ആലപ്പുഴ സ്റ്റേഷനിൽ ട്രെയിൻ മാറി കയറുന്നതിനിടെ പാളത്തിൽ വീണ് യുവതി മരിച്ചു; മരണമടഞ്ഞത് മണ്ണാർക്കാട് സ്വദേശിനി; തലയ്‌ക്കേറ്റ ക്ഷതം മരണകാരണം

ആലപ്പുഴ: റെയിൽവെ സ്‌റ്റേഷനിൽ ട്രെയിൻ മാറി കയറുന്നതിനിടെ കാൽവഴുതി പാളത്തിലേക്ക് വീണ യുവതി മരിച്ചു. പാലക്കാട് മണ്ണാർക്കാട് പുല്ലശ്ശേരി ചേറുങ്ങോട്ടിൽ രാജേഷിന്റെ ഭാര്യ മീനാക്ഷി (45) ആണു മരിച്ചത്. വ്യാഴാഴ്ച വൈകിട്ട് 7.25നാണ് സംഭവം.

എറണാകുളം -കായംകുളം പാസഞ്ചർ ട്രെയിനിൽ ആലപ്പുഴ റെയിൽവേ സ്റ്റേഷനിൽ വന്നിറങ്ങിയ യുവതി അതേസമയം സ്റ്റേഷനിൽ എത്തിയ കൊച്ചുവേളി എക്‌സപ്രസിൽ ഓടിക്കയറാൻ ശ്രമിക്കുന്നതിനിടെ ആ ട്രെയിൻ വിട്ടുപോയി.

ഇതോടെ തിരിച്ച് എറണാകുളം കായംകുളം പാസഞ്ചറിൽ കയറാൻ ശ്രമിക്കുന്നതിനിടെ കാൽവഴുതി പാളത്തിലേക്ക് വീഴുകയായിരുന്നെന്ന് റെയിൽവേ അധികൃതർ പറഞ്ഞു. തലയ്ക്കും ഇടതു കാലിനും പരുക്കേറ്റ യുവതിയെ ആർപിഎഫ് ഇടപെട്ട് ഉടൻതന്നെ മെഡിക്കൽ കോളജ് ആശുപത്രിയിൽ എത്തിച്ചെങ്കിലും രാത്രി ഒൻപതു മണിയോടെ മരണം സംഭവിക്കുകയായിരുന്നു. യുവതിയുടെ ഇടതുകാൽപാദം അറ്റ നിലയിലാണ്. തലയ്‌ക്കേറ്റ ക്ഷതമാണ് മരണകാരണമെന്നാണ് പ്രാഥമിക നിഗമനം.