സ്‌കൂൾ വിട്ട് വീട്ടിലേക്ക് നടന്നു പോവുകയായിരുന്ന വിദ്യാർത്ഥിനിയെ വാപൊത്തി ബലമായി വലിച്ചിഴച്ച് കുറ്റിക്കാട്ടിൽ കൊണ്ടുപോയി പീഡിപ്പിച്ചു; കൗമാരക്കാരൻ പിടിയിൽ
കണ്ണൂർ: സ്‌കൂൾ വിട്ട് വീട്ടിലേക്ക് നടന്നു പോവുകയായിരുന്ന വിദ്യാർത്ഥിനിയെ ബലമായി വലിച്ചിഴച്ച് കുറ്റിക്കാട്ടിൽ കൊണ്ടുപോയി പീഡിപ്പിച്ചുവെന്ന പരാതിയിൽ പൊലീസ് കേസെടുത്തു. കണ്ണൂർ ജില്ലയിലെ മലയോരപൊലിസ് സ്റ്റേഷനിലാണ് കേസിനാസ്പദമായ സംഭവം നടന്നത്. ചൊവ്വാഴ്‌ച്ച വൈകുന്നേരം അഞ്ചു മണിക്കാണ് നാടിനെ നടുക്കിയ സംഭവം നടന്നത്.
സ്‌കൂൾ ബസിൽ നിന്നുമിറങ്ങി അരകിലോമീറ്റർ ദൂരെയുള്ള വീട്ടിലേക്ക് നടന്നു പോവുകയായിരുന്ന മലയോരപൊലീസ് സ്റ്റേഷൻ പരിധിയിലെ പെൺകുട്ടിയെ കൗമാരക്കാരനാണ് പീഡിപ്പിച്ചത്. പെൺകുട്ടിയുടെ പിന്നിലുടെ എത്തിയ കൗമാരക്കാരൻ വാപൊത്തി പിടിച്ചു ബലം പ്രയോഗിച്ചു കുറ്റികാട്ടിലേക്ക് വലിച്ചിഴച്ചു കൊണ്ടുപോയി പീഡിപ്പിക്കുകയായിരുന്നു.
അവശനിലയിൽ അവിടെ ഏറെ നേരം അവിടെ തന്നെ കിടന്ന പെൺകുട്ടി തന്നെ കണ്ടെത്തിയ നാട്ടുകാരോട് കരഞ്ഞു കൊണ്ടു വിവരം പറയുകയായിരുന്നു. നാട്ടുകാർ വീട്ടിലെത്തിച്ചതിനെ തുടർന്ന് വിവരം അറിഞ്ഞ ബന്ധുക്കൾ പൊലീസിൽ പരാതി നൽകുകയായിരുന്നു. ഉടൻ തന്നെ പെൺകുട്ടിയുടെ മൊഴിയെടുത്ത പൊലീസ് അന്വേഷണമാരംഭിച്ചു.
മണിക്കൂറുകൾ കൊണ്ടു പ്രതിയെ തിരിച്ചറിഞ്ഞ പൊലിസ് ബുധനാഴ്‌ച്ച രാവിലെ കസ്റ്റഡിയിലെടുക്കുകയായിരുന്നു. കസ്റ്റഡിയിലുള്ള കൗമാരക്കാരനെ ചോദ്യം ചെയ്തതിനു ശേഷം തുടർ നടപടികൾ സ്വീകരിക്കുമെന്ന് പൊലിസ് അറിയിച്ചു.
