മലപ്പുറം: വിൽപ്പനയ്ക്കായി സൂക്ഷിച്ചിരുന്ന 20 ലക്ഷം രൂപ വിലമതിക്കുന്ന 416 ഗ്രാം എംഡിഎംഎയുമായി കായികാധ്യാപകൻ അറസ്റ്റിൽ. മലപ്പുറം കുട്ടിലങ്ങാടി കടുങ്ങോത്ത് സ്വദേശി ചേലോടൻ മുജീബ് റഹ്മാനെയാണ് (32) അങ്ങാടിപ്പുറം പുത്തനങ്ങാടിയിൽ നിന്ന് പോലീസ് പിടികൂടിയത്. രഹസ്യവിവരത്തെ തുടർന്ന് എംഇഎസ് ആശുപത്രിക്ക് സമീപം ഇയാൾ താമസിച്ചിരുന്ന ലോഡ്ജിൽ നടത്തിയ പരിശോധനയിലാണ് ലഹരിമരുന്ന് കണ്ടെത്തിയത്.

ഡാൻസാഫ് എസ്ഐ ഷിജോ സി. തങ്കച്ചനും സംഘവുമാണ് പ്രതിയെ പിടികൂടിയത്. നിരവധി സ്കൂളുകളിൽ കായികാധ്യാപകനായി ഇയാൾ പ്രവർത്തിച്ചിട്ടുണ്ട്. ഒരു വർഷം മുമ്പാണ് മുജീബ് റഹ്മാൻ ലഹരിക്കടത്ത് ആരംഭിച്ചതെന്ന് പോലീസ് പറഞ്ഞു.

ഡൽഹി, ബംഗളൂരു എന്നിവിടങ്ങളിൽ നിന്ന് എംഡിഎംഎ, മെത്താഫിറ്റമിൻ തുടങ്ങിയ സിന്തറ്റിക് ലഹരിമരുന്നുകൾ വലിയ തോതിൽ എത്തിക്കുന്നതായും ഇവ കളിപ്പാട്ടങ്ങളിൽ ഉൾപ്പെടെ ഒളിപ്പിച്ച് ജില്ലയുടെ വിവിധ ഭാഗങ്ങളിൽ എത്തിക്കുന്നതായും പ്രതി പോലീസിന് മൊഴി നൽകി.

ഹൈവേ പരിസരങ്ങളും പ്രത്യേക സ്ഥലങ്ങളും ലഹരിക്കടത്തിനായി ഇവർ ഉപയോഗപ്പെടുത്തുന്നു. ലഹരിക്കടത്ത് സംഘത്തിലെ മറ്റു കണ്ണികളെക്കുറിച്ചും പോലീസിന് വിവരം ലഭിച്ചിട്ടുണ്ട്. പിടിയിലായ പ്രതിയെ വിശദമായി ചോദ്യം ചെയ്യുന്നതിനായി കസ്റ്റഡിയിൽ വാങ്ങുമെന്ന് പോലീസ് അറിയിച്ചു.

പ്രതിഅറസ്റ്റ്മയക്കുമരുന്ന് കേസ്

സ്വന്തം ലേഖകൻ