ന്യൂഡൽഹി: സ്പെയിനിൽ നിന്നെത്തിയ യുവതി ഝാർഖണ്ഡിൽ കൂട്ട ബലാത്സംഗത്തിനിരയായ സംഭവം രാജ്യത്തെ ഞെട്ടിച്ചിരിക്കുകയാണ്. പങ്കാളിക്കൊപ്പം യാത്ര ചെയ്യവേ ടെന്റിൽ വിശ്രമിക്കുകയായിരുന്ന യുവതിയെ ഏഴുപേർ ചേർന്നാണ് ആക്രമിച്ചത്. ഇപ്പോഴിതാ സംഭവത്തെക്കുറിച്ചുള്ള യുവതിയുടെ വാക്കുകളാണ് ഏറെ ചർച്ചയാവുന്നത്.

ദമ്പതികൾ ഇൻസ്റ്റാഗ്രാമിൽ ലൈവിൽ വരുകയും എന്താണ് സംഭവിച്ചതെന്ന് തുറന്ന് പറയുകയും ചെയ്തു. 'ഒരാൾക്കും സംഭവിക്കരുതെന്ന് ഞങ്ങൾ കരുതുന്ന ഒന്ന് ഞങ്ങൾക്ക് സംഭവിച്ചു. ഏഴ് പുരുഷന്മാർ ചേർന്ന് എന്നെ റേപ്പ് ചെയ്തു. ഞങ്ങളെ മർദ്ദിക്കുകയും മോഷ്ടിക്കുകയും ചെയ്തു. അധികം വസ്തുക്കൾ മോഷ്ടിച്ചില്ല. കാരണം അവർക്ക് എന്നെ റേപ്പ് ചെയ്യുകയാണ് വേണ്ടിയിരുന്നത്. ഞങ്ങളിപ്പോൾ പൊലീസിനൊപ്പം ആശുപത്രിയിലാണ് ഉള്ളത്', ലൈവ് വീഡിയോയിൽ തനിക്കുണ്ടായ ദുരനുഭവം യുവതി പങ്കുവെച്ചു. രാജ്യത്തിനാകെ നാണക്കേടുണ്ടാക്കിയ സംഭവമാണ് ഝാർഖണ്ഡിൽ ഉണ്ടായത്.

ഈ സംഭവത്തിൽ പ്രതികരണവുമായി നടൻ ദുൽഖർ സൽമാൻ രംഗത്തെത്തി.'ഈ വാർത്ത കേട്ട് ഞാൻ തകർന്നുപോയി, ഈ അടുത്ത് ഇരുവരും കോട്ടയത്ത് എന്റെ ബന്ധുക്കളുടെ വീട്ടിൽ വിരുന്നിന് ഉണ്ടായിരുന്നു. ആർക്കും ഇങ്ങനെയൊരു അവസ്ഥ ഒരിടത്തും ഉണ്ടാവരുത്'ദുൽഖർ സൽമാൻ പ്രതികരിച്ചു.

വെള്ളിയാഴ്ച രാത്രി ബീഹാറിലെ ഭഗൽപൂരിലേക്ക് ദുംക വഴി യാത്ര പോകുമ്പോളാണ് സംഭവം നടന്നത്. ബൈക്കിൽ ലോകസഞ്ചാരത്തിന്റെ ഭാഗമായിട്ടാണ് ഇവർ ഇന്ത്യയിലെത്തിയത്.നേപ്പാളിലേക്കുള്ള യാത്രയുടെ ഭാഗമായി ഝാർഖണ്ഡിലെത്തിയ ഇവർ ദുംകയിൽ രാത്രി തങ്ങാനായി ഒരു ടെന്റ് ഒരുക്കിയിരുന്നു.

അവിടെവച്ചാണ് ആക്രമണം നടന്നത്. സംഭവത്തിൽ ഉൾപ്പെട്ട മുഴുവൻ പേരെയും തിരിച്ചറിഞ്ഞതായും നാല് പേരെ അറസ്റ്റ് ചെയ്തതായും ദുംക എസ്‌പി പീതാംബർ സിങ് ഖേർവാൾ മാധ്യമങ്ങളെ അറിയിച്ചു.ബാക്കിയുള്ള പ്രതികൾക്കാളെ പിടികൂടാൻ പ്രത്യേക അന്വേഷണ സംഘത്തെ രൂപീകരിച്ചിട്ടുണ്ടെന്നും പൊലീസ് പറഞ്ഞു. സ്പാനിഷ് ഭാഷയിൽ സംസാരിച്ചതിനാൽ ആശയവിനിമയ പ്രശ്‌നങ്ങൾ ഉണ്ടായെന്നും അദ്ദേഹം പറഞ്ഞു. ഇരുവരും അപകടനില തരണം ചെയ്തു. മെഡിക്കൽ ബോർഡ് ഇരയുടെ വൈദ്യപരിശോധന നടത്തും.