വീടിൻ്റെ മുമ്പിൽ നിർത്തിയിട്ട ഓട്ടോറിക്ഷയെ കാണാനില്ല; മോഷണ കേസിൽ യുവാവിനെ പൊക്കി പോലീസ്; സംഭവം പുതുപ്പള്ളി തെരുവിൽ

പാലക്കാട്: പുതുപ്പള്ളി തെരുവിൽ വീടിൻ്റെ മുന്നിൽ നിർത്തിയിട്ടിരുന്ന ഓട്ടോറിക്ഷ മോഷ്ടിച്ച കേസിൽ ഒരാളെ പാലക്കാട് ടൗൺ സൗത്ത് പോലീസ് അറസ്റ്റ് ചെയ്തു. കുതിരംപറമ്പ് മണപ്പാടം സ്വദേശി ഷിജു എന്ന രാജിയാണ് പിടിയിലായത്. ഇയാൾക്കെതിരെ അടിപിടി, ബൈക്ക് മോഷണം, പിടിച്ചുപറി, കഞ്ചാവ് വിൽപ്പന തുടങ്ങിയ നിരവധി കേസുകൾ നിലവിലുണ്ട്. തമിഴ്നാട്ടിൽ കഞ്ചാവ് കേസിൽ ജയിൽ ശിക്ഷ അനുഭവിച്ചിട്ടുമുണ്ട്.

സംഭവവുമായി ബന്ധപ്പെട്ട് പോലീസ് നടത്തിയ അന്വേഷണത്തിലാണ് പ്രതിയെ പിടികൂടിയത്. മോഷ്ടിക്കപ്പെട്ട ഓട്ടോറിക്ഷ വളയാറിൽ നിന്ന് പോലീസ് കണ്ടെടുത്തു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. കഴിഞ്ഞ കുറച്ചുകാലമായി ഈ മേഖലയിൽ വർദ്ധിച്ചുവരുന്ന മോഷണ പരമ്പരകളുടെ പശ്ചാത്തലത്തിൽ പോലീസ് അന്വേഷണം ഊർജ്ജിതമാക്കിയിട്ടുണ്ട്. ഷിജുവിൻ്റെ അറസ്റ്റ് ഈ കേസുകളിൽ നിർണായക വഴിത്തിരിവാകുമെന്നാണ് പോലീസ് കരുതുന്നത്.