മരുന്നു വാങ്ങി ഓട്ടോയിലേക്ക് കയറുമ്പോൾ അപകടം; ലോഡുമായി വന്ന ടോറസ് ലോറി നിയന്ത്രണം വിട്ട് ഓട്ടോയിലേക്ക് പാഞ്ഞു കയറി; അടൂരിൽ അയൽവാസികൾക്ക് ദാരുണാന്ത്യം

അടൂർ: ലോഡുമായി വന്ന ലോറി നിയന്ത്രണം വിട്ട് നിർത്തിയിട്ടിരുന്ന ഓട്ടോയിലേക്ക് പാഞ്ഞു കയറി അയൽവാസികൾക്ക് ദാരുണാന്ത്യം. ഓട്ടോറിക്ഷാ ഡ്രൈവർ പോരുവഴി ഇടയ്ക്കാട് ദേവഗിരി പുത്തൻപറമ്പിൽ പുത്തൻവീട്ടിൽ പരേതനായ ജോർജിന്റേയും തങ്കമ്മയുടേയും മകൻ ഡിനു ജോർജ്(38), അയൽവാസി ദേവഗിരി സൂസി കോട്ടേജിൽ ജോൺസൺ(70) എന്നിവരാണ് മരിച്ചത്.

തിങ്കളാഴ്ച വൈകിട്ട് 4.45ന് അടൂർ-ഭരണിക്കാവ് സംസ്ഥാന പാതയിൽ തുവയൂർ ജങ്ഷനു സമീപത്തായിരുന്നു അപകടം. തുവയൂരിലെ മെഡിക്കൽ സ്റ്റോറിൽ നിന്നും മരുന്ന് വാങ്ങാൻ ഓട്ടോറിക്ഷാ ഡ്രൈവറും അയൽവാസിയുമായിരുന്ന ഡിനുവിനൊപ്പം എത്തിയതായിരുന്നു ജോൺസൺ. മരുന്നു വാങ്ങി ജോൺസൺ തിരികെ ഓട്ടോയിലേക്ക് കയറിയ ഉടൻ അപകടം നടന്നു.

ഡിനു വാഹനത്തിനുള്ളിൽ തന്നെ ഇരിക്കുകയായിരുന്നു. ഗുരുതര പരുക്കേറ്റ ഇവരെ അടൂർ ജനറൽ ആശുപത്രിയിൽ എത്തിച്ചെങ്കിലും മരിച്ചു. അടൂരിൽ നിന്നും കടമ്പനാട് ഭാഗത്തേക്ക് പോയതായിരുന്നു ടോറസ്. ജോൺസന്റെ ഭാര്യ: എൽസമ്മ. മക്കൾ: മോൻസി,ആൻസി. ഡിനു ജോർജിന്റെ സഹോദരങ്ങൾ: അനിൽ, സുനിൽ.