രാഹുല്‍ മാങ്കൂട്ടത്തില്‍ കേസിലെ പരാതിക്കാരിക്കെതിരായ സൈബര്‍ അധിക്ഷേപം; പരാതിയില്‍ രാഹുല്‍ ഈശ്വറെ കസ്റ്റഡിയിലെടുത്ത് സൈബര്‍ പോലീസ്; തിരുവനന്തപുരം എ ആര്‍ ക്യാമ്പില്‍ എത്തിച്ചു ചോദ്യം ചെയ്യുന്നു; അറസ്റ്റിലേക്ക് നീങ്ങുമെന്ന് സൂചനകള്‍; രാഹുലിനെതിരെ ചുമത്തിയത് അതിജീവിതയുടെ വിവരങ്ങള്‍ വെളിപ്പെടുത്തിയെന്നത്
രാഹുല്‍ മാങ്കൂട്ടത്തില്‍ കേസിലെ പരാതിക്കാരിക്കെതിരായ സൈബര്‍ അധിക്ഷേപം
തിരുവനന്തപുരം: രാഹുല്‍ മാങ്കൂട്ടത്തിലിന് എതിരായി പരാതി നല്‍കിയ യുവതിക്ക് നേരെ സൈബര്‍ അധിക്ഷേപം നടത്തിയെന്ന പരാതിയില്‍ രാഹുല്‍ ഈശ്വര്‍ പോലീസ് കസ്റ്റഡിയില്‍. പരാതിക്കാരിക്കെതിരായ സൈബറിടത്തില്‍ അധിക്ഷേപം നടത്തിയെന്നും അതിജീവിതയുടെ വിവരങ്ങള്‍ വെളിപ്പെടുത്തിയെന്നുമാണ് രാഹുല്‍ ഈശ്വറിനെതിരെ ചുമത്തിയ കുറ്റം.
വൈകുന്നേരത്തോടെയാണ് സൈബര്‍ പോലീസ് രാഹുലിനെ കസ്റ്റഡിയില്‍ എടുക്കാന്‍ എത്തിയത്. ചോദ്യം ചെയ്യാന്‍ വിളിപ്പിച്ച ശേഷം പൊലീസ് കസ്റ്റഡിയിലെടുക്കുകയായിരുന്നു. തുടര്‍ന്ന് രാഹുല്‍ ഈശ്വറെ ക്യാമ്പിലേക്ക് കൊണ്ടുപോയി. സൈബര്‍ പൊലീസ് ആണ് രാഹുല്‍ ഈശ്വറെ ചോദ്യം ചെയ്യാന്‍ വിളിപ്പിച്ചത്. രാഹുലിന്റെ ലാപ്ടോപ്പുകള്‍, മൊബൈല്‍ ഫോണ്‍ തുടങ്ങിയവയും പരിശോധനയ്ക്കായി പൊലീസ് കസ്റ്റഡിയിലെടുത്തതായി റിപ്പോര്‍ട്ടുണ്ട്.
കഡിയിലെടുത്ത് അല്‍പസമയങ്ങള്‍ക്ക് മുമ്പാണ് രാഹുലിനെ തിരുവനന്തപുരത്തെ എ.ആര്‍ ക്യാമ്പില്‍ എത്തിച്ചത്. വൈകാതെ ചോദ്യം ചെയ്യും. സൈബര്‍ എസിപിയുടെ നേതൃത്വത്തിലായിരിക്കും ചോദ്യംചെയ്യല്‍. രാഹുലിന്റെ അറസ്റ്റിലേക്കും കാര്യങ്ങള്‍ എത്തുമെന്നാണ് സൂചനകള്‍. പരാതിക്കാരി നല്‍കി പരാതിയിലാണ് ഹാജരാകാന്‍ ആവശ്യപ്പെട്ടത്. രാഹുല്‍ ഈശ്വര്‍ ഉള്‍പ്പെടെ 4 പേരുടെ യുആര്‍എല്‍ ആണ് പരാതിക്കാരി സമര്‍പ്പിച്ചത്. ഇത് പരിശോധിച്ചതിന് ശേഷമാണ് പൊലീസ് തുടര്‍നടപടികളിലേക്ക് കടന്നത്. സന്ദീപ് വാര്യരുടേയും രണ്ടു വനിതകളുടേയും യുആര്‍എല്‍ ഉള്‍പ്പെടെ നല്‍കിയ പരാതിയിലാണ് പൊലീസിന്റെ നിര്‍ണായക നീക്കം.
പെണ്‍കുട്ടിയുടെ ഐഡന്റിറ്റി വെളിപ്പെടുത്തുന്ന തരത്തിലുള്ള സൈബര്‍ ആക്രമണമായിരുന്നു കഴിഞ്ഞ ദിവസങ്ങളില്‍ നടന്നിരുന്നത്. കോണ്‍ഗ്രസുമായി ബന്ധപ്പെട്ട് ചില ഡിജിറ്റല്‍ മീഡിയ സെല്‍ അംഗങ്ങള്‍ നടത്തിയ സൈബര്‍ ആക്രമണങ്ങള്‍ ഉള്‍പ്പെടെയുള്ളവ ചേര്‍ത്താണ് അതിജീവിത പരാതി നല്‍കിയത്.
കഴിഞ്ഞ ദിവസം രാഹുല്‍ ഈശ്വര്‍, സന്ദീപ് വാര്യര്‍ അടക്കമുള്ളവര്‍ പെണ്‍കുട്ടിയുടെ ഐഡന്റിറ്റി വെളിപ്പെടുത്തുന്ന തരത്തില്‍ പോസ്റ്റുകള്‍ പങ്കുവച്ചതിനെതിരെ വലിയ വിമര്‍ശനം ഉയര്‍ന്നിരുന്നു. ഇരയിലേക്ക് സൂചന നല്‍കുന്ന വിവരങ്ങളുമായി രാഹുല്‍ ഈശ്വര്‍ വീഡിയോ ചെയ്തിരുന്നു എന്നുമാണ് പരാതി ഉയര്‍ന്നത്. രാഹുല്‍ പറഞ്ഞ കാര്യങ്ങള്‍ ശരിയെന്ന് കാണിച്ച് സന്ദീപ് വാര്യര്‍ പിന്നാലെ പോസ്റ്റിട്ടു.
സി.പി.എം എം.എല്‍.എ മുകേഷിനും കോണ്‍ഗ്രസ് എം.എല്‍.എ രാഹുല്‍ മാങ്കൂട്ടത്തിലിനും എതിരെയുള്ള പീഡനക്കേസ് കള്ളക്കേസാണെന്ന് തന്ത്രി കുടുംബാംഗം രാഹുല്‍ ഈശ്വര്‍ നേരത്തെ നിലപാട് സ്വീകരിച്ചത്. എല്‍ദോസ് കുന്നപ്പള്ളിക്കെതിരെ വ്യാജപരാതി കൊടുത്ത പെണ്‍കുട്ടിക്ക് 49 ക്രിമിനല്‍ കേസുകള്‍ ഉണ്ടെന്ന് ഹൈക്കോടതിയുടെ വിധിയിലുണ്ട്. പീഡനക്കേസ് നേരിടുന്ന മുകേഷിനും എല്‍ദോസ് കുന്നപ്പള്ളിക്കും അനുകൂലമായി കോടതിയില്‍നിന്ന് നിരീക്ഷണങ്ങള്‍ ഉണ്ടെന്നും രാഹുല്‍ വാദിച്ചിരുന്നു.
