കളിച്ചു കൊണ്ടിരിക്കെ ഏഴു വയസ്സുകാരനെ കാണാതായി; അരിച്ചു പെറുക്കി നാട്ടുകാരും പോലിസും: കണ്ടെത്തിയത് അയലത്തെ കാറിന്റെ ഡിക്കിയില്‍ നിന്നും

ആലപ്പുഴ: കളിച്ചു കൊണ്ടിരിക്കെ ഏഴുവയസുകാരനെ വീട്ടില്‍നിന്നു കാണാതായി. വീടും പരിസരവും അരിച്ചുപെറുക്കിയെങ്കിലും കുട്ടിയെ കണ്ടെത്തിയില്ല. വീട്ടുകാരും നാട്ടുകാരും കുട്ടിയെ അന്വേഷിച്ചിറങ്ങി. വിവരം അറിഞ്ഞ് പോലിസും സ്ഥലത്തെത്തി. നീണ്ട തിരച്ചിലിനൊടുവില്‍ അയല്‍വീട്ടിലെ കാറിന്റെ ഡിക്കിയില്‍നിന്ന് കുട്ടിയെ കിട്ടി.

ആലപ്പുഴ പി. ആന്‍ഡ് ടി. ക്വാര്‍ട്ടേഴ്‌സിലായിരുന്നു വീട്ടുകാരെയും നാട്ടുകാരെയും ഭീതിയിലാഴ്ത്തിയ സംഭവം. വെള്ളിയാഴ്ച രാവിലെയാണ് വീട്ടില്‍ കളിച്ചുകൊണ്ടിരുന്ന കുട്ടിയെ കാണാതാകുന്നത്. ക്വാര്‍ട്ടേഴ്‌സിനകത്തും പരിസരത്തും വീട്ടുകാരും നാട്ടുകാരും പരിശോധന നടത്തിയെങ്കിലും കണ്ടെത്താനായില്ല. തുടര്‍ന്ന് സൗത്ത് പോലീസിനെ വിവരം അറിയിച്ചു. കുട്ടിയെ കാണാതായ വാര്‍ത്ത വയര്‍ലസ് വഴി മറ്റു സ്റ്റേഷനുകളിലുമെത്തി. എല്ലാ സ്ഥലങ്ങളിലും പോലീസ് പരിശോധന നടത്തി.

തട്ടിക്കൊണ്ടുപോകല്‍ സംശയങ്ങള്‍ ഉള്‍പ്പെടെ തലപൊക്കി. അതിനാല്‍ വീട്ടുകാരും ഭയപ്പെട്ടു. ഒരുമണിക്കൂര്‍ പരിശോധനയ്‌ക്കൊടുവില്‍ പി. ആന്‍ഡ് ടി. ക്വാട്ടേഴ്‌സിലെ ഇവരുടെ അയല്‍വാസിയുടെ കാറിന്റെ ഡിക്കിയില്‍നിന്ന് കുട്ടിയെ കണ്ടെത്തുകയായിരുന്നു. കളിക്കിടയില്‍ കുട്ടി വണ്ടിയില്‍ കയറുകയായിരുന്നെന്ന് പോലീസ് പറഞ്ഞു.