റോഡരികിൽ ബസ് കാത്തുനിന്ന വിദ്യാർത്ഥി; അതുവഴി സ്‌കൂട്ടറിലെത്തിയ ഒരാളുടെ മോശം പ്രവർത്തി; 16കാരനെ ആളൊഴിഞ്ഞ വീട്ടിലെത്തിച്ച് പീഡിപ്പിക്കാൻ ശ്രമം; ഒടുവിൽ ഹെൽമറ്റ് പ്രയോഗത്തിൽ രക്ഷ
കാസർകോട്: ബസ് കാത്തുനിന്ന 16-കാരനെ സ്‌കൂട്ടറിൽ തട്ടിക്കൊണ്ടുപോയി ആളൊഴിഞ്ഞ വീട്ടിലെത്തിച്ച് പീഡിപ്പിക്കാൻ ശ്രമിച്ച സംഭവത്തിൽ ഒരാൾ അറസ്റ്റിൽ. ഇന്നലെ ഉച്ചകഴിഞ്ഞാണ് സംഭവം നടന്നത്. സംഭവത്തിൽ വിശദമായ അന്വേഷണം പുരോഗമിക്കുകയാണ്.
മേൽപ്പറമ്പ് സ്റ്റേഷനിൽ ലഭിച്ച പരാതിയുടെ അടിസ്ഥാനത്തിൽ പൊലീസ് അന്വേഷണം ആരംഭിച്ചു. സംഭവസ്ഥലത്തെ സിസിടിവി ദൃശ്യങ്ങൾ ഉൾപ്പെടെ പൊലീസ് പരിശോധിച്ചുവരികയാണ്.
സംഭവത്തെക്കുറിച്ച് പൊലീസ് പറയുന്നത് ഇങ്ങനെ: ബസ് സ്റ്റോപ്പിൽ ബസ് കാത്തുനിന്ന വിദ്യാർത്ഥിയോട് വഴി ചോദിച്ചെത്തിയ സ്‌കൂട്ടർ യാത്രികൻ, വഴി പറഞ്ഞു നൽകിയെങ്കിലും തൃപ്തനാകാതെ വിദ്യാർത്ഥിയെ വഴി കാണിക്കാമെന്ന് പറഞ്ഞ് നിർബന്ധിച്ച് സ്‌കൂട്ടറിൽ കയറ്റിക്കൊണ്ടുപോകുകയായിരുന്നു. പിന്നീട് വിജനമായ പ്രദേശത്തെ ഒരു വീട്ടിലെത്തിച്ച് പീഡിപ്പിക്കാൻ ശ്രമിച്ചപ്പോൾ വിദ്യാർത്ഥി തന്റെ കയ്യിലിരുന്ന ഹെൽമെറ്റ് ഉപയോഗിച്ച് അക്രമിയെ അടിക്കുകയും ഓടി രക്ഷപ്പെടുകയുമായിരുന്നു.
രക്ഷപ്പെട്ട വിദ്യാർത്ഥി ഉടൻതന്നെ മാതാപിതാക്കളെ വിവരം അറിയിക്കുകയും തുടർന്ന് പൊലീസിൽ പരാതി നൽകുകയുമായിരുന്നു. അക്രമിയും സ്‌കൂട്ടറിൽ രക്ഷപ്പെട്ടതായും പരാതിയിൽ പറയുന്നുണ്ട്. പൊലീസ് കേസെടുത്ത് അന്വേഷണം ഊർജിതമാക്കിയിട്ടുണ്ട്. പ്രതിയെക്കുറിച്ചുള്ള കൂടുതൽ വിവരങ്ങൾ ലഭ്യമായിട്ടില്ല.
