കോഴഞ്ചേരി: മാൻ ലോറിയുടെ അറ്റകുറ്റപ്പണിക്കിടെ ഉയർത്തി വച്ചിരുന്ന ക്യാബിൻ താഴേക്ക് വീണു മെക്കാനിക്കിന് ദാരുണാന്ത്യം. ചങ്ങനാശേരി വെങ്കോട്ട മാടപ്പള്ളി വലിയ വീട്ടിൽ സന്തോഷ് ആണ് മരിച്ചത്. വെള്ളിയാഴ്ച രാവിലെ പുല്ലാട് കുറവൻ കുഴിയിലാണ് സംഭവം.

ലോറിയുടെ ക്യാബിൻ ഉയർത്തിയതിന് ശേഷം പിന്നിൽ ഇരുന്ന അറ്റകുറ്റപ്പണി നടത്തുന്നതിനിടെ ഹൈഡ്രോളിക സംവിധാനത്തിലെ തകരാർ മൂലം ക്യാബിൻ ഇയാളുടെ മുകളിൽ പതിക്കുകയായിരുന്നു. ക്യാബിനും ഷാസിക്കും ഇടയിൽ കുടുങ്ങി തൽക്ഷണം മരിച്ചു. തിരുവല്ലയിൽ നിന്നുമെത്തിയ ഫയർ ഫോഴ്സ് സംഘം ഏറെ പണിപ്പെട്ടാണ് മൃതദേഹം പുറത്തെടുത്തത്. ഇൻക്വസ്റ്റ് തയാറാക്കിയതിന് ശേഷം മൃതദേഹം പോസ്റ്റുമോർത്തിനായി ചെങ്ങന്നൂർ താലൂക്ക് ആശുപത്രിയിലേക്ക് മാറ്റി.