വന്യമൃഗ ആക്രമണത്തില്‍ മരിക്കുന്ന മനുഷ്യര്‍ക്കൊപ്പമാണ് നില്‍ക്കേണ്ടത്; മന്ത്രി എ.കെ. ശശീന്ദ്രനെതിരെ യൂത്ത് ഫ്രണ്ട് എം

കോട്ടയം: സംസ്ഥാനത്ത് തുടരുന്ന വന്യമൃഗ ആക്രമണത്തില്‍ വനം മന്ത്രി എ.കെ. ശശീന്ദ്രനെതിരെ രൂക്ഷ വിമര്‍ശനവുമായി യൂത്ത് ഫ്രണ്ട്-എം. വന്യജീവി ആക്രമണങ്ങളില്‍ മന്ത്രി എ.കെ. ശശീന്ദ്രന്റെ നിലപാട് നിരുത്തരവാദപരമാണെന്ന് യൂത്ത് ഫ്രണ്ട് സംസ്ഥാന കമ്മിറ്റി കുറ്റപ്പെടുത്തി.

കോട്ടയത്ത് സംഘടിപ്പിച്ച 'മാണിസം' യൂത്ത് കോണ്‍ക്ലേവില്‍ അവതരിപ്പിച്ച പ്രമേയത്തിലായിരുന്നു വനം മന്ത്രിക്കെതിരായ വിമര്‍ശനം. എല്‍.ഡി.എഫ് ഘടകകക്ഷിയായ കേരള കോണ്‍ഗ്രസ്-എമ്മിന്റെ യുവജനവിഭാഗമാണ് യൂത്ത് ഫ്രണ്ട്-എം.

വന്യമൃഗങ്ങളുടെ ആക്രമണത്തില്‍ മനുഷ്യര്‍ മരിക്കുമ്പോള്‍ അവര്‍ക്കൊപ്പമാണ് നില്‍ക്കേണ്ടത്. എന്നാല്‍, അവരെ കുറ്റപ്പെടുത്തുന്ന സമീപനമാണ് മന്ത്രി സ്വീകരിച്ചതെന്നും യൂത്ത് ഫ്രണ്ട്-എം കുറ്റപ്പെടുത്തി.