകേണ്ടി വന്നു. നീതിക്കായുള്ള പോരാട്ടം തുടരുമെന്നും അതിനായി ഏതറ്റം വരെയും പോകുമെന്നും പെൺകുട്ടി പറയുന്നു.
'ഞാനാണ് കേസിലെ ഇര എന്ന് ആർക്കുമറിയില്ലായിരുന്നു. പക്ഷേ രണ്ടാമത്തെ വധശ്രമമുണ്ടായപ്പോൾ അവിടെയുണ്ടായിരുന്ന പഞ്ചായത്ത് പ്രസിഡന്റ് എന്നോടു പോലും അനുവാദം ചോദിക്കാതെ മാധ്യമങ്ങളെ അറിയിച്ചു. അയാൾ പ്രശസ്തനായി. പക്ഷേ കേസിനെ പറ്റി അറിയാത്തവർ പോലും ഞാനാണ് ഇര എന്ന് മനസ്സിലാക്കി. പ്രതികളിൽ മൂന്നു പേർ ബന്ധുക്കളാണ്. ഒരാൾ ഒരു സ്ഥാപനത്തിന്റെ ഉടമസ്ഥനാണ്. ഒരാൾ അയൽവാസിയാണ്-യുവതി പറയുന്നു. സാമ്പത്തികമായി വളരെ ബുദ്ധിമുട്ടു നേരിടുന്ന കുടുംബമാണ്. അതുകൊണ്ട് തന്നെ വീട്ടുകാർ കേസ് പിൻവലിക്കാൻ നിർബന്ധിച്ചു. ഒരാൾ പോലും പിന്തുണയില്ല.
പ്രതികളായ രണ്ടു പേർ രാഷ്ട്രീയമായി നല്ല പിടിപാടുള്ളവരാണ്. ചില രാഷ്ട്രീയ നേതാക്കളും മധ്യസ്ഥതയ്ക്കു ശ്രമിച്ചു. നഷ്ടപരിഹാരം വാങ്ങിത്തരാം കേസ് പിൻവലിക്കണമെന്ന് ആവശ്യപ്പെട്ടു. കേസിലെ ഒന്നാം പ്രതി മദ്രസ അദ്ധ്യാപകനാണ്. എനിക്കു നേരെയുണ്ടായ അതിക്രമം ഞാൻ പുറത്തു പറഞ്ഞു. അത് കേസായി അയാൾ ജയിൽശിക്ഷയും അനുഭവിച്ചതാണ്. എന്നിട്ടും ജാമ്യത്തിലിറങ്ങി അയാൾ ഇപ്പോഴും മദ്രസ അദ്ധ്യാപകനായി തന്നെ തുടരുകയാണ്. എന്റെ ജീവിതാവസാനം വരെ അവർക്കു ലഭിക്കാവുന്ന പരമാവധി ശിക്ഷ വാങ്ങി നൽകാൻ ഞാൻ ശ്രമിക്കും'. അതിജീവത പറയുന്നു.
2018ലാണ് ഈ കേസ് രജിസ്റ്റർ ചെയ്യുന്നത്. അഞ്ചു പേരായിരുന്നു കേസിലെ പ്രതികൾ. പോക്സോ കേസ് രജിസ്റ്റർ ചെയ്ത ഇവർക്കെതിരെ നടപടികളുണ്ടായെങ്കിലും 90 ദിവസങ്ങൾക്കു ശേഷം ഇവർ ജാമ്യത്തിലിറങ്ങി. മദ്രസ അദ്ധ്യാപകനായിരുന്ന ഒരാൾ അതേ മദ്രസയിൽ തന്നെ ഇപ്പോഴും അദ്ധ്യാപകനായി തുടരുന്നു. എന്നാൽ അതിക്രമത്തിനിരയായ പെൺകുട്ടിക്ക് സ്വന്തം നാടു തന്നെ ഉപേക്ഷിക്കേണ്ടി വന്നു.
