തെരുവ് കച്ചവടക്കാരനായി വേഷംമാറി വീടുകൾ നിരീക്ഷിക്കും; പോലീസ് വീടുകൾ മാത്രം ലക്ഷ്യമിട്ട് മോഷണം; ഒടുവിൽ പോലീസ് വളഞ്ഞതോടെ രക്ഷപ്പെടാൻ കെട്ടിടത്തിന് മുകളിൽ നിന്ന് താഴേക്ക് ചാട്ടം; പിന്നാലെ പുറത്ത് വന്നത് 15 വർഷത്തെ പക
ഖണ്ട്വ: മധ്യപ്രദേശിൽ പോലീസ് വീടുകൾ മാത്രം ലക്ഷ്യമിട്ട് തുടർച്ചയായി മോഷണം നടത്തിവന്ന കുപ്രസിദ്ധ മോഷ്ടാവ് പിടിയിൽ. അലിരാജ്പൂർ ജില്ലക്കാരനായ ദീപേഷിനെയാണ് ഖണ്ട്വ പോലീസ് അതിസാഹസികമായി പിടികൂടിയത്. പോലീസ് ഉദ്യോഗസ്ഥരെ മാത്രം ലക്ഷ്യം വെച്ചുള്ള ഇയാളുടെ വേറിട്ട മോഷണ രീതിയാണ് ഇപ്പോൾ ചർച്ചയാകുന്നത്.
പ്രതികാരം മോഷണത്തിലൂടെ
എന്തുകൊണ്ടാണ് പോലീസ് വീടുകൾ മാത്രം ലക്ഷ്യമിടുന്നത് എന്ന ചോദ്യത്തിന് അന്വേഷണ ഉദ്യോഗസ്ഥരെ പോലും ഞെട്ടിക്കുന്ന മറുപടിയാണ് ദീപേഷ് നൽകിയത്. 15 വർഷം മുൻപ് അലിരാജ്പൂരിൽ വെച്ച് ഒരു പോലീസ് ഉദ്യോഗസ്ഥൻ തന്നെ ക്രൂരമായി മർദ്ദിച്ചിരുന്നെന്നും അന്നുമുതൽ പോലീസുകാരോട് പ്രതികാരം ചെയ്യാനാണ് അവരുടെ വീടുകളിൽ മാത്രം മോഷണം നടത്താൻ തുടങ്ങിയതെന്നും ഇയാൾ സമ്മതിച്ചു. പകൽ സമയങ്ങളിൽ പോലീസ് ക്വാർട്ടേഴ്സുകൾക്ക് സമീപം തെരുവ് കച്ചവടക്കാരനായി വേഷം മാറി നടന്നാണ് ഇയാൾ വീടുകൾ നിരീക്ഷിച്ചിരുന്നത്.
സിസിടിവി നൽകിയ സൂചന; സാഹസികമായ അറസ്റ്റ്
ജനുവരി 20-ന് ഖണ്ട്വയിലെ പോലീസ് ലൈൻസിൽ കോൺസ്റ്റബിൾമാരായ കരൺപാൽ സിംഗ്, സുരേഷ് ഖാട്ടെ എന്നിവരുടെ വീടുകളിൽ നടന്ന മോഷണമാണ് അന്വേഷണത്തിൽ നിർണ്ണായകമായത്. ലക്ഷക്കണക്കിന് രൂപയുടെ സ്വർണ്ണാഭരണങ്ങളും പണവുമാണ് അന്ന് മോഷണം പോയത്. പോലീസ് ലൈൻസിലെ സിസിടിവി ദൃശ്യങ്ങളിൽ നിന്നാണ് പ്രതിയെ തിരിച്ചറിഞ്ഞത്. ബുർഹാൻപൂരിലേക്ക് യാത്ര ചെയ്യുന്നതിനിടെ പ്രതിയെ പോലീസ് വളഞ്ഞു. രക്ഷപ്പെടാനായി കെട്ടിടത്തിന് മുകളിൽ നിന്ന് താഴേക്ക് ചാടിയ ഇയാളുടെ കൈയ്ക്കും കാലിനും പരിക്കേറ്റു. തുടർന്ന് ആശുപത്രിയിൽ പ്രവേശിപ്പിച്ച പ്രതിയെ പിന്നീട് കോടതിയിൽ ഹാജരാക്കി റിമാൻഡ് ചെയ്തു.
വൻ വിജയം എന്ന് പോലീസ്
ദീപേഷിനെ പിടികൂടാനായത് വലിയൊരു വിജയമാണെന്ന് അഡീഷണൽ എസ്പി മഹേന്ദ്ര തർനേക്കർ പറഞ്ഞു. ഇയാളുടെ പക്കൽ നിന്ന് 30,000 രൂപയും മോഷണം പോയ ചില സ്വർണ്ണാഭരണങ്ങളും കണ്ടെടുത്തിട്ടുണ്ട്. രമേഷ്, ഭൂരാലിയ എന്നീ രണ്ട് കൂട്ടാളികൾ കൂടി ഇയാൾക്കുണ്ടെന്നും അവർക്കായി തെരച്ചിൽ തുടരുകയാണെന്നും കോട്വാലി പോലീസ് അറിയിച്ചു.
