കണ്ണൂരിലെ വ്യവസായ പ്രമുഖൻ മഹേഷ് ചന്ദ്രബാലിഗയുടെ മകൾ വാഹനാപകടത്തിൽ മരിച്ചു; ശിവാനിയുടെ അന്ത്യം ബൈക്ക് അപകടത്തിൽ പരിക്കേറ്റ് ചികിത്സയിൽ കഴിയവേ

കണ്ണൂർ: കണ്ണൂരിലെ പ്രമുഖ വ്യവസായിയും ചേംബർ ഓഫ് കൊമേഴ്സ് മുൻപ്രസിഡന്റുമായ കണ്ണൂർ സെന്റ് മൈക്കിൾ സ്‌കൂളിനു സമീപം താമസിക്കുന്ന സുഖജ്യോതിയിൽ മഹേഷ് ചന്ദ്രബാലിഗയുടെ മകൾ ശിവാനി ബാലിഗ(20) വാഹനാപകടത്തിൽ ചികിത്സയിലിരിക്കെ മരണമടഞ്ഞു. മണിപ്പാൽ യൂനിവേഴ്സിറ്റിയിലെ മെഡിക്കൽവിദ്യാർത്ഥിനിയാണ് ശിവാനി.

കാസർകോട് ബേക്കലിൽ നിന്നും സഹാപാഠിക്കൊപ്പം കഴിഞ്ഞ പതിനേഴിന് രാത്രി ബൈക്കിൽ തിരിച്ചു പോകുമ്പോൾ ഇവർ സഞ്ചരിച്ച വാഹനം പുലിക്കുന്നിലെ കെ. എസ്.ടി.പി റോഡിലുള്ള കുഴിയിൽ നിയന്ത്രണം വിട്ടുവീഴുകയായിരുന്നു. ഇതേ തുടർന്ന് വിദ്യാർത്ഥികളായ ഇരുവരെയും നാട്ടുകാരുടെ സഹായത്തോടെ പൊലിസ് മംഗളൂര് കെ. എം.സി ആശുപത്രിയിലെത്തിക്കുകയും അതിതീവ്രപരിചരണവിഭാഗത്തിൽ ചികിത്സയിലായിരുന്നു ശിവാനി തിങ്കളാഴ്‌ച്ച ഉച്ചയോടെയാണ് മരണമടയുന്നത്.

കൂടെയുണ്ടായിരുന്ന സുഹൃത്ത് അപകടനിലതരണം ചെയ്തുവെന്ന് ആശുപത്രി വൃത്തങ്ങൾ അറിയിച്ചു. അനുപമ ബാലിഗയാണ് മരണമടഞ്ഞ ശിവാനിയുടെ അമ്മ. സഹോദരൻ: രജത് ബാലിഗ ( എൻജിനിയർ ബംഗളൂരൂ) സംസ്‌കാരം ചൊവ്വാഴ്‌ച്ച വൈകുന്നേരം നാലുമണിക്ക് കണ്ണൂർ തയ്യിൽ സമുദായ ശ്മശാനത്തിൽ നടക്കും.